ފުވައްމުލަކުގައި ސައިކަލެއް ކޮންޓްރޯލުން ނެއްޓި، ނުރައްކާތެރި އެކްސިޑެންޓެއް؛ އަނިޔާވި މީހާގެ ހާލު ސީރިއަސް

ޏ ފުވައްމުލަކުގައި، ދުއްވާފައި ދިޔަ ސައިކަލެއް ކޮންޓްރޯލުން ނެއްޓި ނުރައްކާތެރި އެކްސިޑެންޓެއް ހިނގައިފިއެވެ.

ފުލުހުންގެ މީޑިއާ އޮފިޝަލް މިއަދު ވިދާޅުވީ، ފުވައްމުލަކުގައި ސައިކަލެއް ކޮންޓްރޯލުން ނެއްޓި، ޒިބްރާ ކްރޮސް ޕޯސްޓް ދަނޑީގައި ޖެހި އެކްސިޑެންޓެއް ހިނގާފައިވާ ކަމަށް ރޭގެ 23:43 ގައި ފުލުހުންނަށް ރިޕޯޓް ކޮށްފައިވާ ކަމަށެވެ.

އަދި މި އެކްސިޑެންޓްގައި އަނިޔާވެފައި ވަނީ 32 އަހަރުގެ ދިވެހި ފިރިހެނަކަށް ކަމަށާ، އެ މީހާއަށް ފުވައްމުލަކު ހޮސްޕިޓަލުގައި ފަރުވާ ދެމުންދާ ކަމަށް އޮފިޝަލް ވިދާޅުވިއެވެ.

އެމީހާގެ ހާލު ސީރިއަސް ކަމަށް ފުވައްމުލަކު ހޮސްޕިޓަލުން ފުލުހުންނަށް މައުލޫމަތު ދީފައިވާ ކަމަށާ އޭނާއަށް އިތުރު ފަރުވާ ދިނުމަށް ރޭގެ ފަތިހުގެ ވަގުތެއްގައި މާލެ ގެނެސްފައިވާ ކަމަށްވެސް ވިދާޅުވިއެވެ.