ފުނަދޫ ރައްޔިތުން ކީ މަރުޙަބާއިން ދޭހަވަނީ ރަށުގެ ތަރައްޤީއަށް ބޭނުންވެފައި ތިބި މިންވަރު: ރައީސް ޞާލިޙް
ފުނަދޫ ރައްޔިތުން ކިޔުއްވި މަރުޙަބާއިން ދޭހަވަނީ ފުނަދޫ ރައްޔިތުން އެރަށުގެ ތަރައްޤީއަށް ބޭނުންވެފައި ތިބި މިންވަރު ކަމަށް ރައީސް އިބްރާހިމް މުޙައްމަދު ޞާލިޙް ވިދާޅުވެއްޖެއެވެ.
ރައީސް ޞާލިޙް މިހެންވިދާޅުވީ އެމަނިކުފާނު ރިޔާސީ އިންތިޚާބަށް ކެމްޕޭނު ކުރެއްވުމަށް ށ ފުނަދޫ އަށް މިއަދު ކުރެއްވި ޒިޔާރަތުގައި އެރަށުގެ ރައްޔިތުންނާއި ބައްދަލުކުރެއްވުމަށް ބޭއްވިޖަލްސާގައެވެ.
ޖަލްސާގައި ވާހަކަފުޅު ދައްކަވަމުން ރައީސް ޞާލިޙް ވިދާޅުވީ މިއަދު ފުނަދޫއިން ދައްކުވައިދެނީ ތަރައްޤީ ބޭނުންވެފައިތިބި މިންވަރުކަމަށާއި، ތަރައްޤީ ގެނެވޭނެ ބަޔަކާއި އެކު ފުނަދޫ ރައްޔިތުން ތިބިކަން ކަމަށެވެ. އަދި އެކަމަށްޓަކައި ފުނަދޫގެ ރައްޔިތުންނަށް ޝުކުރު އަދާ ކުރައްވާ ކަމަށް ވެސް ރައީސް ޞާލިޙް ވިދާޅުވިއެވެ.
2018ގެ އިންތިޚާބަށްފަހު ސަރުކާރުން މަސައްކަތް ފަށައިގަތީ ރާއްޖޭގެ ރައްޔިތުނަށް ބޭނުންވެފައި ހުރި އަސާސީ ޚިދްމަތްތައް ތަފާތުކުރުމެއް ނެތި ފޯރުކޮށްދިނުމަށް ކަމަށް ރައީސް ވިދާޅުވިއެވެ.
މީގެ އިތުރުން ރައީސް ވިދާޅުވީ ސަރުކާރުން މަސައްކަތް ކުރީ އެރައްޔިތަކު ދިރިއުޅޭ ރަށެއް ތަފާތުކުރުމެއް ނެތި، އެރައްޔިތެއްގެ ސިޔާސީ ފިކުރު އެއީ މައްސަލައެއްކަމަށް ނުބަލައި، ރައްޔިތުންނަށް އެޚިދްމަތްތައް ފޯރުކޮށްދިނުމަށް ކަމަށެވެ. އަދި ށ އަތޮޅު ފުނަދޫ އިން ގައިމުވެސް އެކަން ފެނިގެންދާނެ ކަމަށް ރައީސް ޞާލިޙް ވިދާޅުވިއެވެ.
"ފުނަދޫ އަކީ މީގެ ކުރިން އޭރު އޮތް ސަރުކާރަށް ވަރަށްބޮޑަށް ތާއީދު ކުރި ރައްޔިތެއް އުޅުނު ރަށެއް، އޭގެން އަޅުގަނޑަށް ދޭހަވަނީ އަބަދުވެސް ފުނަދޫގެ ރައްޔިތުންނަކީ ރަށުގެ ތަރައްޤީއަށްޓަކައި އޭރެއްގެ އޮންނަ ސަރުކާރާކާއި އެކު ކުރިއަށްދާން އޮތް ބައެއްކަން"
ރައީސް އިބްރާހިމް މުޙައްމަދު ޞާލިޙް
ރައީސް ޞާލިޙް ވިދާޅުވީ ތަފާތުކުރުމެއް ނެތި ފުނަދުއަށް ވީ ވަޢުދުތައްވެސް ފުއްދަވަމުންގެންދަވާ ކަމަށެވެ.
އެގޮތުން އަލަށް އާބާދުވެފައި އޮތް ސަރަހައްދުގައި ނަރުދަމާގެ ނިޒާމު ގުޅައިދިނުމާއި، ފުނަދޫގައި ނުނިމި ހުރި މިސްކިތް އަޅައިދިނުމާއި،ފެނުގެ ޚިދްމަތް ފޯރުކޮށްދިނުމާއި، ސްކޫލްގެ ދަތިކަންކަން ރަނގަޅު ކޮށްދީ 15 ކްލާސްރޫމް އިތުރުކުރުމާއި ހޮސްޕިޓަލުގެ ފެންވަރު ރަނގަޅުކުރުމަށް އޭރު ފުނަދޫގެ ރައްޔިތުން އެދުނު ކަމަށް ރައީސް ޞާލިޙް ވިދާޅުވިއެވެ.
މީގެ ތެރެއިން ގިނަ މަސައްކަތް ހުރީ ނިމި ފައި ކަމަށާއި އެއްބައި ކަންކަން ފެށިފައި ހުރިކަމަށާއި އަދި ބައެއް ކަންކަން ހުރީ ކޮންޓްރެކްޓް ކުރެވިފައި ކަމަށް ރައީސް ވިދާޅުވިއެވެ.
ރައީސް ޞާލިޙް ވިދާޅުވީ ކުރިއަށް އޮތް ދައުރުގައި ފުނަދޫގެ ރައްޔިތުން އެދިލެއްވި ހުރިހާ ކަމެއް ނިންމަވައި ދެއްވާނެ ކަމަށެވެ.
ރިޔާސީ އިންތިޚާބުގެ ކެމްޕޭނަށް ށ ފުނަދޫއަށް މިކުރެއްވެވިދަތުރު ފުޅުގައި އެމަނިކުފާނުގެ އަރިހުގައި ދައުލަތުގެ ބައެއް ވަޒީރުންނާއި ކޯލިޝަންގެ މެމްބަރުން ބައިވެރިވެވަޑައިގަންނަވައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
