އެމްޓީސީސީ ހިއްސާގެ ފައިދާ މާދަމައިން ފެށިގެން ދޫކުރަނީ

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ، އެމްޓީސީސީގެ މިދިޔަ އަހަރުގެ ވިޔަފާރީގެ ފައިދާއިން ހިއްސާދާރުންނަށް ބެހުމަށް ނިންމި ފައިދާ، މާދަމައިން ފެށިގެން ދޫކުރަމުންދާނޭކަމަށް އެކުންފުނިން ބުނެފިއެވެ.

އެމްޓީސީސީގެ މިދިޔަ އަހަރުގެ އަހަރީ އާއްމު ޖަލްސާ ބާއްވާފައިވަނީ، މިދިޔަ ބްރާސްފަތިދުވަހުގެ ރެއެވެ. މި ޖަލްސާ ބައްވާފައިވަނީ މޯލްޑިވްސް ސެކިއުރެޓީޒް ޑިޕޮސިޓަރީގެ އޮންލައިން ވެބް އެޕްލިކެޗަން، ފަހިވޯޓު މެދުވެރިކޮށެވެ. މި ޖަލްސާގައި 59 ހިއްސާދާރުން ބައިވެރިވިއިރު، ޕްރޮކްސީ މެދުވެރިކޮށް 14 ހިއްސާދާރުން ތަމްސީލްކުރިއެވެ. އެގޮތުން މި ޖަލްސާގައި މުޅިއެކު 69.75 އިންސައްތަ ހިއްސާދާރުން ބައިވެރިވިއެވެ. އެއީ 5،602،272 ހިއްސާއެވެ.

މި ޖަލްސާގައި އެމްޓީސީސީގެ މިދިޔަ އަހަރުގެ ވިޔަފާރީގެ ފައިދާއިން ހިއްސާއަކަށް މޫނުމަތީ އަގުގެ ފަސް ރުފިޔާގެ ކޮންމެ ހިއްސާއަކަށް 3 ރުފިޔާ ބެހުމަށް ވަނީ ފާސްކޮށްފައެވެ.

އެމްޓީސީސީން ބުނީ ހިއްސާގެ ފައިދާގެ ގޮތުގައި ޖުމްލަ 24.1 މިލިއަން ރުފިޔާ ބެހުމަށް ނިންމާފައިވާކަމަށެވެ. އެގޮތުން ހިއްސާގެ ފައިސާ ނޮވެމްބަރުމަހުގެ އެއްވަނަ ދުވަހުން ފެށިގެން ދޫކުރަމުންދާނޭކަމަށެވެ. ޙިއްޞާގެ ފައިދާ ނެގުމަށް އެމްޓީސީސީގެ ބޭންކް އެކައުންޓް ރަޖިސްޓްރީ ކޮށްފައިނުވާ އަދި އެކައުންޓަށް ބަދަލު އައިސްފައިވާ ޙިއްޞާދާރުން އެ ކުންފުނީގެ ވެބްސައިޓުގައިވާ ޙިއްޞާދާރުންގެ ޕޯޓަލްގައި އެކައުންޓު ނަންބަރު އަޕްޑޭޓްކުރުމަށް ނުވަތަ "ޙިއްޞާދާރުން ޚިދުމަތްތަކަށް އެދޭ ފޯމު" މެދުވެރިކޮށް ހުށަހެޅުމުން އެފަރާތްތަކުގެ ޙިއްޞާގެ ފައިދާ ޖަމާކޮށްދޭނެ ކަމަށް އެމްޓީސީސީން ބުންޏެވެ.

އެމްޓީސީސީއަކީ ދިވެހި ރައްޔިތުންނަށް އެންމެ ފުރަތަމަ ހިއްސާވިއްކަން ފެށި ކުންފުންޏެވެ.