އާސެނަލް ކުޅުން ރަނގަޅުނަމަވެސް، މެޗްގެ ނަތީޖާ ރަނގަޅެއްނޫން: އަޓޭޓާ

އިނގިރޭސި ޕްރިމިއާ ލީގްގައި ރޭ އާސެނަލް އާއި މެންޗެސްޓަރ ސިޓީ ބައްދަލުކުރިމެޗް އެއްވަރުވެގެން ނިމިއްޖެއެވެ.

އާސެނަލްގެ އެމިރޭޓްސް ދަނޑުގައި ކުޅުނު މިމެޗް ނިމުނީ 1-1 ގެ ނަތީޖާއަކުންނެވެ. މެޗްގައި އެންމެ ފުރަތަމަ ލަނޑެއް ޖަހައި ކުރިހޯދާފައިވަނީ މެންޗެސްޓަރސިޓީ އެވެ. އެއީ މެޗްގެ 9 ވަނަ މިނެޓް ތެރޭގައި އާލިން ހާލާންޑް ކާމިޔާބުކޮށްދިން ލަނޑުންނެވެ.

މެޗްގައި އާސެނަލުން އެއްވަރުކުރީ ސިތީ މޮޅުވާންދަނިކޮށް، ފަހުހާފުގެ އިތުރު ވަގުތުގެ ކުޅުމުގެ ތެރޭގައި ބަދަލުކުޅުންތެރިއެއްގެ ގޮތުގައި ކުޅެންނިކުތް ބްރެޒިލްގެ ގެބްރިއަލް މާޓިނެއްލީއެވެ. މެޗްގައި އާސެނަލުން ވަނީ 46 ވަނަ މިނެޓްގައި ސަކާ ކުޅެން އަރުވާފައެވެ.

މެޗަށްފަހު ވާހަކަދައްކަމުން އާސެނަލްގެ ކޯޗް މިކޭލް އަޓޭޓާ ބުނީ މެޗްގައި މޮޅަށްކުޅެ ގިނަ ހަމަލާތައް އުފެއްދީ އޭނާގެ ޓީމް ކަމަށެވެ. މެޗް ޑޮމިނޭޓްކުރިނަމަވެސް މޮޅު ނުވީތީ ހިތްހަމަ ނުޖެހޭކަމަށް އަޓޭޓާ ވަނީ ފާހަގަކޮށްފައެވެ.

ރޭގެ މެޗަށްފަހު އިނގިރޭސި ޕްރިމިއާ ލީގް ޕޮއިންޓް ތާވަލް މިހާރު އޮތްގޮތަށް ބަލާއިރު، އާސެނަލް އުޅެނީ ކުޅުނު 5 މެޗުން ލިބުނު 10 ޕޮއިންޓާއެކު ތާވަލުގެ ދެވަނާގައެވެ. މެންޗެސްޓަރ ސިޓީ އުޅެނީ 7 ވަނާގައެވެ. ތާވަލްގެ އެއްވަނާގައި 15 ޕޮއިންޓާއެކު އުޅެނީ ލިވަޕޫލެވެ.