8 އަހަރު ފޮރިންސާވިސްގައި އުޅުމަށްފަހު ރައީސް ވަހީދުގެ ދަރިކަލުން ޖެފްރީ ވަކިވެއްޖެ

ރާއްޖޭގެ ޚާރިޖިއްޔާގައި، ފޮރިންސާވިސްގައި 8 އަހަރުވަންދެން މަސައްކަތްކުރެއްވުމަށްފަހު ކުރީގެ ރައީސް ޑޮކްޓަރ މުހައްމަދު ވަހީދުގެ ދަރިކަލުން ޖެފްރީ ސާލިމް ވަހީދު ފޮރިންސާވިސްގެ ޚިދުމަތުން ވަކިވެވަޑައިގެންފިކަން ހާމަކުރައްވައި ފެއަރވެލް ސްޓޭޓްމަންޓެއް ދެއްވައިފިއެވެ.

ޖްފްރީ ސާލިމް ޜާއްޖޭގެ ޚާރިޖިއްޔާގެ ޚިދުމަތުން ވަކިވެވަޑައިގެންނެވީ ކީއްވެގެންކަން ސާފުކޮށް ހާމަކުރައްވާފައި ނުވެއެވެ. އެހެންނަމަވެސް ވޮއިސްއަށް އެގިފައިވާ ގޮތުގައި ޒުވާން ޑިޕްލޮމެޓް ޚާރިޖީ ދާއިރާ ދޫކޮށްލީ ސަރުކާރުގެ ޚާއްސަކޮށް ރައީސް އޮފީހުގައި މަސައްކަތްކުރައްވާ އެމްޑީޕީއަށް ނިސްބަތްވާ ބައެއް އަންހެން ބޭފުޅުން އޭނާއާއިމެދު އޮންނަ ރުޅިވެރިކަމެއްގެ ސަބަބުން އައި ފިއްތުންތަކުންނެވެ. ފުރަތަމަ ސަބަބަކީ އޭނާއަކީ 2012 ވަނަ އަހަރު މުހައްމަދު ނަޝީދު ރައީސްކަމުން އިސްތިއުފާ ދެއްވުމުން ނާއިބް ރައީސްއަކަށް ހުންނަވައި ރައީސްކަމުގެ މަގާމާއި ހަވާލުވެވަޑައިގެންނެވި ޑޮކްޓަރ ވަހީދުގެ ދަރިފުޅަށް ވުމެވެ. ރައީސްކަމާއި ޑޮކްޓަރ ވަހީދު ހަވާލުވެވަޑައިގަތުމުން އެމްޑީޕީގެ އިސްވެރިން ވަހީދު ދެކެ އައި ރުޅި އޭނާގެ ދަރިފުޅަށްވެސް ބާލަމުންދިޔައެވެ. ދެވަނަ ސަބަބަކީ ރައީސް އަބްދުﷲ ޔާމީންގެ ސަރުކާރު ވަށްޓާލުމަށް ގެންނަން އުޅުނު ޖުޑިޝަލް ކޫ ނާކާމިޔާބުވުމާއި ގުޅިގެން ކުރިމަތިވި އިންޓަރނޭޝަނަލް ޕްރެޝަރ ކުޑަކުރުމަށާއި ސަރުކާރުގެ ފޮރިންޕޮލިސީ ހާމަކުރަމުގައި ޚާރިޖިއްޔާގައި ތިއްބެވި ޓެލެންޓެޑް ކުޅަދާނަ ޑިޕްލޮމެޓުން ބޭނުންކުރިއިރު ޖެފްރީއަކީ އެންމެ ކުރީސަފަށް ޚާރިޖިއްޔާއިން ނެރުނު ޑިޕްލޮމޭޓަށްވުމެވެ. ކުރީ ސަފަށް އޭނާ ނެރުނީ އޭނާގެ އިލްމީ ގާބިލްކަމާއި ބަސްމޮށުންތެރިކަމުގެ ކުޅަދާނަކަމާއި އަދި ޚާރިޖީ ސިޔާސަތު ދިފާއުކުރެއްވުމުގައި ގެންގުޅުއްވާ ވަށްޓަފާޅި ސަރުކާރަށް ކަމުދިޔުމުންނެވެ. އެމަސައްކަތުގެތެރޭގައި އުޅުއްވަންޖެހިލެއްވުމުން ސަބްރާ ނޫރައްދީންފަދަ އެމްޑީޕީގެ އިސް އެކްޓިވިސްޓުންގެ ވަރަށް ބޮޑު ނަފްރަތާއި ރުޅިވެރިކަން އޭނާއަށް ރައްދުވަމުންގޮސްފައިވެއެވެ.

ޖެފްރީ ސާލިމަކީ އޭނާގެ ބައްޕަގެ ފަހަތްޕުޅުން އެމެރިކާގެ ސްޓެމްފޮޑް ޔުނިވަރސިޓީން ތައުލީމް ހާސިލުކުރެއްވި ދެވަނަ ދިވެއްސެވެ.

ކިޔަވައިވިދާޅުވުމަށްފަހު ދިވެހި ރާއްޖޭގެ ފޮރިންސާވިސްއާއި ގުޅިވަޑައިގެން ވޭތުވެދިޔަ އަށް އަހަރު މެދުކެނޑުމެއްނެތި އޭނާ މަސައްކަތްޕުޅު ކުރައްވަމުންގޮސްފައިވަނީ ޚާރިޖީ ދާއިރާގައެވެ. އޭނާއަކީ ރާއްޖޭގެ ފޮރިން ސާވިސްގެ އެންމެ ބްރައިޓް އެއް ޒުވާން ޑިޕްލޮމެޓެވެ.

ފެއަރވެލް ސްޓޭޓްމަންޓްގައި އޭނާގެ ބައްޕަގެ ސިޔާސީ ހަޔާތްޕުޅަށް ކުރިމަތިވެވަޑައިގެންނެވި ގޮންޖެހުންތަކާއި އެކަންކަމުގައި އޭނާގެ ތަޖުރިބާ ހިއްސާކުރައްވާފައިވެއެވެ. އޭނާގެ ބައްޕަގެ އާއިލާއަށް ލިބުނު ސިޔާސީ އަނިޔާތަކުގައި އޭނާގެ ބައްޕަ ކީރިތިކުރައްވާފައިވާ މަންޒަރު ކުޑައިރު ފެނިފައިވާކަމަށް ޖެފްރީ ކިޔައިދީފައިވެއެވެ.