ބުކިން.ކޮމްގެ ނަމުގައި އާ ސްކޭމެއް؛ ސަމާލުވުމަށް ފުލުހުން އިލްތިމާސްކޮށްފި

ބުކިން.ކޮމްގެ ނަމުގައި އޮޅުވާލައިގެން މީހުންގެ އަތުން ފައިސާ އަތުލުމަށް އާ ސްކޭމް މެސެޖުތަކެއް ފޮނުވަމުންދާާތީ އެކަމަށް ސަމާލުވުމަށް ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުން މިއަދު އިލްތިމާސްކޮށްފިއެވެ.

ފުލުހުން ހާމަކޮށްފައިވާ ގޮތުގައި، މި ސްކޭމަކީ ރިފަންޑެއް ދޭންވެގެން ކަމަށް ބުނެ ކާޑުގެ މައުލޫމާތުތައް ވަގަށް ނެގުމަށް ސްކޭމަރުން ފޮނުވަމުންދާ "ފިޝިންގް" ލިންކެކެވެ. މި މެސެޖުތަކުގައި ބޭނުންކޮށްފައިވަނީ ރަސްމީ ބުކިން.ކޮމްގެ ޔޫ.އާރް.އެލްއެއް ނޫން ކަމަށާއި، އޭގެ ބަދަލުގައި ހިމަނާފައިވަނީ އޮޅުވާލުމެއް އެކުލެވޭ ކުރު ލިންކެއް ކަމަށް ފުލުހުން ބުނެއެވެ.

މި ސްކޭމްގެ ނުރައްކާތެރިކަން އިތުރުވަނީ، މެސެޖު ލިބޭ މީހާއަށް ވިސްނާލަން ވަގުތު ނުދީ، "24 ގަޑިއިރު ތެރޭގައި" އެކަން ފުރިހަމަކުރަންޖެހޭނެ ކަމަށް ބުނެ ބިރުވެރިކަން އުފައްދާތީއެވެ. އެންޓި ސްކޭމް ސެންޓަރުން ބުނި ގޮތުގައި، އެއްވެސް ކުންފުންޏަކުން ރިފަންޑް ދިނުމަށްޓަކައި ކާޑުގެ ނަންބަރާއި، އެކްސްޕަޔަރީ ޑޭޓް ނުވަތަ ސީ.ވީ.ވީ ނަންބަރު ހޯދުމަށް މިފަދަ ލިންކުތަކެއް ނުފޮނުވާނެއެވެ.

މިފަދަ ސްކޭމްތަކުން ރައްކާތެރިވުމަށްޓަކައި ފުލުހުން ވަނީ ތިރީގައިވާ ކަންކަމަށް ސަމާލުވުމަށް އެދިފައެވެ:

1) ލިބޭ މެސެޖުތަކުގައިވާ ލިންކުތަކަށް ނުފިތުން.

2) އެއްވެސް ފަރާތަކަށް އޯ.ޓީ.ޕީ ނުވަތަ ކާޑުގެ އެއްވެސް މައުލޫމާތެއް ހިއްސާނުކުރުން.

3) މައުލޫމާތުގެ ސައްހަކަން ކަށަވަރުކުރުމަށް ރަސްމީ އެޕްލިކޭޝަން ނުވަތަ ވެބްސައިޓް މެދުވެރިކޮށް ޗެކްކުރުން.

މި ދުވަސްވަރަކީ އެކި ނަންނަމުގައި މީހުންނަށް ގުޅައިގެންނާއި މެސެޖުކޮށްގެން މާލީ މައުލޫމާތު ހޯދައި، ފޭރުމުގެ އަމަލުތައް ގިނަވަމުންދާ ދުވަސްވަރަކަށްވާތީ، އާންމުން މިކަމަށް އިތުރަށް ސަމާލުވުމަށާއި، އެހެން މީހުން ހޭލުންތެރިކުރުވުމަށް ފުލުހުން ވަނީ އެދިފައެވެ.