ޔުނައިޓެޑުގެ ކޯޗު ކަމުން ވަކިކުރި ވާހަކަ ނުދައްކަނީ ކްލަބަށް ކުރާ ގަދަރެއްގެ ސަބަބުން

މެންޗެސްޓާ ޔުނައިޓެޑުގެ ކޯޗް ކަމުން ވަކިކުރި ވާހަކަދައްކަން ބޭނުންނުވާ ކަމަށައި އެއީ ކްލަބަށައި ކްލަބުގައި އެއްކޮށް މަސައްކަތްކުރި މީހުންނަށް ކުރާ ގަދަރަކައި އިހްތިރާމެއްގެ ސަބަބުން ކަމަށް މޮރީނިއޯ ބުނެފިއެވެ.

ޔުނައިޓެޑުގެ ކޯޗުކަމުން މޮރީނިއޯ ވަކިކޮށްފައިވަނީ އެ މަގާމައި އޭނާ ހަވާލުވިތާ ދެ އަހަރައި ހަ މަސްފަހުން މިދިޔަ އަންގާރަ ދުވަހުއެވެ.

ޔުނައިޓެޑުގެ ބެޖް މޭ މަތީގައި ޖަހާލަން ލިބުމަކީ އެނާއަށް ލިބުނު ވަރަށް ބޮޑު ޝަރަފެއް ކަމަށައި ޔުނައިޓެޑަށް ސަޕޯޓްކުރާ އެންމެންވެސް އެކަން ގަބޫލުކުރާނެ ކަމުގައި މޮރީނިއޯ ބުންޏެވެ.

ކެރިއަރުގަ ލެއްޕޭ ބާބު ތަކުގެ ވާހަކަ އެއްވެސް އިރެއްގައި ދައްކާފައިނުވާނެ ކަމަށައި އެގޮތަށް އަމަލުކުރަނީ އޭނާއާއެކު އެ ކްލަބެއްގައި މަސައްކަތްކުރި މީހުންނަށް އިހުތިރާމްކުރާތީ ކަމުގައި ކަމަށްވެސް މޮރީނިއޯ ބުންޏެވެ. ނުރަނގަޅު ނޫން ކަންކަމުގެ ވާހަކަ ދެއްކިދާނެ ކަމަށައި ނަމަވެސް އެއީ އޭނާ ގަބޫލުކުރާ ކަމެއް ނޫން ކަމުގައިވެސް މޮރީނިއޯ ބުނެފައިވެއެވެ.

ފުޓްބޯޅައަށް އެނބުރި އަންނަންދެން އާދައިގެ ދިރިއުޅުމެއް އުޅުމުގެ ހައްގެ އޭނާއަށް އޮންނަންވާނެ ކަމަށައި ޔުނައިޓެޑައި ނުލާ އޭނާގެ ކުރިމަގު އެބޮތް ކަމަށައި އަދި ޔުނައިޓެޑަށްވެސް އޭނާއައި ނުލާ ކުރިމަގެއް އޮތްކަމުގައި މޮރީނިއޯވަނީ ބުނެފައެވެ.

މި ސީޒަނުގައި ޔުނައިޓެޑް ލީގުގައި ކުޅުނު 17 މެޗުން ލިބުނު 26 ޕޮއިންޓަކީ 1990/1991 ވަނަ ސީޒަނުގެ ފަހުން އެ ކްލަބް ހޯދާފައިވާ އެންމެ ދަށް ނަތީޖާއެވެ.