ސަލްޓަން ޕާކާއި ލޮނުޒިޔާރަތް ޕާކަށް ދާ ބިދޭސީންގެ އަތުން ފީއެއް ނަގަން ނިންމައިފި

ސަލްޓަން ޕާކާއި ލޮނުޒިޔާރަތް ޕާކަށް ޒިޔާރަތް ކުރާ ބިދޭސީންގެ އަތުން ފީއެއް ނަގަން މާލެ ސިޓީ ކައުންސިލުން ނިންމައިފިއެވެ.

މިކަން ކުރުމަށް ނިންމާފައިވަނީ މިއަދު ބޭއްވުނު މާލޭ ސިޓީ ކައުންސިލްގެ 4 ވަނަ ދައުރުގެ 104 ވަނަ ރަސްމީ ޢާއްމު ޖަލްސާގައެވެ.

އެގޮތުން 12 ބޭފުޅުންގެ އަގްލަބިއްޔަތުން ޖޫން މަހުގެ 15 ފެށިގެން, ޓޫރިސްޓް ވިސާ އޮންނަ ފަރާތްތަކަށް ވުރެ ކުޑަ ފީއެއް ވޯކް ޕާމިޓް އޮންނަ ބިދޭސީން އަތުން ނަގަން ކައުންސިލުން ވަނީ ފާސްކޮށްފައެވެ.

ޖަލްސާގައި ވާހަދައްކަވަމުން ސިޓީ ކައުންސިލްގެ މޭޔަރ ޑރ. މުހައްމަދު މުއިއްޒު ވަނީ މިކަމަކީ އެހެން ގައުމުތަކުގައިވެސް ކަންތައް ކުރާ ގޮތް ކަމަށް ފާހަގަކުރައްވާ މިއަންނަ މަހުގެ 15 އިން ފެށިގެން ފީ ނެގިދާނެ ކަމަށް ވިދާޅުވެފައެވެ.

މިއާއިއެކު މޭޔަރ ވަނީ މިހާރުވެސް ދެ ޕާކްގެ ގޭޓްވެސް ބަލަހައްޓަމުން ދާތީ މިއީ އުނދަގޫ ކަމަކަށް ނުވާނެ ކަމަށް ވިދާޅުވެފައެވެ.

އަދި ސަލްޓަން ޕާކްގައި މިކަން އަލުން ފަށާއިރު ލޮނުޒިޔާރަތް ޕާކުގައި މިކަން ފަށަނީ މުޅިން އަލަށް ކަމަށް މޭޔަރ ވަނީ ފާހަގަކުރައްވާފައެވެ.

މިކަމާއި ގުޅޭ ގޮތުން ކައުންސިލަރ ޒަމީރު ވިދާޅުވީ ރާއްޖެއަކީ މިހާރު ބިދޭސީންނަށް ވަރަށް ބޮޑަށް ހުޅުވާލެވިފައި އޮތް ތަނެއް ކަމަށްވީ ނަމަވެސް ދުނިޔޭގެ އެހެން ގައުމު ތަކުގައި ކަން އޮންނަނީ މިހެން ނޫން ކަމަށެވެ.

އެހެންކަމުން ޕާކްތަކުގެ އިތުރުން މޫދާއި މަސްބާނާ ތަންތަން ފަދަ މާލޭގެ އާންމު ތަންތަނުންވެސް ބިދޭސީންނަށް ވަދެވޭނެ ވަކި ގަޑިތަކެއް ނުވަތަ ވަކި ފީއެއް ކަނޑައެޅުމަށް ފެންނަ ކަމަށެވެ.

ޒަމީރުގެ އިތުރުން މިކަމަށް ވާހަކަ ދައްކަވަމުން ކައުންސިލަރ ނާޒިމާ ވަނީ ފަތުރުވެރިންގެ އަތުން ނަގާ ފީ ބޮޑުކުރުމަށް ފަހު މާލޭގައި ދިރިއުޅޭ ވޯކް ޕާމިޓް އޮތް ބިދޭސީންގެ އަތުން ނަގާ ފީ ކުޑަ ކުރުމަށް ހުށަހަޅާފައެވެ.