ހުރާގެ ކޮންމެ ހާފިޡަކަަށް ކައުންސިލުގެ ފަރާތުން ބޮޑު އިނާމެއް؛ 150،000 ރުފިޔާ!

ހުރާ ކައުންސިލްގެ ފަރާތުން ޒުވާން ހާފިޒުން ތަމްރީނު ކުރުމަށް އެރަށުގައި ޚާއްސަ ޕްރޮގްރާމެއް ފަށަން ނިންމައި އެކަން އިއުލާން ކޮށްފިއެވެ.

ހުރާ ކައުންސިލުން މިކަމާއި ގުޅިގެން ކުރި އިއުލާނެއްގައި ބުނީ، އެ ޕްރޮގްރާމްގައި ބައިވެރިވެ ސަނަދު ހާސިލްކުރާ ހުރާގެ ކޮންމެ ހާފިޡަކަށާއި އަމިއްލަ ގޮތުން ސަނަދު ހާސިލް ކުރާ ހުރާގެ ކޮންމެ ހާފިޡަކަށް 150،000 ރުފިޔާ (އެއް ލައްކަ ފަންސާސް ހާސް ރުފިޔާ) ދިނުމަށް ނިންމާފައިވާ ކަމަށެވެ.

އަދި މި ނިންމުން ނިންމާފައިވަނީ، އެ ކައުންސިލްގެ 4 ވަނަ ދައުރުގެ 233 ވަނަ އާއްމު ބައްދަލުވުމުގައި ކަމަށްވެސް ބުނެފައިވެއެވެ.

މި ޕްރޮގްރާމާއި ގުޅޭގޮތުން ”ވޮއިސް“ އަށް މައުލޫމާތު ދެއްވަމުން ހުރާ ކައުންސިލްގެ މެންބަރު އަބްދުالله އިބްރާހީމް ވިދާޅުވީ، މިފަދަ ޕްރޮގްރާމެއް ހިންގުމުގެ ބޭނުމަކީ ހުރާގައި ޤުރުއާން ހިތުދަސްކުރަން ބޭނުންވެސް އެ ފުރުސަތު ނުލިބި ތިބި ކުދިންނަށް ފުރުސަތު ފަހިކޮށްދިނުން ކަމަށެވެ.

އަދި އެ ރަށަކީ ޤުރުއާން ހިތުދަސް ހާފިޒަކު އަދި ނެތް ރަށަކަށް ވުމުން، ރަށުގައި ޤުރުއާން ހިތުދަސް ހާފިޒުންތަކެއް އުފެއްދުމަކީވެސް އެ ޕްރިގްރާމްގެ މަގުސަދެއްކަން އޭނާ ފާހަގަކުރެއްވިއެވެ.

”މިފަދަ ބޮޑު އިނާމެއް ހާފިޡުންނަށް ހުށަހަޅަން ނިންމާފައި މިވަނީ، އެ ދަސްކުރާ މީހުންނަށް ހިތްވަރުދީ އެކަމަށް ބާރު އަޅައި އަގުވަޒަންކުރުމުގެ ގޮތުން.“ އޭނާ ވިދާޅުވިއެވެ.

ކައުންސިލް މެންބަރު އަބްދުالله އިބްރާހީމް ވިދާޅުވި ގޮތުގައި، ހާފިޒުންނަށް ދިނުމަށް ހަމަޖެހިފައިވާ ފައިސާއަކީ އެ ކައުންސިލްގެ ބަޖެޓުގެ ތެރެެއިން ކުރާ ހޭދައެއް ކަމަށެވެ.