މަޖިލީހުގެ މަސްއޫލިއްޔަތަށް ހުރަސްއެޅުމުގެ ބާރު ބަންޑާރަ ނައިބަށް ލިބިގެނެން ނުވޭ: ޑރ. އަހުމަދު

މަޖިލީހުގެ މަސްއޫލިއްޔަތަށް ހުރަސްއެޅުމުގެ ބާރު ބަންޑާރަނައިބަށް ލިބިގެނެން ނުވާކަމަށް ދިވެހިރާއްޖޭގެ ކުރީގެ އުއްތަމަ ފަނޑިޔާރު ޑރ. އަހުމަދު އަބްދުالله ދީދީ ވިދާޅުވެއްޖެއެވެ.

ޑރ. އަހުމަދު އަބްދުالله ދީދީ މިފަދައިން ވިދާޅުވީ، ބަންޑާރަނައިބުގެ ނިންމުންތަކާމެދު މަޖިލީހަށް ގޮތެއް ނިންމޭނެކަމަށް މިހާރުގެ ބަންޑާރަނައިބު އިބްރާހިމް ރިފްއަތު ދެކެވަޑައި ނުގަންނަވާ ކަމަށް ހަބަރު ފެތުރުމާ ގުޅިގެންނެވެ.

"ތިޔަ ވާހަކަތަކަކީ މަޖިލީހުން މަނިކުފާނުގެ އިތުބާރު ނެތްކަމުގެ މައްސަލައެއް ތާވަލުކޮށް ހިންގާ އިޖުރާއާތަށް ހުރަސް އެޅުމުގެ ނިޔަތުގައި ދައްކަވާ މައުޟޫޢުން ބޭރު ވާހަކަ،" ޑރ. އަހުމަދު އަބްދުالله ދީދީ ވިދާޅުވިއެވެ.

ޗާގޯސް ކަނޑުގެ ފުށުއަރާ ސަރަހައްދުގެ އިން ވަކިކުރި މައްސަލާގައި ރާއްޖޭގެ ކަނޑުން ބައެއް ވިއްކާލިކަމަށް ބުނެ މަޖިލީހަށް ހުށަހެޅު ބަންޑާރަ ނާއިބު އިބްރާޙީމް ރިފްޢަތު ގެ އިތުބާރު ނެތް ކަމުގެ މައްސަލައަށް ޖަވާބުދާރީވުމަށް މަޖިލީހަށް ހާޒިރު ނުވެ، ރިފްއަތް ވަނީ ޖަވާބު ލިޔުމުން ފޮނުވާފައެވެ.

ދިވެހިރާއްޖެއާއި ރާއްޖޭގެ ދެކުނުން އޮންނަ ޗާގޯސް އާއި ދެމެދު ފުށުއަރާ ސަރަހަދެއް އޮތްކަމަށް ބުނެ މޮރިޝަސްއިން އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސީ (އިޓްލޮސް) އަށް ހުށައެޅި މައްސަލައިގައި ދައުލަތުގެ ބަންޑާރަނައިބު ވަކާލާތުކޮށްފައިވަނީ ރާއްޖެއާއި ރައްޔިތުންގެ މަސްލަހަތު އިސްކޮށްގެން ނޫންކަން ފެންނަންހުރި ހެކިތަކުން ސާފުވާތީކަމަށް މަޖިލީހުގައި ހަރަކާތްތެރިވާ ގިނަ ސިޔާސީ ޕާޓީތަކުން ވަނީ ބުނެފައެވެ.

އެގޮތުން އެ މައްސަލާގައި ދިވެހިރާއްޖޭގެ ކަނޑުގެ ސަރަހައްދުން ބައެއް މި ސަރުކާރުން ވިއްކާލާފައިވާ ކަމަށާ، އިމުގެ ނުވަތަ ސަރަހައްދުގެ ވާހަކައަކީ ކުޅޭ ކުޅޭ ވާހަކައެއް ނޫން ކަމަށާއި، ރާއްޖޭގެ ސަރަހައްދުން އަކަ އިންޗިއެއްވެސް ގެއްލިގެން ދިއުމަކީ ރައްޔިތުންނަށް އޭގެ ގެއްލުން އެކި ސިފަސިފައިގައި ފޯރާނެ ކަމެއް ކަމަށް އިދިކޮޅު ޕާޓީތަކުން ވަނީ ތުހުމަތު ކޮށްފަ އެވެ.

އޭގެއިތުރުން ރާއްޖެއަށް ލިބިދޭ ކަނޑުގެ ސަރަހައްދު ހިމާޔަތްކުރުމަށް ވެސް ބަންޑާރަނައިބު ވަކާލާތު ކުރައްވާފައި ނުވާކަމަށާ، ވަކިން ޚާއްސަކޮށް އިޓްލޮސްގައި މައްސަލަ ކުރިއަށް ދިޔައިރު، ދިވެހި ދައުލަތުގެ ފަރާތުން އެއްވެސް ކަމަކަށް އިއުތިރާޒު ކޮށްފައި ނުވާކަމަށާއި، އިކުއިޑެިސްޓެންސް އުސޫލުން ބައިކުރުން ނޫން ގޮތަކަށް ވަކާލާތުކޮށްފައި ނުވާކަންވެސް ފާހަގަކުރެވޭކަމަށް މަޖިލީހަށް މައްސަލަ ހުށަހެޅި ޕާޓީތަކުން ބުނެއެވެ.

މި މައްސަލައަށް މިއަދު މަޖިލީހަށް ހާޒިރު ވެގެން ނުވަތަ، ލިޔުމުން ޖަވާބުދާރީވުމަށް ރިފްޢަތު އަށް މަޖިލީހުން އަންގާފައިވާއިރު، މަޖިލީހުގެ ރިޔާސަތުގައި މިއަދު އިންނެވި މަޖިލީހުގެ ރައީސް މުހައްމަދު ނަޝީދު ވިދާޅުވީ ބަންޑާރަ ނާއިބު އަށް ލިބިގެންވާ އިޚްތިޔާރުގެ ދަށުން އެބޭފުޅާ ނިންމެވީ ލިޔުމުން ޖަވާބު ފޮނުއްވަން ކަމަށެވެ.

އެއާއެކު ބަންޑާރަނައިބު މަޖިލީހަށް ޖަވާބުދާރީވެލައްވަން ޖެހިވަޑައިގަންނަވާ ގޮތާއި ގުޅިގެން މެމްބަރުންގެ މެދުގައި ޚިޔާލުތަފާތުވެ ޙައްލު ނުކުރެވުމުން ރިޔާސަތުން ވަނީ އެ މައްސަލަ މަޑުޖައްސާ ސުޕްރިމް ކޯޓުގެ ލަފާ ހޯދައިގެން ކުރިއަށް ގެންދިއުމަށް ނިންމާފައެވެ.