ވޭޕް ވިއްކާ މީހުންނަށް އެޗްޕީއޭ އިން އިންޒާރުދީފި
ވޭޕް އިޝްތިހާރު ކޮށްގެން އެ ވިއްކާ މީހުންނަށް ހެލްތު ޕްރޮޓެކްޝަން އޮތޯރިޓީ (އެޗްޕީއޭ) އިން އިންޒާރުދީފިއެވެ.
އެޗްޕީއޭ އިން މިއަދު ނެރުނު އިއުލާނެއްގައި ބުނީ، ދުންފަތުގެ އިސްތިއުމާލް ކުރުން އިޝްތިހާރުކޮށް ޕްރޮމޯޓު ކުރުމަކީ ދުންފަތް ކޮންޓްރޯލް ކުރުމާބެހޭ ގާނޫނުގެ ދަށުން ކުށެއް ކަމަށެވެ. ނަމަވެސް ދުންފަތުގެ ބާވަތްތައް ތަފާތު ގޮތްގޮތަށް ވަކިން ހާއްސަކޮށް މީސްމީޑިއާގެ ވަސީލަތްތައް މެދުވެރިކޮށް ފުޅާ ދާއިރާއެއްގައި އިޝްތިހާރު ކުރަމުންދާ ކަމަށްވެސް އެ އިއުލާނުގައި ބުނެފައިވެއެވެ.
އަދި ބައެއް އިޝްތިހާރު ދުންފަތުގެ ބާވަތްތަކުގައި ދުންފަތް ނުހިމެނޭކަމަށާއި އަދި ދުންފަތުގެ އެއް ބާވަތެއް އަނެއް ބާވަތަށްވުރެ ރައްކާތެރިކަމާއި އޭގެން ލިބޭ ސިއްހީ ގެއްލުން ކުޑަކަން ނުވަތަ ގެއްލުން ނުވާކަމަށް ބުނެ ހަގީގަތާއި ހިލާފު މައުލޫމާތު ހިމަނާފައިވާ ކަމަށް ވެސް އެޗްޕީއޭ އިން ބުނެފައި ވެއެވެ.
ވުމާއެކު އެޗްޕީއޭއިން ވަނީ ދުންފަތުގެ އިސްތިއުމާލު ކުރާ ފަރާތްތަކާއި ވިޔަފާރިކުރާ ފަރާތްތަކާއި ގާނޫނު ތަންފީޒު ކުރުމަށް ހަވާލުވެފައިވާ ފަރާތްތަކަށް ގާނޫނާއި އެއްގޮތަށް އަމަލު ކުރުމަށް ބާރު އެޅުމުގެ ގޮތުން ދުންފަތް ކޮށްޓްރޯލް ކުރުމާ ބެހޭ ގާނޫނޫގައި ހިމެނޭ ކަންތައްތައް ހަދާންކޮށްދީފަ އެވެ.
އެގޮތުން ވޭޕް، ޝީޝާ، ހީޓެޑް ޓޮބޭކޯ އަދި އީސިނގިރޭޓަކީ ވެސް ދުންފަތުގެ ބާވަތްތައް ހިމެނެނީ ދުންފަތުގެ ތެރޭގައި ކަމަށާ އެބާވަތްތައް އިސްތިހާރު ކުރުމަކީ ގާނޫނީ ކުށެއް ކަމަށް އެ އިއުލާނުގައި ވެއެވެ.
މިއާއެކު ދުންފަތް ކޮންޓްރޯލް ކުރުމުގެ ގާނޫނަށް އަހުލުވެރިވާން ބޭނުންވާނަމަ އެޗްޕީއޭއަށް ފޯނު ކުރުމަށް ނުވަތަ އީމެއިލް ކުރުމަށް އެޗްޕީއޭގެ އިއުލާނުގައި އެދިފައި ވެއެވެ.
ދުންފަތް ކޮންޓްރޯލް ކުރުމުގެ ގާނޫނު ބުނާ ގޮތުން އެގާނޫނާއި ހިލާފުވާތް ފަރާތްތައް -/500 ރުފިޔާ އާއި -/100000 ރުފިޔާ އާއި ދެމެދުގެ އަދަދަކުން ޖޫރިމަނާ ކުރެވިދާނެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
