ދިވެހި ދިދައަށް ހާއްސަ ގާނޫނެއް ހަދަނީ

ދިވެހިރާއްޖޭގެ ދަޢުލަތުގެ ނިޝާނާ ޤައުމީ ދިދަ ހިމާޔަތްކުރުމަށް ޤާނޫނެއް ހެދުމުގެ މަސައްކަތް ކުރަމުން އަންނަ ކަމަށް ދިވެހި ބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހިމް ވިދާޅުވެއްޖެއެވެ.

މިނިސްޓަރު މިގޮތަށް ވިދާޅުވީ ރައީސް އޮފީހުން އިއްޔެ ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ނެވެ.

ވަޒީރު އާދަމް ނަޞީރު ވިދާޅުވީ ދައުލަތުގެ ނިޝާނުގެ އިންތަކާއި މިންތައް ކަނޑައަޅާފައިވާ ހަމަތައް ގާނޫނުގައި މިވަގުތު ނެތްކަމަށެވެ. އެހެންކަމުން، ދައުލަތުގެ ނިޝާނާއި ދިވެހި ދިދަ އަށް ވެސް ޤާނޫނީ ހިމާޔަތް ބޭނުންވާ ކަމަށް ވަޒީރު ވިދާޅުވިއެވެ.

ވަޒީރު މިފަދައިން ވިދާޅުވީ ނޫސްވެރިއަކު ކުރި ސުވާލަކަށް ޖަވާބު ދެއްވަމުންނެވެ.

އެ މަސައްކަތް މިހާރު ތާވަލުކުރެވިފައިވެސްވާ ކަމަށް މިނިސްޓަރު ވިދާޅުވި އެވެ.

ދިވެހި ދައުލަތުގެ މިކަހަލަ ގާނޫނީ ރަމްޒުތައް ހިމާޔަތްކުރުމަށްޓަކައި ބިލެއް ޑްރާފްޓް ކުރުމުގެ ވިސްނުން ސަރުކާރުގެ އެބައޮތް. އެހެންވީމާ، ރައީސްގެ ސިޔާސަތުގެ ތެރޭގައި ދިދައަށް ހުރިހާ ގޮތަކުން ހިމާޔަތާއި ރައްކާތެރިކަން ދިނުން އަދި ދިވެހި ދައުލަތުގެ ނިޝާނާއި ދިވެހިންގެ އިއްޒަތާއި ގުޅިފައިހުރި މިފަދަ ހުރިހާ ކަމެއްގެ ތެރެއިން އިރާދަކުރެއްވިއްޔާ އަންނާނެ

ދިވެހި ބަހާއި ސަޤާފަތާއި ތަރިކައާ ބެހޭ ވަޒީރު އާދަމް ނަޞީރު އިބްރާހިމް

މީގެ އިތުރުން ރާއްޖޭގެ އެކި ސަރަހައްދުތަކުގައި ދާރުލްއާސާރުތައް ހެދުމުގެ މަސައްކަތް ކުރުމަށް ސަރުކާރުން ނިންމާފައިވާއިރު، އެކަން ދެމެހެއްޓެނިވި ގޮތެއްގައި ކުރެވޭނެ ކަމަށް ސަރުކާރުން ޤަބޫލު ކުރާކަމށްވެސް ޕްރެސް ކޮންފަރެންސްގައި ވަޒީރު ވިދާޅުވިއެވެ.

އެގޮތުން ދުނިޔޭގެ އެހެން ބައެއް ޤައުމުތަކެކޭ އެއްގޮތަށް މިދާއިރާގެ ކަންކަން ފަރުމާކުރެވި ބަދަލު ކުރެވުމުން ރާއްޖޭގައިވެސް ތަރިކައިން އާމްދަނީ ލިބޭނެ ކަމަށް ވަޒީރު ވިދާޅުވިއެވެ. އަދި މިކަން ކުރުމަށް ޒަމާނީ ޓެކްނޮލޮޖީގެ އެހީތެރިކަން ހޯދަން ޖެހޭ ކަމަށް ވިދާޅުވިއެވެ.