ފުވައްމުލަކު އެއަރޕޯޓު ކުރިއަށް އޮތް ތަނުގައި ބޮޑުކޮށްދޭނަން: ރައީސް ޞާލިޙް
ފުވައްމުލަކު އެއަރޕޯޓު ކުރިއަށް އޮތް ތަނުގައި ބޮޑުކޮށްދެއްވާނެ ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެން ވިދާޅުވީ ރޭ ފުވައްމުލަކުގައި ބޭއްވި ރިޔާސީ ކެމްޕޭނުގެ ޖަލްސާގައި ވާހަކަފުޅުދައްކަވަމުންނެވެ.
ރައީސް ޞާލިޙް ވިދާޅުވީ ކޮންމެ ސަރުކާރަކުންވެސް ފުވައްމުލަކަށް ކަންތައްތަކެއް ކޮށްދެއްވޭތޯ ބަލައިފައިވާ ކަމަށެވެ. ނަމަވެސް މައްސަލައަކަށްވީ ފަހަރަކު ކަމެއް ކުރަން ކަންކަން މަޑު ކުރުމުން ރަށަށް ބޭނުންވާ ދިރުން ގެނައުން ލަސްވެފައި އޮތުން ކަމަށް ރައީސް ޞާލިޙް ވިދާޅުވިއެވެ.
"ބަނދަރު ކުޑަވެއްޖެ، އެއަރޕޯޓު ކުޑަވެއްޖެ، އިރާދަކުރެއްވިއްޔާ ކުރިއަށް މިއޮތް އަޅުގަނޑުމެންގެ ދައުރެއްގައި މިރަށުގެ އެއަރޕޯޓު އިތުރަށް ބޮޑު ކުރެވެން އޮތްވަރެއް ބަލައި ދިރާސާކޮށް އައިލެންޑް އޭވިއޭޝަންގައި މިހާރު މިގެންގުޅޭ އޭޓީއާރް މަތިންދާބޯޓު ޖެއްސޭ ވަރަށް މިރަށުގެ އެއަރޕޯޓު އަޅުގަނޑުމެން ބޮޑުކޮށްދޭނަން" ރައީސް ޞާލިޙް ވިދާޅުވިއެވެ.
ފުވައްމުލަކުގައި އޮތް ބަނދަރަކީ ޓެކްނިކަލީ އަދި އިންޖިނިއަރީ ގޮތުންވަރަށް ބޮޑަށް ދިރާސާކުރުމަށް ފަހު އަޅާއިފައި އޮތް ބަނދަރެއް ކަމަށް ރައީސް ވިދާޅުވިއެވެ. އަދި ވިސްނުންފުޅަކީ ފުވައްމުލަކުގެ ރައްޔިތުން އެދޭ ފަދައިން ބަނދަރު ބޮޑު ކުރެވެން އޮތް މިންވަރެއް ބަލައި ބަނދަރު ބޮޑު ކުރުން ކަމަށްވެސް ރައީސް ޞާލިޙް ވިދާޅުވިއެވެ.
ރައީސް ޞާލިޙް އިތުރަށް ވިދާޅުވީ އެކަމަށް ބޭނުންވާ ދިރާސާތައް ޕްލޭނިންގް މިނިސްޓަރ އަސްލަމްގެ ލަފާފުޅުގެ ދަށުން ކުރެވެމުންދާ ކަމަށެވެ. އަދި ކުރިއަށް އޮތް ދައުރުގައި ފުވައްމުލަކުގެ ބަނދަރު ބޮޑުވެގެންދާތަން ފެނިގެންދާނެ ކަމަށްވެސް ރައީސް ވިދާޅުވިއެވެ.
ފުވައްމުލަކުގައި ރޭ ބޭއްވުނު ކެމްޕޭނު ޖަލްސާގައި ނައިބުރައީސް ފައިސަލް ނަސީމުވެސް ބައިވެރިވެވަޑައިގެންނެވިއެވެ. މީގެ އިތުރުން ޢަދާލަތުޕާޓީ އާއި އެމްޑީއޭ އިންވެސް ވަނީ ޖަލްސާގައި ބައިވެރިވެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
