ތުޅާދޫ އާއި ވިލުފުށީގެ ހައުސިންގ ޔުނިޓަށް ހުށަހެޅުމަށް ހުޅުވާލައިފި

ބ. ތުޅާދޫގަޔާއި ތ. ވިލުފުށީގައި ސަރުކާރުން އިމާރާތްކޮށްފައިވާ 100 ހައުސިންގ ޔުނިޓަށް އެދި ހުށަހެޅުމުގެ ފުރުސަތު  މިނިސްޓްރީ އޮފް ކޮންސްޓްރަކްޝަން، ހައުސިންގ އެންޑް އިންފްރާސްޓްރަކްޗަރ އިން ހުޅުވާލައިފިއެވެ.

މި ދެ ރަށުގައި ތަރައްޤީކޮށްފައިވާ ހައުސިންގ ޔުނިޓުތަކަށް ކުރިމަތިލުމުގެ އުސޫލު މިދިޔަ މަހުގެ 24ވަނަ ދުވަހު ވަނީ އާއްމުކޮށްފައެވެ. މި އުސޫލު ދިވެހި ސަރުކާރުގެ ގެޒެޓްގައި ތުޅާދޫގައި އިމާރާތްކުރާ މި 100 ހައުސިންގ ޔުނިޓު ދޫކުރުމުގައި އަމަލުކުރާނެ ގޮތުގެ އުސޫލު (G-33/2025 ބ.) ގައި ވަނީ ޝާއިއުކޮށްފައެވެ.

މި ހައުސިންގ ޔުނިޓުތަކަށް އެޕްލިކޭޝަން ހުށަހެޅުމަށް ހުޅުވާލެވިފައިވާނީ 11 ޖަނަވަރީ 2026، ވަނަ ދުވަހުގެ 12:00 އިން ފެށިގެން 11 އެޕްރީލް 2026 ވަނަ ދުވަހުގެ 23:59 އާ ހަމައަށެވެ.

މިނިސްޓްރިއިން ބުނި މި ރޯހައުސްތަކަށް އެދި ފޯމު ހުށައެޅޭނީ "ހިޔާވަހި" ޕޯޓަލް މެދުވެރިކޮށްކަމަށެވެ. އެގޮތުން މި އުސޫލުގެ ދަށުން ހައުސިންގ ޔުނިޓަށް ޝަރުތު ފުރިހަމަވާ ފަރާތްތަކުން، އެޕްލިކޭޝަން ފޯމު ހުށަހަޅުއްވާނީ މިނިސްޓްރީގެ ހިޔާވަހި ޕޯޓަލް (https://hiyaavehi.housing.gov.mv) މެދުވެރިކޮށްކަމަށް ހައުސިންގ މިނިސްޓްރީއިން ބުނެފައިވެއެވެ.

މިނިސްޓްރީއިން ބުނީ މިކަމާ ގުޅޭ އިތުރު މައުލޫމާތު ހޯއްދެއްވުމަށް މިނިސްޓްރީގެ ފޯން ނަންބަރު 4004900 އަށް ގުޅުއްވައިގެންވެސް އަދި މިނިސްޓްރީގެ އީމެއިލް ([email protected]) އަށް އީމެއިލް ކުރައްވައިގެންވެސް ލިބޭނެކަމަށެވެ.

މި ދެރަށުގައި ގާއިމުކުރެވުނު ހައުސިން ޔުނިޓްތަކަކީ 3 ކޮޓަރީގެ ހައުސިން ޔުނިޓްތަކެކެވެ. ރޯހައުސްގެ ގޮތުގައި ތަރައްޤީކޮށްފައިވާ މި ޔުނިޓްތަކަކީ 2002 އަކަފޫޓުގެ ބިމުގައި، އިމާރާތް ކުރެވޭ އޭރިއާ 1204 އަކަފޫޓަށް ހުންނަގޮތަށް އިމާރާތްކޮށްފައިވާ ޔުނިޓްތަކެވެ.

މީގެތެރެއިން ވިލުފުށިން ދޫކުރުމަށް ތައްޔާރުވެފައިވާ ރޯހައުސްތަކަކީ 2011 ވަނަ އަހަރު ނޫމަޑިއާ ހަވާލުކޮށްގެން އޭރު ފެށި މަސައްކަތްތަކެވެ. އެ މަސައްކަތް ނުނިންމުމުގެ ސަބަބުން ފަހުން އެ މަސައްކަތް އެހެން ކޮންޓްރެކްޓަރަކާ ސަރުކާރުން ވަނީ ހަވާލުކޮށްފައެވެ.

ތުޅާދޫގައި ވެސް އަލަށް ތަރައްޤީކުރި 100 ރޯހައުސް ލިބޭމީހުންގެ ދާއިމީ ލިސްޓެއް މިދިޔަ އަހަރުގެ ސެޕްޓެންބަރު މަހު ވަނި އާއްމުކޮށްފައެވެ. މި ލިސްޓް އާއްމުކޮށްފައިވަނީ އެ ލިސްޓް އާއްމުކުރުން ލަސްވެގެން، ރައްޔިތުންގެ ތެރެއިން ބަޔަކު ނިކުމެ މިއަދު ކައުންސިލް އިދާރާތެރޭގައި އިހުތިޖާޖުކޮށްފައިވަނިކޮށެވެ.