މަކަރާ ހީލަތުން 400 މިލިއަން ހޯދަން އުޅުމުގެ ތުހުމަތު: ޖިނާއީ ތަހުގީގެއް ހިންގައިދޭން އެދިއްޖެ

ސެންޓާ އެންޓާޕްރައިސަސް ޕްރައިވެޓް ލިމިޓެޑް (ސެންޓާ އެންޓާޕްރައިސަސް) އިން 2021 ވަނަ އަހަރުގައާއި 2022 ވަނަ އަހަރުގައި ދިވެހި ދައުލަތާ ދެކޮޅަށް ހުށައަޅާފައިވާ މައްސަލަތަކުގައި މަކަރާއި ހީލަތުން ދައުލަތުގެ ކިބައިން ފައިސާ ހޯދުމަށް މަސައްކަތްކޮށްފައިވާ ކަމަށް އޮޑިޓަރ ޖެނެރަލް ފާހަގަކޮށްފައިވާތީވެ އެކަމާއި ގުޅިގެން ޖިނާއީ ތަހުގީގެއް ހިންގައިދިނުމަށް ބަންޑާރަ ނާއިބުގެ އޮފީހުން ފުލުހުންގެ ހިދުމަތުގައި އެދިއްޖެ އެވެ.

ސަރުކާރުގެ އިދާރާއަކާ ކުރި މުއާމަލާތެއްގެ ތެރެއިން އޮޅުވާލައިގެން ދައުލަތުގެ ބައިތުލްމާލުން 400 މިލިއަނަށްވުރެ ގިނަ ރުފިޔާ ހޯދަން އުޅުނު މައްސަލައެއް އޮޑިޓަރ ޖެނެރަލްގެ އޮފީހުން ވަނީ ފެންމަތި ކޮށްފަ އެވެ. އޮޑިޓް އޮފީހުން މި މައްސަލަ ފެންމަތިކޮށްފައިވަނީ އެ އޮފީހުން ނެރެފައިވާ ސެންޓަރ އެންޓަރޕްރައިސަސް ޕްރައިވެޓް ލިމިޓެޑުން 2008 ވަނަ އަހަރު ހެލްތު މިނިސްޓްރީއަށް ފޯރުކޮށްދިންކަމަށް ބުނާ މެޑިކަލް އިކުއިޕްމަންޓްސްއާއި ކޮންސިއުމަބަލްސްގެ އަގު ހޯދުމަށް ހުށަހަޅާފައިވާ މައްސަލައިގެ ޙާއްސަ އޮޑިޓް ރިޕޯޓްގައެވެ.

ބަންޑާރަ ނާއިބުގެ އޮފީހުން ބުނީ ސެންޓާ އެންޓާޕްރައިސަސް އިން 2021 ވަނަ އަހަރުގައާއި 2022 ވަނަ އަހަރުގައި ދިވެހި ދައުލަތާ ދެކޮޅަށް ހަތަރު ދައުވާއެއް ސިވިލް ކޯޓަށް ހުށަހެޅި ކަމަށެވެ. އަދި އެ ހަތަރު ދައުވާގައި އެ ކުންފުނިން ހުށަހެޅި ލިޔެކިޔުންތަކުގެ ސައްހަކަމާމެދު، އަދި ބައެއް މުއާމަލާތްތަކުގެ ސައްހަކަމާމެދު ސުވާލު އުފެދޭތީ، މި މައްސަލަތައް 4, ސެޕްޓެންބަރު 2022 ގައި އަދި އޭގެ ފަހުންވެސް ދިވެހި ފުލުހުންގެ ހިދުމަތަށް އެ އޮފީހުން ހުށަހަޅާފައިވާނެ ކަމަށެވެ.

އަދި ހަމަ އެ ތާރީހުގައި މި މައްސަލަތައް އޮޑިޓާ ޖެނެރަލްގެ އޮފީހުގެ ސަމާލުކަމަށް ވެސް ގެނެސްފައިވާނެ ކަމަށެވެ.

ބަންޑާރަ ނާއިބުގެ އޮފީހުން ބުނީ އޮޑިޓާ ޖެނެރަލްގެ އޮފީހުން އިއްޔެ ޝާއިއުކޮށްފައިވާ "ސެންޓާ އެންޓާޕްރައިސަސް ޕްރައިވެޓް ލިމިޓެޑްއިން 2008 ވަނަ އަހަރުގެ ތެރޭގައި މިނިސްޓްރީ އޮފް ހެލްތަށް ފޯރުކޮށްދީފައިވާކަމަށް ބުނާ މެޑިކަލް އިކިއުޕްމަންޓް އާއި ކޮންސިއުމަބްލްސްގެ އަގު ހޯދުމަށް ހުށަހަޅާފައިވާ މައްސަލައާގުޅޭ ހާއްސަ އޮޑިޓްގެ ރިޕޯޓް" ގައި ސެންޓާ އެންޓާޕްރައިސަސް އިން ފޯޖްކޮށްގެން އުފައްދާފައިވާ ސައްހަ ނޫން ލިޔެކިޔުންތަކެއް ޝަރުއީ ކޯޓުތަކަށް ހުށަހަޅާފައިވާ ކަމަށް އޮޑިޓާ ޖެނެރަލް އަށް ބުރަވެވޭ ކަމާއި، އެ ފަދައިން އެ ކުންފުނިން އަމަލުކޮށްފައިވަނީ މަކަރާއި ހީލަތުން ދައުލަތުގެ ކިބައިން ފައިސާ ހޯދުމަށް ކަމަށް އޮޑިޓާ ޖެނެރަލް ފާހަގަކޮށްފައިވާ ކަމަށެވެ.

އަދި މި މައްސަލައާ ގުޅޭ ޖިނާއީ ތަހުގީގެއް ކުރުމަށް ދިވެހި ފުލުހުންގެ ހިދުމަތަށް ހުށަހެޅުމަށް އޮޑިޓާ ޖެނެރެލް އިރުޝާދު ދެއްވާފައިވާތީ، މި ރިޕޯޓުގައި ފާހަގަކޮށްފައިވާ އެންމެހައި ކަންކަމަށް ރިއާޔަތްކޮށް ޖިނާއީ ތަހުގީގެއް ހިންގުމަށް އެދި އެ އޮފީހުން މިއަދު ދިވެހި ފުލުހުންގެ ހިދުމަތަށް ހުށަހަޅާފައިވާ ކަމަށެވެ.