އުދައްޔު މަރާލިކަމަށް ސާބިތުވި ކުއްޖާއަށް 25 އަހަރުގެ ޙުކުމެއް!

މިދިޔަ އަހަރުގެ ފެބުރުއަރީ މަހު، ގއ.މާމެންދޫގައި ތޫނު ހަތިޔާރު ބޭނުންކޮށްގެން އެރަށު ލީލީ އޮފް ދިވެލީ ޢުމުރުން 17 އަހަރުގެ އަޙްމަދު އުދައްޔު މަރާލި މައްސަލަ، ސާބިތުވެފައިވާ ޢުމުރުން 18 އަހަރުން ދަށުގެ ކުއްޖާ 25 އަހަރާއި 5 މަސްދުވަހަށް ބަންދުކުރުމަށް ޖުވަނައިލް ކޯޓުން ހުކުމް ކޮށްފިއެވެ.

ފެބްރުވަރީ 2021 ދުވަހު ގއ. މާމެންދޫގައި، ގްރޫޕަކުން ގޮސް ތޫނު އެއްޗެހިން ހަމަލާދިނުމުގެ ސަބަބުން ލިބުނު އަނިޔާތަކަކަށް ފަރުވާދެމުން ދަނިކޮށް އުދައްޔު މަރުވި މައްސަލައިގައި، ޢުމުރުން 18 އަހަރުން ދަށުގެ ކުއްޖެއްގެ މައްޗަށް ކޮށްފައިވާ ދައުވާ އަކީ، ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާއާއި، މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާއެވެ.

އެކަމާއި ގުޅިގެން މިއަދު ޕީޖީ އޮފީހުން ބުނީ، 08 ފެބްރުވަރީ 2021 ދުވަހު ގއ. މާމެންދޫގައި ހިނގި މާރާމާރީގައި ލިބުނު އަނިޔާތަކަކަށް ފަރުވާދެމުން ދަނިކޮށް ޢުމުރުން 17 އަހަރުގެ ކުއްޖަކު މަރުވި މައްސަލައިގައި، ޢުމުރުން 18 އަހަރުން ދަށުގެ ކުއްޖެއްގެ މައްޗަށް ޖުވެނައިލް ކޯޓަށް ހުށަހެޅި ދަޢުވާތައް ސާބިތުވާކަމަށް 14 ސެޕްޓެންބަރު 22 ގައި ކަނޑައެޅުމަށްފަހު، މިއަދު (31 އޮކްޓޫބަރު 2022) ގައި ކުއްޖާގެ މައްޗަށް އަދަބު ކަނޑައަޅަލާފައިވާ ކަމަށެވެ.

‎އެގޮތުން، ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާއާ ގުޅިގެން 18 (އަށާރަ) އަހަރާއި 09 (ނުވައެއް) މަހަަށް ކުޑަކުދިން ބަންދުކުރާ މަރުކަޒެއްގައި ބަންދުކުރުމަށާއި، މަރުގެ ދިޔައިގެ ގޮތުގައި މިއަދު (31 އޮކްޓޫބަރު 2022) އިން ފެށިގެން 01 (އެކެއް) އަހަރުތެރޭގައި 01 (އެކެއް) މިލިއަން ދިވެހި ރުފިޔާ ނިޔާވި ކުއްޖާގެ ވާރިސުންނަށް ދިނުމަށާއި، ކައްފާރާގެ ގޮތުގައި ވިދިވިދިގެން 02 (ދޭއް) މަސް ދުވަހު ރޯދަހިފުމަށް ކުށް ސާބިތުވި ކުއްޖާގެ މައްޗަށް ހުކުމް ކޮށްފައިވާ ކަމަށް ޕީޖީ އޮފީހުން ބުންޏެވެ.

‎އަދި މީގެ އިތުރުން މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާއާ ގުޅިގެން 06 (ހައެއް) އަހަރާއި 08 (އަށެއް) މަސްދުވަހަށް ކުޑަކުދިން ބަންދުކުރާ މަރުކަޒެއްގައި ބަންދުކުރުމަށް ވެސް ހުކުމް ކޮށްފައިވާ ކަމަށާ، އެހެންކަމުން ޖުމްލަ 25 އަހަރާއި 5 މަސްދުވަހަށް ބަންދުކުރުމަށް ޖުވެނައިލް ކޯޓުން ނިންމާފައިވާ ކަމަށެވެ.

‎މިއާއެކު ޕީޖީ އޮފީހުން ބުނީ، މި މައްސަލައިގައި އަޙްމަދު ޝަމީމްއާއި، ޝަރަފު ރަޝީދާއި، މުޙައްމަދު މާޒިންގެ މައްޗަށް ކްރިމިނަލް ކޯޓަށް ހުށަހެޅި ތޫނު އެއްޗެއް ބޭނުންކޮށްގެން ޤަޞްދުގައި މީހަކު މަރާލުމުގައި ބައިވެރިވުމުގެ ކުށުގެ ދަޢުވާއާއި، މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ އަޑުއެހުންތައް ކްރިމިނަލް ކޯޓުގައި ކުރިއަށްދާ ކަމަށާ މި ތިން މީހުންގެ ބައި އޮތީ ހެކިބަސް ނެގުމުގެ މަރުޙަލާގައި ކަމަށެވެ.