ފްލެޓް އަޅަން އަމިއްލަ ކުންފުނިތަކުގެ ޝައުގުވެރިކަން ވަރަށްބޮޑު: މުއްތަލިބް
ސަރުކާރުން ކުރިއަށްގެންދާ ބޯހިޔާވަހިކަމުގެ ސިޔާސަތުގެ ދަށުން ފްލެޓްތައް އެޅުމަށް އަމިއްލަ ކުންފުނިތަކުގެ ވަރަށްބޮޑު ޝައުގުވެރިކަމެއް ލިބިފައިވާކަމަށް ގެދޮރުވެރިކަމާއި އުމްރާނީ ތަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބް ވިދާޅުވެއްޖެއެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މުއްތަލިބް ވިދާޅުވީ، ރައްޔިތުންނަށް ބޯހިޔާވަހިކަން ހޯދައިދިނުމަށް ފްލެޓް އެޅުމަށް ހުޅުވާލި ފުރުސަތުގައި ދިވެހި ކޮންޓްރެކްޓަރުންގެ ފަރާތުން ވަރަށްބޮޑު ޝައުފުވެރިކަމެއް ލިބިގެންގޮސްފައިވާކަމަށެވެ. މިނިސްޓަރު ވިދާޅުވީ މިހާރުވެސް ދިވެހި ކޮންޓްރެކްޓަރުންގެ ފަރާތުން ގާތްގަނޑަކަށް ދިހަހާސް ޔުނިޓު އެޅުމަށްޓަކައި ޕްރޮޕޯސަލްތައް ލިބިފައިވާކަމަށެވެ. އޭގެ ތެރެއިން މިނިސްޓްރީން ބަލަންޖެހޭ ކަންކަން ބެލުމަށްފަހު ބައެއް ޕްރޮޕޯސަލްތަކުގައި ސޮއިކުރުމަށް އިކޮނޮމިކް ކައުންސިލަށް ހުށަހަޅާފައިވާކަން މިނިސްޓަރު ފާހަގަކުރެއްވިއެވެ.
މުއްތަލިބް ވިދާޅުވީ، އެގާރަހާސް ޔުނިޓާއެކު އިތުރު ޔުނިޓްތައް އެޅުމަށް ކުންފުނިތަކާއެކު މިހާރުވެސް މުއާމަލާތްތައް ކުރިއަށްދާކަމަށެވެ. މާލެ ސަރަހައްދުގައި ފްލެޓް އަޅަން ބަލާއިރު، މިހާރު އެންމެ ގިނަވެގެންވެސް އިމާރާތްކުރެވެން އޮތީ ބާރަހާސް ޔުނިޓްކަން މިނިސްޓަރުގެ ވިދާޅުވިއެވެ.
މާލެ ސަރަހައްދުގަ ބިން ހުރި ގޮތުން އަޅުގަނޑުމެންނަށް އިމާރާތް ކުރެވޭން އެ އޮންނަނީ މިހާރު ހުރި ބިންތަކުގަ ބާރަ ހާސް ވަރަކަށް ޔުނިޓް. އެހެންނަމަވެސް، ފޭސް ތިނެއްގެ އެއީ އެއާޕޯޓަށް ފްލައިޓްތައް ޖައްސަން އަންނަ ފްލައިޓް ޕާތާވެސް ދިމާވާ ސަރަހައްދަކަށް ވާތީވެ ނެގޭ އުސްމިންތައް ތަފާތުވޭ. އަޅުގަނޑު ކުރިން ސަތާރަ އަށާރަ ފޫޓަށް ނެގޭނެ ކަމަށް ބެލި ބައެއް ބިންތަކުގަ މިހާރު ސާދަ ފޫޓަށް ނެގޭނެ ކަމަށް ސިވިލް އޭވިއޭޝަނުން އެބަ އަންގާފަ. އެހެންވީމަ އަޅުގަނޑުމެންނަށް ހަގީގަތުގަ މިދެންނެވި ދިހަ ހާސް ހަސަތޭކަ ޔުނިޓަށް ވުރެ އިތުރަށް އިމާރާތް ކުރެވޭނެ ބިންތަކެއް މިނިސްޓްރީއަކަށް މިވަގުތުގަ ލިބިފައެއްނެތް
އުމްރާނީ ތަރައްޤީއާ ބެހޭ ވަޒީރު ޑރ. ޢަބްދުﷲ މުއްޠަލިބް
މިނިސްޓަރު ވިދާޅުވީ މާލެ ސަރަހައްދުގައި ފްލެޓް އަޅަން ބިން ލިބުން ދަތިނަމަވެސް އެޗްޑީސީ އާ ވާހަކަދައްކައިގެން ހައުސިންގެ ކަންކަމަށް ބައެއް ބިންތައް ލިބޭތޯ ބަލަމުން އަންނަ ކަމަށެވެ. އަދި ހަމަ އެހެންމެ މާލެއިންވެސް ބައެއް ބިންތައް ހޯދުމުގެ މަސައްކަތް ކުރަމުން އަންނަކަމަށް މިނިސްޓަރު ވިދާޅުވިއެވެެ.
މިނިސްޓަރު އިތުރަށް ވިދާޅުވީ އިސްވެދިޔަ ތަނުގައި ނަގާފައިހުރި ލޯނުތަކުގެ ސަބަބުން ބޯހިޔާވަހިކަމަށް ލޯނު ނެގުމަށް ބޮޑެތި ގޮންޖެހުންތައް ހުރިނަމަވެސް، ތަފާތު މޮޑެލްތައް ބޭނުންކޮށްގެން ގެދޮރޔު އެޅޭނެ ގޮތްތައް ހޯދަމުން އަންނަ ކަމަށެވެ. އެގޮތުން ބޭންކް އޮފް މޯލްޑިވްސްގެ ފަންޑްގެ ތެރެއިން މިހާރުވެސް ބޯހިޔާވަހިކަމުގެ ބައެއް ތަންތަނުގެ އަމަލީ މަސައްކަތް ފަށާފައިވާއިރު، އަމިއްލަ ކުންފުނިތަކަށް ހާއްސަ އިނާޔަތްތަކެއް ހަމަޖައްސައިދީގެން ހައުސިން ޔުނިޓްތައް އެޅުމުގެ މަސައްކަތް ކުރުމަށް ތައްޔާރުވަމުން އަންނަކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
