ރައީސް ޞާލިހަކީ ނަމާދު ފުރިހަމައަށް ކޮށް، ދަމުނަމާދު ވެސް ކުރައްވާ ބޭފުޅެއް: ސިޔާމް
ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހު އަކީ ފަރުޟު ފަސް ނަމާދުގެ އިތުރުން ދަމު ނަމާދު ވެސް ކުރައްވާ ބޭފުޅެއް ކަމަށް މީދޫ ދާއިރާގެ މެންބަރު އަދި އެމްޑީއޭގެ ލީޑަރު އަހުމަދު ސިޔާމް (ސަން ސިޔާމް) ވިދާޅުވެއްޖެއެވެ.
ރައީސް ޞާލިހުގެ ރިޔާސީ ކެމްޕެއިނަށް ށ. އަތޮޅަށް ކުރައްވަމުންދާ ދަތުރުފުޅުގައި އެ އަތޮޅު ފޮނަދޫ ގައި ބޭއްވި ބައްދަލުވުމުގައި ވާހަކަ ދައްކަވަމުން ސިޔާމް ވިދާޅުވީ، ރައީސް ޞާލިހު އާއި އެކު 20 އަހަރު ވަންދެން ރައްޔިތުންގެ މަޖިލީހުގައި މަސައްކަތް ކުރައްވާފައިވާ ކަމަށެވެ. އަދި އެވީހާ ދުވަހުވެސް އެމަނިކުފާނު ކޯފާވެވަޑައިގެން އިންނެވި ތަން ނުފެންނަ ކަމަށް ސިޔާމް ވިދާޅުވި އެވެ.
އެމަނިކުފާނާއި ދިމާއަށް މީހުން ގޮސް އެއްޗެހި ކީމަވެސް ހެވިލާފައި އިންނަނީ. އަޅުގަނޑު ހިތަށް އަރާ މިއީ ކޮން ކަހަލަ ބޭފުޅެއް ބާވައޭ. އެކަމު މިއަދު ތި ބޭފުޅުންނަށް އެނގޭނެ ކެތްތެރި ކަމަކީ ކިހާ މުހިންމު ކަމެއް ކަމަށް. ހަމަ ފުންމައިގަނެގެން ކަންތައް ތަކެއް ނުވާނެ.
އެމްޑީއޭގެ ލީޑަރު އަހުމަދު ސިޔާމް
ސިޔާމް އިތުރަށް ވިދާޅުވީ އެމްޑީޕީގެ ތެރޭގައި ތިބި "ލާދީނީ ތައްގަނޑު" ޖަހާފައި ތިބި މީހުންތައް އެ ޕާޓީން މިހާރު ގޮސްފައިވާ ކަމަށެވެ. އަދި އެމްޑީޕީގެ ތެރޭގައި ލާދީނީ މީހެއް ނެތް ކަމީ ދިވެހި ރައްޔިތުންވެސް އުފާ ކުރަންޖެހޭ ކަމެއް ކަމަށް ސިޔާމް ވިދާޅުވި އެވެ.
އެގޮތަށް ފާޅުގައި ހަޖޫ ޖަހައި، ރަސޫލާ ޞައްލައްالله ޢަލައިހި ވަސައްލަމް އަށް ޖޯކު ޖަހައި، އަޅުގަނޑުމެންގެ ދީނަށް ޖޯކު ޖަހައި، މުރުތައްދު ވެފައި ހުރި މީހެއް އަޅުގަނޑުމެންގެ ތެރޭގައި ނެތް ކަން އެއީ އަޅުގަނޑުމެން ވަރަށް ބޮޑަށް އުފާކުރަންޖެހޭ ކަމެއް.
އެމްޑީއޭގެ ލީޑަރު އަހުމަދު ސިޔާމް
މިއާއެކު ސިޔާމް ވިދާޅުވީ، ރައީސް ޞާލިހު އަކީ ދީނަށް ޖޯކު ޖަހައި، ދީނާއި ޚިލާފް ވާހަކަ ދައްކަވާ ބޭފުޅެއް ނޫން ކަމަށެވެ.
"ދުވަހަކު އިސްލާމް ދީނާއި ދެކޮޅަށް އެއްޗެކޭ ނުބުނައްވާނެ. ނަމާދު ފުރިހަމައަށް ކުރައްވާނެ. ރޯދަ ހިފައްވާނެ. ދަމު ނަމާދު ވެސް ކުރައްވާ."
އެމްޑީއޭގެ ލީޑަރު އަހުމަދު ސިޔާމް
ސިޔާމް ވިދާޅުވީ، މީހުން ދެކެ ބިރުގަނެ، މީހުންނަށް އަޅާލާނީ ރައީސް ޞާލިހު ފަދަ މާތް الله ދެ ބިރު ގަންނަ ބޭފުޅެއް ކަމަށެވެ. އަދި ދީނަށް ހަޖޫ ޖަހާ ބޭފުޅެއް މީހުން ދެކެ ބިރު ވެސް ނުގަންނާނެ ކަމަށާ، އަދި މީހުންނަށް އޯގާތެރިވެސް ނުވާނެ ކަމަށް އޭނާ ވިދާޅުވި އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
