ސަރަހައްދު ދޫކޮށްލުމަކީ އަމިއްލަ އެދުމަށް ގައުމަށްވީ އެންމެ ބޮޑު ޚިޔާނާތް: ޑރ ޖަމީލު
ފޯޅަވަހި ސަރަހައްދުން ދިވެހިރާއްޖެއަށް ބޮޑު ބައެއް ގެއްލުމުގެ ފުރުސަތު ފަހިވާ ގޮތަށް ސަރުކާރުން މޮރިޝަސް އާއި އެއްކޮޅަށް ޖެހުނު ޖެހުމަކީ އަމިއްލަ އެދުމަށް ގައުމަށް ވީ އެންމެ ބޮޑު ޚިޔާނާތްކަމަށް ކުރީގެ ނައިބުރައީސް ޑރ މުހައްމަދު ޖަމީލު އަހުމަދު ވިދާޅުވެއްޖެއެވެ.
ޑރ ޖަމީލު މިފަދައިން ވިދާޅުވެފައިވަނީ ފޯލަވަހި މައްސަލައާއި ގުޅިގެން ސަރުކާރަށް ގިނަ ފާޑުކިޔުންތަކެއް އަމާޒުވެފައި ވަނިކޮށް ކުރެއްވި ޓްވީޓެއްގައެވެ.
ޑރ ޖަމީލު ވިދާޅުވީ ސަރަހައްދުތައް ހިމާޔަތްކުރުމަކީ ވެރިކަމުގައި ހުންނަވާ ފަރާތެއްގެ އެންމެ އަސާސީ ޒިންމާކަމަށެވެ.
އެހެން ނަމަވެސް އެ ޒިންމާ އަދާކުރުމުގައި ސަރުކާރުގެ ވެރިން ނުކުޅެދިފައިވާއިރު މިހާތަނަށް ފޯޅަވަހި ސަރަހައްދު ދޫކޮށްލަން ޖެހުނު ގާނޫނީ އެއްވެސް ހުއްޖަތެއް ސަރުކާރަށް ދެއްކިފައި ނުވާކަމަށް ޑރ ޖަމީލު ވިދާޅުވިއެވެ.
އެއާއެކު ޑރ ޖަމީލު ވިދާޅުވީ، ރާއްޖޭގެ ސަރަހައްދުން ބައެއް ގެއްލޭގޮތަށް ނިންމުމަކީ ގައުމަށް ވީ އެންމެ ބޮޑު ޚިޔާނާތްކަމަށެވެ.
އެމަނިކުފާނު މިފަދައިން ވިދާޅުވެފައިވާއިރު، ފޯޅަވަހި މައްސަލައިގައި ސަރުކާރުގެ ވިސްނުން ބަދަލުކޮށް މޮރިޝަސްއާއި އެއްކޮޅަށް އެރީ އިންޑިއާގެ ނުފޫޒުންކަމަށް އިދިކޮޅު ފަރާތްތައް ގެންދަނީ ތުހުމަތުކުރަމުންނެވެ.
އަދި ރައްޔިތުންގެ މަޖިލީހާއިވެސް އެއްވެސް މަޝްވަރާއެއް ނުކޮށް ކުއްލި ގޮތަކަށް އެ ނިންމުން ސަރުކާރުން ނިންމީ ސަރުކާރުގެ ވެރިންނަށް މަންފާ ލިބޭ ބޮޑު ޑީލްއެއްގެ ތެރެއިންކަމަށްވެސް އިދިކޮޅުން ގެންދަނީ ތުހުމަތުކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
