އެމްއައިބީ ޕޯސްޓުގެ މުރާދަކީ ހަމައެކަނި ބީއެމްއެލްއަށް ބަރޯސާ ނުވާށޭތަ؟

ބޭންކް އޮފް މޯލްޑިވްސްގެ އިންޓަރނެޓް ބޭންކިން ހިދުމަތާއި، ކާޑުގެ ހިދުމަތް އިއްޔެ މެދުކެނޑިގެން ދިޔަދިއުމަކީ ބީއެމްއެލްގެ ކަސްޓަމަރުންގެ ފަރާތުން ނުތަނަވަސްކަން ފެނުނު ދުވަހެކެވެ. ސޯޝަލް މީޑިއާގެ އެކި ޕްލެޓްފޯމްތަކުގައި ބީއެމްއެލްގެ ކަސްޓަމަރުންގެ ޝަކުވާތައް އިއްޔެ އޮތީ ފުނިޖެހިފައެވެ.

ޒަމާނަށް އައި ބަދަލާއެކު މަދު މީހަކު ނޫނީ މިހާރު ވޮލެޓެއްގައި ފައިސާއެއް ނުގެންގުޅެއެވެ. ފައިސާގެ މުއާމަލާތްތަކުގައި މިަދު ގިނަ މީހުން ބޭނުންކުރަނީ އިންޓަރނެޓް ބޭންކިން އާއި ފައިސާ ކާޑުތަކެވެ. އެ އެއްޗެހީގެ ހިދުމަތް ގިނަ ވަގުތުތަކަކަށް މެދުކެނޑުމުން ބީއެމްއެލްގެ ކަސްޓަމަރުންގެ ހާސަރުތައް ގިނަވީ އެހެންވެގެންނެވެ. ރާއްޖޭގައި އަދިވެސް ގިނައީ ޤައުމީ ބޭންކްގެ ގޮތުގައި ހިންގަމުންގެންދާ ބީއެމްއެލްގެ ކަސްޓަމަރުންނެވެ.

ބީއެމްއެލްގެ އިންޓަރނެޓް ބޭންކާއި ކޭޝްކާޑުގެ ހިދުމަތް, އިއްޔެ ގިނަ ވަގުތުތަކަކަށް މެދުކެނޑި ރައްޔިތުންގެ ޝަކުވާތައް ބޮޑުވެފައިވަނިކޮށް، ބީއެމްއެލް އާ ވާދަވެރި މޯލްޑިވްސް އިސްލާމިކް ބޭންކުން މިއަދު ވަނީ ގިނަ ބައެއްގެ ސަމާލުކަން ހުއްޓޭފަދަ ޕޯސްޓެއް ކޮށްފައެވެ. އެ ޕޯސްޓްގައި ބުނެފައިވަނީ، "ހުރިހާ ބިހެއް އެއްގޮއްޓަކަށް ނުލަމާތޯއެވެ" މި ޕޯސްޓާ ގުޅޭގޮތުން ގިނަ ބަޔަކު ބުނަމުން ދަނީ އެއީ އިއްޔެ ބީއެމްއެލްއަށް ދިމާވި ހާދިސާ އާ ގުޅުވައިގެން ކޮށްފައިވާ ޕޯސްޓެއް ކަމަށެވެ.

އެމްއައިބީގެ މި ޕޯސްޓަށް ކޮމަންޓްކުރި ބައެއް މީހުން ބުނެފައިވަނީ، މާކެޓް ކުރުމަކީ މިއީ ކަމަށެވެ. އަނެއް ބަޔަކު ބުނެފައިވަނީ ނުސީދާ ގޮތެއްގައިނަމަވެސް އެމްއައިބީން އެ ބުނީ ރަނގަޅު އެއްޗެއް ކަމަށެވެ.

ބޭންކިން ހިދުމަތަށް ބަލާއިރު، އެމްއައިބީ ވެފައިވަނީ މިއަދު ބީއެމްއެލްގެ އެންމެބޮޑު ވާދަވެރިއާ އަށެވެ. އެހެންކަމުން އިއްޔެ އެ ދިމާވި މައްސަލައާ ގުޅިގެން ދިވެހި ރައްޔިތުންގެ ގިނަ ބަޔަކު ބީއެމްއެލްއާ ގުޅޭގޮތުން ތަފާތުއެކި ޝުއޫރުތައް ފާޅުކޮށްފައިވަނިކޮށް، "އެއް ބޭންކަކަށް އަތުގައި ހުރި ހުރިހާ ފައިސާއެއް ނުލާށޭ" ބޭ އިހުތިޔާރުގައިވެސް އެމްއައިބީއަށް ބުނެލެވިދާނެއެވެ.

ބީއެމްއެލްއަކީ ދިވެހި ސަރުކާރާއި ރައްޔިތުން ހިއްސާވާ ބޭންކެކެވެ. މޯލްޑިވްސް އިސްލާމިކް ބޭންކަކީ  އިސްލާމިކް ކޯޕަރޭޝަން ފޯރ ދަ ޑިވެލޮޕްމަންޓް އޮފް ދަ ޕްރައިވެޓް ސެކްޓަރ (އައި.ސީ.ޑީ) ގެ %33 ހިއްސާ އާއި، ދިވެހި ސަރުކާރުގެ %28 އިންސައްތަ ހިއްސާ އޮންނަ ބޭންކެކެވެ. މި ބޭންކްގެ އިތުރު ހިއްސާދާރުންނަކީ، މޯލްޑިވްސް ޕެންޝަން އޮފީސް %10.53، އަމާނާ ތަކާފުލް %8.03، އަދި އާއްމުންގެ %10.44 ހިއްސާ ތަމްސީލްކުރާ އާއްމުންނެވެ.