ޕީޖީ ޢައްބާސް ޝަރީފް ޗައިނާއަށް; މުުހިންމު އެއްބަސްވުމެއްގައި ސޮއިކުރައްވާނެ

ޗައިނާގެ ސުޕްރީމް ޕީޕަލްސް ޕްރޮކިއުރެޓޮރިއެޓްގެ ދައުވަތަކަށް ޕްރޮސެކިއުޓަރ ޖެނެރަލް (ރިޓަޔަޑް) އުސްތާޛު ޢައްބާސް ޝަރީފް މިއަދު ވަފުދަކާ އެކު ޗައިނާގެ ވެރިރަށް ބެއިޖިންގަށް ވަޑައިގެންފިއެވެ.

ޕީޖީ ޢައްބާސް ޝަރީފާއި ވަފުދުގެ ބޭފުޅުންނަށް ބެއިޖިންގް އެއާޕޯޓުން މަރުޙަބާ ދެންނެވީ ޗައިނާގެ ޑެޕިއުޓީ ޕްރޮސެކިއުޓަރ ޖެނެރަލް ޝީ ވެއިޒޮންގެވެ.

ޕީޖީ އޮފީހުން ބުނީ، މި ދަތުރުފުޅުގައި ޗައިނާގެ ޕްރޮސެކިއުޓަރ ޖެނެރަލް ޔިންގް ޔޮންގާ ޕީޖީ ޢައްބާސް ޝަރީފް ބައްދަލުކުރައްވައި ޗައިނާގެ ސުޕްރީމް ޕީޕަލްސް ޕްރޮކިއުރެޓޮރިއެޓާއި ދިވެހިރާއްޖޭގެ ޕްރޮސެކިއުޓަރ ޖެނެރަލްގެ އޮފީހާ ދެމެދު އެއްބާރުލުމުގެ އެއްބަސްވުމެއްގައި ސޮއިކުރެއްވުމަށް ހަމަޖެހިފައިވާ ކަމަށެވެ.

މީގެ އިތުރުން ބެއިޖިންގް މުނިސިޕަލް ޕީޕަލްސް ޕްރޮކިއުރެޓޮރިއެޓްގެ ޗީފް ޕްރޮސެކިއުޓަރ ޒޫ ޔާޕިންގާއި ޝާންޒީ ޕްރޮވިންޝަލް ޕީޕަލްސް ޕްރޮކިއުރެޓޮރިއެޓްގެ ޗީފް ޕްރޮސެކިއުޓަރ ވެންގް ޒޫގުއާންގާ ވެސް ޕީޖީ ބައްދަލުކުރައްވާ ގޮތަށް ރޭވިފައިވާ ކަމަށްވެސް ބުންޏެވެ.

ޕީޖީގެ ވަފުދުގައި ހިމެނިވަޑައިގަންނަވަނީ ޑެޕިއުޓީ ޕްރޮސެކިއުޓަރ ޖެނެރަލް މަޙުމޫދު ސަލީމާއި، ޑެޕިއުޓީ ޕްރޮސެކިއުޓަރ ޖެނެރަލް ޢާއިޝަތު މުޙައްމަދާއި، ޑައިރެކްޓަރ ޖެނެރަލް އާމިނަތު ވަޙީދާއާއި، ޑައިރެކްޓަރ މީޑިއާ އެންޑް ޕަބްލިކް ޕްރޮސެކިއުޓަރ އަޙުމަދު ޝަފީޢުއާއި، ޑައިރެކްޓަރ އިވެންޓްސް އެންޑް ޕަބްލިކް ޕްރޮސެކިއުޓަރ ސުލްޠޯނާ އާދަމެވެ.

ޕީޖީ ޢައްބާސް ޝަރީފްގެ ރަސްމީ ދަތުރުފުޅު ނިމުމަކަށް އަންނާނީ 18 ސެޕްޓެމްބަރު 2026 ގައެވެ.