ނ. އަތޮޅުގައި އާރް.ޓީ.އެލް ފެރީ ދަތުރުކުރުމަށް ސަރުކާރުން ކަނޑައަޅާފައިވާ އަގުތައް އިއުލާން ކޮށްފި

ނ. އަތޮޅުގައި ރާއްޖެ ޓްރާންސްޕޯޓް ލިންކް (އާރް.ޓީ.އެލް) ފެރީ ދަތުރުކުރުމަށް ސަރުކާރުން ކަނޑައަޅާފައިވާ އަގުތައް އިއުލާން ކޮށްފިއެވެ.

އާރްޓީއެލްގެ ޚިދުމަތް ނ. އަތޮޅުގައި ފެށީ ޖުލައި 25 ވަނަ ދުވަހުގައެވެ. އެ ޚިދުމަތް މިހާރު ދެމުންދަނީ ހިލޭ އެވެ. ނަމަވެސް، މި ފެށޭ އޮގަސްޓް މަހުން ފެށިގެން ޚިދުމަތުން އަގު ނަގަން ފަށާނެ ކަމަށް ސަރުކާރުން ބުނެއެވެ.

އެގޮތުން މިއަދު ޓްރާންސްޕޯޓް މިނިސްޓްރީން ވަނީ ދަތުރު ކުރާނެ އަގުތައް އިއުލާން ކޮށްފައެވެ.

އެމްޓީސީސީ އިން ނ. އަތޮޅުގައި އާރްޓީއެލްގެ ހިދުމަތް ދިނުމަށް ބޭނުންކުރަން ނިންމާފައިވަނީ 50 މީހުންގެ ޖާގައިގެ ދެ ފެރީ އެވެ.

ނ. އަތޮޅުގައި އާރްޓީއެލްގެ ފެރީގެ ހިދުމަތް ފެށުމާ އެކު ރާއްޖޭގެ އެންމެ އުތުރުގެ ހަތަރު އަތޮޅު މިހާރު މިވަނީ ފެރީ ނިޒާމަކުން ގުޅާލެވިފަ އެވެ.

ނ. އަތޮޅާއި ޖެހިގެން އޮތް ރ. އަތޮޅުގައި ކުރިއަށް އޮގަސްޓް މަހު އަދި ރ. އަތޮޅާއި ޖެހިގެން އޮތް ބ. އަތޮޅުގައި މިއަހަރުގެ ސެޕްޓެމްބަރު އާރްޓީއެލްގެ ފެރީގެ ހިދުމަތް ފެށުމަށްވެސް ސަރުކާރުން ވަނީ ނިންމާފަ އެވެ. ބ. އަތޮޅާއި ޖެހިގެން އޮތް ޅ. އަތޮޅުގައި މިހާރުވެސް އާރްޓީއެލް ފެރީގެ ހިދުމަތް ދެމުންދެ އެވެ.

މީގެއިތުރުން ރާއްޖޭގެ އެންމެ ދެކުނުގެ ހަތަރު އަތޮޅު ކަމަށްވާ ގއ. އަތޮޅާއި ގދ. އަތޮޅާއި ފުވައްމުލަށް އަދި އައްޑޫވެސް ވަނީ ފެރީގެ ނިޒާމަކުން ގުޅާލާފަ އެވެ.