"ފުލުހުންނާއި ސިފައިން އަނިޔާކުރުމުން އިހްތިޖާޖުގެ ބައިވެރިންނަށް ނަފްސާނީ އަނިޔާ ލިބުނު"

އިއްޔެ ޏ.ފުވައްމުލަކަށް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު ވަޑައިގެންނެވުމުން، އެމަނިކުފާނާ ދެކޮޅަށް އިހްތިޖާޖު ކުރި އިދިކޮޅުު ކޯލިޝަންގެ މީހުން ފަހާ ވަލުތެރެއަށް ސިފައިންނާއި ފުލުހުން ވަދެ އަނިޔާކޮށްފައިވާ ކަމަށާ އޭގެ ސަބަބުން އެތައް ބަޔަކަށް ނަފްސާނީ ގޮތުންނާއި ޖިސްމާނީގޮތުން އަނިޔާ ލިބިފައިވާ ކަމަށް އިދިކޮޅުުން ބުނެފިއެވެ.

އިއްޔެ ފުވައްމުލަކުގައި ކުރިއަށް ދިޔަ އިހްތިޖާޖު ގެ ތެރެއިން  ހައްޔަރު ކުރި އިދިކޮޅުު ކޯލިޝަންގެ 3 މެމްބަރުން  ދޫކޮށްލުމަށް ގޮވާލައި އިދިކޮޅުުން ނެރުނު ބަޔާނުގައި ބުނީ، ރައީސް އިބްރާހީމް މުޙައްމަދު ސޯލިހު ފުވައްމުލަކަށް ކުރެއްވި ދަތުރުފުޅާ ދިމާކޮށް އިދިކޮޅު ރިޔާސީ ކެންޑިޑޭޓް ރައީސް ޔާމީން ޢަބްދުލްޤައްޔޫމް މިނިވަންކުރުމަށް ގޮވާލާ ކުރަމުންދިޔަ ސުލްޙަވެރި އިހްތިޖާޖުގެ ތެރެއިން އެ ކޯލިޝަންގެ ފުވައްމުލަކު އުތުރުދާއިރާގެ ރައީސް މުޙައްމަދު ޠާރިގް އަހްމަދާއި، ދަޑިމަގު ސްޓިއަރިން ކޮމިޓީގެ ރައީސް މުޙައްމަދު ޝަރަފުއްދީނާއި އެ ކޯލިޝަންގެ މެމްބަރު އުމުރުން 70އަހަރުގެ ހަބީބް އިބްރާހީމް ވަރަށް އަނިޔާވެރިކަމާއެކު ހައްޔަރުކޮށްފައިވާ ކަމަށެވެ.

އިދިކޮޅުން ބުނީ، އިހްތިޖާޖު ރޫޅާލުމަށް ބައިވެރިންގެ ލޮލަށް އަމާޒުކޮށް ޕެޕަރސްޕްރޭ ޖަހާ ހާލަތާ ނުބައްދަލު ބާރުގެ ބޭނުން ފުލުހުންނާއި ސިފައިން ބޭނުންކޮށްފައިވާ ކަމަށެވެ. އަދި އެކަން އެކޯލިޝަނުން ވަނީ ކުށްވެރިކޮށްފައެވެ.

"އަދި އެއްވެސް ނުރައްކަލެއް ނެތް ހާލަތުގައި ރައްޔިތުން ފަހާ ވަލުތެރެއަށް ސިފައިންނާއި ފުލުހުން ވަދެ އަނިޔާކުރުމުގެ ސަބަބުން އެތައް ބަޔަކަށް ނަފްސާނީ ގޮތުންނާއި ޖިސްމާނީގޮތުން އަނިޔާ ލިބިފައިވެއެވެ. އަދި އިހްތިޖާޖުގައި އަޑު އުފުލުމަށް ބޭނުންކުރި ޕިކަޕްވެސްވަނީ ފުލުހުންގެ ބެލުމުގެ ދަށަށް ގެންގޮސްފަ އެވެ. މިއީ ރައްޔިތުންގެ ތާއީދު ނެތުމުން ސަރުކާރުގެ އޯޑަރަށް ކުރި އަނިޔާތަކެވެ." އިދިކޮޅުގެ ބަޔާނުގައި ބުނެފައި ވެއެވެ.

މިއާއެކު އިދިކޮޅުުން ބުނީ އިހްތިޖާޖު ގެ ބައިވެރިން، ބާރުގެ ބޭނުންކޮށްގެން ހައްޔަރުކޮށް އަނިޔާކުރުމަކީ ޑިމޮކްރެސީގެ އަސާސްތަކާއި ޚިލާފު ފިނޑި ޢަމަލެއް ކަމަށެވެ. އަދި ރައީސް ޞާލިހު ވަޑައިގަންނަވާ ކޮންމެ ރަށަކަށް ފުލުހުންނާއި ސިފައިން ބަރު ހަތިޔާރާއެކު ފޮނުވާ މިވެރިކަމާއި ދެކޮޅަށް އަޑުއުފުލަމުންދާ ރައްޔިތުންނަށް ބިރުދައްކާ އަނިޔާ ކުރުން ހުއްޓާލުމަށްވެސް އިދިކޮޅުުން ވަނީ ގޮވާލާފައެވެ.