މަޖިލިސް އިންތިހާބު 2024: މުއްދަތު ހަމަވިއިރު މާލީ ބަޔާން ހުށަނާޅާ 182 ކެންޑިޑޭޓުން

ރައްޔިތުންގެ މަޖިލީހުގެ އިންތިހާބުގައި ވާދަކުރި 368 ކެންޑިޑޭޓުންގެ ތެރެއިން ރޭގެ ނިޔަލަށް މާލީ ބަޔާން ހުށަހެޅީ 186 ކެންޑިޑޭޓުން ކަމަށް އިލެކްޝަންސް ކޮމިޝަން (އީސީ) އިން ބުނެފި އެވެ.

މާލީ ބަޔާން ހުށަހަޅަން، ގާނޫނުގައިވާ ގޮތުގެ މަތިން އިލެކްޝަންސުން ދިން މުއްދަތު ހަމަވީ ރޭ މެންދަމު 12 ގެ ނިޔަލަށެވެ.

އެ މުއްދަތު ހަމަވިއިރު މާލީ ބަޔާން ހުށަހަޅާފައިވަނީ އަމިއްލަ ގޮތުން ވާދަކުރެއްވި 59 ކެންޑިޑޭޓުންނާއި ޕާޓީތަކުން ވާދަކުރި 127 ކެންޑިޑޭޓުން ކަމަށް އީސީން މައުލޫމާތުދެއެވެ. އެހެންކަމުން އަދިވެސް މާލީ ބަޔާން ހުށަނާޅާ 182 ކެންޑިޑޭޓުން އެބަ ތިއްބެވެ.

މަޖިލިސް އިންތިހާބުގައި ވާދަކޮށް ނުހޮވުނު ނަމަވެސް އިންތިޚާބުގައި ވާދަކުރާ ހުރިހާ ކެނއޑިޑޭޓުން މާލީ ބަޔާން ހުށަހަޅަން ޖެހޭއިރު، އީސީން ދީފައިވާ މުއްދަތުގައި މާލީ ބަޔާން ހުށަހަޅާފައި ނުވާނަމަ ނުވަތަ މާލީ ބަޔާނުގައި ދޮގު މައުލޫމާތު ހިމަނާފައިވާނަމަ އެއް އަހަރު ދުވަހުގެ ޖަލު ހުކުމެއް ނުވަތަ 72،000 ރުފިޔާގެ ޖޫރިމަނާއެއް އަންނާނެ އެވެ.

މާލީ ބަޔާނުގައި ހިމަނެން ޖެހޭ ކަންކަން؛

* އިންތިހާބާ ގުޅިގެން ކެންޑިޑޭޓު ކޮށްފައިވާ ހަރަދުތަކުގެ ތަފުސީލު

* އިންތިހާބަށް ހަރަދު ކުރުމަށް ފައިސާ ހޯދި ގޮތުގެ ތަފުސީލު

* ފައިސާއާއި ތަކެތި ދިން ފަރާތްތަކާއި ދިން މިންވަރުގެ ތަފުސީލު

* ބޭންކު އެކައުންޓުން ކޮށްފައިވާ ހުރިހާ މުއާމަލާތެއް އެނގޭނެ ބޭންކު އެކައުންޓް ސްޓޭޓްމަންޓް

* ސައްހަ މައުލޫމާތުކަން އަންގައިދޭން ފައިސާގެ ރަސީދު، އިންވޮއިސް، ބިލުގެ ކޮޕީ

އިންތިހާބުގައި ވާދަކުރާ ކެންޑިޑޭޓުންގެ މާލީ ބަޔާން ހުށަނާޅާ މައްސަލާގައި ފިޔަވަޅު ނާޅާނެ ކަމަށް ބުނެ އާއްމުން ނުރުހުން ފާޅުކުރަމުން ދަނިކޮށް އިލެކްޝަންސް ކޮމިޝަންގެ ރައީސް ފުއާދު ތައުފީގު އިއްޔެ އެކްސްގައި ކުރެއްވި ޕޯސްޓެއްގައި ވަނީ ފިޔަވަޅު އަޅުއްވާނެ ކަމުގެ ޔަގީންކަން ދެއްވާފައެވެ.

“ފިޔަވަޅު އަޅަން ގަސްތުކުރަން. ކަން ދިމާވާގޮތުން ފިޔަވަޅު ނޭޅުނަސް ތި ވިސްނުން ބަދަލުކޮށްލަދެއްވުން އެދެން” މާލީ ބަޔާން ހުށަނޭޅިޔަސް ފިޔަވަޅު ނާޅާނެ ކަމަށްބުނެ މީހަކު ކުރި ޕޯސްޓެއްގައި ބުނެފައިވެއެވެ.

މިދިޔަ އަހަރު ބޭއްވި ރިޔާސީ އިންތިހާބުގައި ވާދަކުރި އަށް ކެންޑިޑޭޓުންގެ ތެރެއިން ފަސް ކެންޑިޑޭޓަކު ވެސް މާލީ ބަޔާން ފުރިހަމަ ނުވާ މައްސަލާގައި ޖޫރިމަނާކޮށްފައިވެ އެވެ. އެއިން ކޮންމެ ކެންޑިޑޭޓަކު 20،000ރ. އިން ޖޫރިމަނާކޮށް ކޮންމެ ކެންޑިޑޭޓެއްގެ ރަސްމީ އެޖެންޓު 6،000ރ. އިން ޖޫރިމަނާކުރި އެވެ.