އާރބަން ސެންޓަރުތަކުގައި އާބާދީގެ މިންގަނޑަކީ މަދުވެގެން 10،000 މީހުން: ވަޒީރު ހައިދަރު

ސަރުކާރުން ރާއްޖޭގެ 7 ރަށެއްގައި ގާއިމުކުރާ އާރބަން ސެންޓަރުތަކުގައި އާބާދީގެ މިންގަނޑަކީ މަދުވެގެން 10،000 މީހުން ކަމަށް ގެދޮރުވެރިކަމާއި ބިމާއި އުމްރާނީ ތަރައްގީއާއި ބެހޭ ވަޒީރު ޑރ.އަލީ ހައިދަރު އަހްމަދު ވިދާޅުވެއްޖެއެވެ.

ދައުލަތުގެ މީޑިއާ، ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުން ވަޒީރު ހައިދަރު ވިދާޅުވީ،  އާރބަން ސެންޓަރުގެ ގޮތުގައި ތަރައްޤީކުރާ ރަށްރަށް ކަނޑައަޅާފައިވަނީ އެރަށްރަށަށް މިހާތަނަށް ކޮށްފައިވާ އިންވެސްޓްމަންޓްތަކަކީ ކޮބައިކަން ބެލުމަށްފަހުގައިކަމަށާއި، އޭގެ ތެރޭގައި ސިއްޙީ ޚިދުމަތްތަކާއި، ތަޢުލީމީ ޚިދުމަތްތަކާއި، ޢުމްރާނީ އެހެނިހެން ޚިދުމަތްތައް ދެވިފައިހުރި މިންވަރު ހިމެނޭކަމަށެވެ. އަދި އެ ރަށް ކައިރީގައި ފަޅެއް އޮތްތަނަމަ، އެ ފަޅު ހިއްކައިގެންނަމަވެސް ރަށް ބޮޑުކުރެވޭނެ މިންވަރުވެސް ބަލާފައިވާނެކަމަށް ވަޒީރު ވިދާޅުވިއެވެ.

މިހާރު ކުރިއަށް ގެންދަނީ އާބަން ޑިވެލޮޕްމަންޓް ޕްލޭނާއި ޕޮލިސީތައް އެކުލަވާލުމުގެ މަސައްކަތްތައްކަން ފާހަގަކުރައްވާ ވަޒީރު ހައިދަރު ވިދާޅުވީ، މި ޕޮލިސީތައް އެކުލަވާލާނީ ސަރުކާރާއި އަމިއްލަ ފަރާތްތައް ހިމެނޭހެން ހުރިހައި ސިނާއަތަކަށްވެސް ފުރުޞަތުތައް ފަހިވާނެގޮތަކަށްކަމަށެވެ.

"ގާތްގަޑަކަށް މެދުރާއްޖެތެރެއަށް ބަހާލާފައި މި އޮތީ 7 އާރބަން ސެންޓަރ. މި މައި ރަށުގައި މީހުން އާބާދުވެއްޖެނަމަ ޚިދުމަތް ހޯދުމަށްޓަކައި ދަތުރުކުރާކަށް ނުޖެހޭނެ. އާބާދީއާއި ތަރައްޤީ އެއްފަސްކުރުމަކީ ކުދި ރަށްރަށުގެ ރައްޔިތުން މިފަދަ ރަށްތަކަށް ބަދަލުކުރުން."

ވަޒީރު ހައިދަރު ވިދާޅުވިއެވެ.

މޫސުމީ ބަދަލުތަކުގެ ސަބަބުން ކުދި ރަށްރަށް އެތަކެއް ގޮންޖެހުންތަކެއް ކުރިމަތިވާއިރު، އެފަދަ ރަށްރަށުގެ ރައްޔިތުންނަށް ސަލާމަތުން ދިރިއުޅެވޭނީ ތިމާވެށްޓާ ރައްޓެހި ރަށްތަކެއް ތަރައްޤީކުރެވިގެންކަމަށާއި، ރައްޔިތުންނަށް ރައްކާތެރި މަތީ ތަޢުލީމާއި ސިއްޙީ ފުރުޞަތުތަކުގެ އިތުރުން ވިޔަފާރީގެ އެތަކެއް ފުރުޞަތުތަކެއް ފަހިވެގެން ދާނެ ތަންތަނަށް އާބަން ސެންޓަރުތައް ވެގެންދާނެކަމަށް ވަޒީރު ވިދާޅުވިއެވެ.

ރައީސުލްޖުމްހޫރިއްޔާ ޑރ.މުޙައްމަދު މުޢިއްޒުގެ ރިޔާސީ ވައުދުފުޅާއި އެއްގޮތްވާގޮތުގެ މަތިން ރާއްޖޭގައި އާބަން ސެންޓަރު ގާއިމުކުރުމަށް ހަމަޖެހިފައިވާ ރަށްތައް ކަނޑައަޅުއްވައި، އެ ރަށްތައް އިއްޔެ ވަނީ އާއްމުކުރައްވާފައެވެ.

އެ ރަށްތަކަކީ:

1) ރ. އުނގޫފާރު

2) ބ. އޭދަފުށި

3) ޅ. ނައިފަރު

4) އދ. މަހިބަދޫ

5) ފ. ނިލަންދޫ

6) ދ. ކުޑަހުވަދޫ

7) ލ. ފޮނަދޫ

ސަރުކާރުން ޚާއްޞަ އިސްކަމެއްދީގެން ގިނަ ރައްޔިތުންނަށް ފައިދާ ހާސިލުކުރެވޭނެ ގޮތަށް ރާއްޖޭގައި 7 އާބަން ސެންޓަރު ތަރައްޤީކުރާނެ ކަން ރައީސް ޑރ.މުޢިއްޒު އިއުލާނު ކުރައްވާފައިވަނީ, މީގެ ކުރިން މިއަހަރުގެ މާޗު މަހު، ރ.އުނގޫފާރުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުންނެވެ.

މިގޮތުން ރައީސް ޑރ.މުޢިއްޒު ވިދާޅުވީ،  ރާއްޖޭގެ މެދު ރާސްތާ، އަދި ދުރު ރާސްތާގެ ތަރައްޤީއަށް ބަލާއިރު، އެންމެ އުތުރުގެ ހަތަރު އަތޮޅުގެ އިންޓަރގްރޭޓެޑް ޑިވެލޮޕްމަންޓް ޒޯނަކާއި، އެންމެ ދެކުނުގެ ހަތަރު އަތޮޅުގެ އިންޓަރގްރޭޓެޑް ޑިވެލޮޕްމަންޓް ޒޯނެއްގެ އިތުރުން ރާއްޖޭގައި 7 އާބަން ސެންޓަރެއް ތަރައްޤީ ކުރައްވާނެކަމަށެވެ.