ރާއްޖެއަށް މަސްތުވާތަކެތި އެތެރެކުރި 4 މީހަކު ހައްޔަރުކޮށްފި

ރާއްޖެ އަށް މަސްތުވާތަކެތި އެތެރެކުރި ޕާކިސްތާނުގެ 4 މީހަކު ހައްޔަރުކޮށްފިއެވެ.

މި މައްސަލައިގައި ހައްޔަރު ކޮށްފައި ވަނީ ޕާކިސްތާނުގެ މިސްބާހް ބީބީ(32 އަހަރު)، ނަޢީމް ޠާރިޤް(32 އަހަރު)، ހަވާރް ހުސައިން(36 އަހަރު) އަދި ޝަހްޒާދު ހުސެއިން (36 އަހަރު)އެވެ.

އެމީހުން ރާއްޖެއަށް މަސްތުވާތަކެތި އެތެރެކުރަން މަސައްކަތް ކޮށްފައިވަނީ ދިރުވާލައިގެނެވެ.

އެ 4 މީހުން ހައްޔަރުކުރުމަށް ނެރެފައިވާ އަމުރުގައި ބުނެފައިވަނީ އެ މީހުން ރާއްޖެއަށް އައިއިރު، ހަރަކާތްތައް ހުރި ގޮތުން ދިރުވާލައިގެން މަސްތުވާތަކެތި އެތެރެކުރަން އުޅޭ ކަމަށް ޝައްކުކުރެވުނު ކަމަށެވެ.

އެހެންކަމުން އެ މީހުން އައިޖީއެމްއެޗަށް ގެންގޮސް ސްކޭން ކުރި އިރު ހަށިގަނޑު ތެރޭގައި އެއްޗެހިތަކެއް ހުރިކަން ދެނެގަނެވުނު ކަމަށް އަމުރުގައި ވަނީ ބުނެފައެވެ.

އިއްޔެ އެމީހުންގެ ބަންދާ މެދު ގޮތެއް ނިންމުމަށް، އެމީހުންގެ ޣަައިރު ހާޒިރުގައި ބޭއްވި ޝަރީއަތުގައި، ކްރިމިނަލް ކޯޓުންވަނީ އެ ހަތަރު މީހުންގެ ބަންދަށް ފަސް ދުވަސް ޖަހައިފައެވެ.

އެ ހަތަރު މީހުންގެ ބަންދާ މެދު ކްރިމިނަލް ކޯޓުން ގޮތެއް ނިންމިއިރު، އެ މީހުން ތިބީ ދޫނިދޫ މެޑިކަލް ކްލިނިކްގައެވެ. އެހެންކަމުން އެމީހުންގެ ޣައިރު ހާޒިރުގައި މުއްދަތު ޖަހާފައިވާތީ، ޝަރީއަތް ކުރުމާ ބެހޭ ޖިނާއީ އިޖުރާތުގެ ގާނޫނުގެ ދަށުން ކްލިނިކުން ދޫކޮށްލާ ވަގުތުން ފެށިގެން 24 ގަޑިއިރުގެ ތެރޭގައި އަލުން ބަންދާ މެދު ގޮތެއް ނިންމުމަށް ކޯޓަށް ހާޒިރުކުރުމަށް ވަނީ އަންގާފައެވެ.