ހައިކޯޓުގެ ފަނޑިޔާރު ފައިސަލް އިސްތިއުފާދެއްވައިފި

ހައިކޯޓުގެ ފަނޑިޔާރު މުހައްމަދު ފައިސަލް، ފަނޑިޔާރުކަމުގެ މަގާމުން މިއަދު އިސްތިއުފާ ދެއްވައިފިއެވެ.

ފައިސަލް މަގާމުން އިސްތިއުފާ ދެއްވިކަން އިއުލާންކޮށް، ހައިކޯޓުން މިއަދު އެކްސްގައި ކުރި ޕޯސްޓެއްގައި ވަނީ ފައިސަލްގެ ހިދުމަތަށް ޝުކުރު އަދާކޮށްފައެވެ. އެހެންނަމަވެސް، ފައިސަލް އިސްތިއުފާ ދިން ސަބަބެއް ހައިކޯޓަކުން ހާމަ ނުކުރެއެވެ.

ފައިސަލް އިސްތިއުފާ ދެއްވާފައި މިވަނީ ޖުޑީޝަލް ސާވިސް ކޮމިޝަން (ޖޭއެސްސީ) އިން އޭނާގެ މައްސަލައެއް ބަލަމުންދާކަމަށް ބައެއް މީޑިއާތަކުން ރިޕޯޓް ކުރިތާ ދެތިން ދުވަސް ފަހުންނެވެ.

ފައިސަލް ހައިކޯޓުގެ ފަނޑިޔާރުކަމާއި ހަވާލުވީ 2018 ވަނަ އަހަރުގެ ޖުލައި މަހުގެ 24 ވަނަ ދުވަހުއެވެ. އަދި މި އަހަރުގެ މާޗު މަހުގެ 19 ވަނަ ދުވަހުން ފެށިގެން، 19 ނޮވެންބަރު 2025 ވަނަ ދުވަހާއި ހަމައަށް ހައިކޯޓު ހިންގެވުމާ ވަގުތީ ގޮތުން ހަވާލުވެ ހުންނެވީ ފައިސަލް އެވެ.