ކޮމިއުނިޓީ ބޭސްޑް ރިހެބިލިޓޭޝަންއަކީ، މަސްތުވާތަކެތި ބޭނުންކުރާ މީހުންނަށް އޮތް އެންމެ މުހިންމު ޙައްލު - ރައީސް

މަސްތުވާތަކެތި ބޭނުންކުރާ މީހުންނަށް އޮތް އެންމެ މުހިންމު ޙައްލަކީ ކޮމިއުނިޓީ ބޭސްޑް ރިހެބިލިޓޭޝަން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ރައީސް މިހެން ވިދާޅުވީ "ރައީސްގެ ވާޖިބު" ޕްރޮގްރާމުގައި، މއ. ބޯޅަކިންކިރިމާގޭ އާއިޝަތު ޝެރީން، މަސްތުވާތަކެތި ބޭނުންކުރާ މީހުންނަށް ފަރުވާދީ އަނބުރާ މުޖުތަމަޢަށް ގެނައުމަށް ސަރުކާރުން ގެންގުޅޭ ސިޔާސަތާ މެދު ސުވާލުކުރެއްވުމުންނެވެ.

"ކޮމިއުނިޓީ ބޭސް ރިހެބިލިޓޭޝަންއަކީ އަޅުގަނޑުމެން ޤަބޫލުކުރާގޮތުގަ އެންމެ މުހިންމު ޙައްލު. އެންމެ މުހިންމު މަގު މިކަމުގަ ކުރިއަށް ދާން. އަޅުގަނޑުމެންގެ ކެބިނެޓުގަ ވާނެ މިކަމާ ގުޅޭގޮތުން މަޝްވަރާ ކުރެވި ސިޔާސަތު ކަނޑައަޅާފަ މި ދެންނެވި މަގުން ކުރިއަށް ދާން."

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ވަކި ރަށްތަކެއް ކަނޑައަޅުއްވާ، ރާއްޖޭގެ އެކި ސަރަހައްދުތަކުގަ ރަނގަޅު ފެންވަރުގެ މަރުކަޒުތައް ޤާއިމުކުރެއްވުމަށް ނިންމަވާފައިވާކަމަށްވެސް ރައީސް ވިދާޅުވިއެވެ. އަދި ސަރުކާރުން ހިންގާ އެކިއެކި މަޝްރޫޢުތަކުގައިވެސް ޢަމަލީގޮތުން ބައިވެރިވެ މުޖުތަމަޢަށް އެނބުރި އާދެވޭނެ ގޮތަށް ތަމްރީނު ދެވޭނެކަންވެސް ރައީސް ފާހަގަ ކުރެއްވިއެވެ.

"ކޮމިއުނިޓީ ބޭސްޑް ގޮތަށް ރިހެބިލިޓޭޓްކޮށް، އިސްލާމްދީނުގެ ހަމަތަކުގެ މަތިން އެކުދިންނަށް ތަޢުލީމާ ތަރުބިއްޔަތު ދީ، ވިސްނަދީ ހަދައިގެން އަނބުރާ މުޖުތަމަޢަށް ބޭނުންތެރި ކުދިންގެ ގޮތުގަ ގެނައުމަކީ އަޅުގަނޑުމެން އެންމެންވެސް ހަމަ ބޭނުންވާނެ ގޮތް. އެއީ އަޅުގަނޑުމެންގެ ސިޔާސަތަކީ. އެގޮތަށް އިރާދަ ކުރެއްވިއްޔާ ކުރިއަށް ގެންދާނީ."

ރައީސް ވިދާޅުވިއެވެ.

މަސްތުވާތަކެތީގެ މައްސަލައަކީ އަދު ދިވެހި މުޖުތަމަޢުގައި އިންތިހާ ދަރަޖައަށް ގޮސްފައިވާ މައްސަލައެކެވެ. މިކަމުގެ ސަބަބުން ވައްކަމާއި މާރާމާރީ ފަދަ އެހެން ބޮޑެތި ކުށްތައްވެސް ދަނީ އިތުރުވަމުންނެވެ. ޅަފުރާގައިވެސް ބައެއް ކުދީން މަސްތުވާތަކެތި ބޭނުންކުރަން ފަށާއިރު، އެކުދީން، އަލުން އަނބުރާ މުޖުތަމަޢަށް ގެނެސް، މި މައްސަލައަށް ދާއިމީ ޙައްލެއް ގެނައުމަށް ވަނީ ކޮންމެހެންވެސް ބޭނުންޖެހިފައެވެ.