ސުޕްރީމް ކޯޓްގެ ފަނޑިޔާރުންނާ ދެކޮޅު ސިއްރު ބައްދަލްވުމެއް ބޭއްވި ވާހަކައަކީ ދޮގެއް: ގާސިމް

ވިލާގެ ރޯޔަލް އައިލެންޑު ރިސޯޓްގައި އުއްތަމަ ފަނޑިޔާރު އަހްމަދު މުއުތަސިމް އަދުނާނާއި މަޖިލީސް ނާއިބު ރައީސް އަހްމަދު ނާޒިމް ސުޕްރީމް ކޯޓު ފަނޑިޔާރުންނާއި ދެކޮޅަށް ސިއްރު ބައްދަލްވުމެއް ބޭއްވެވި ކަމަށް ބުނާ ވާހަކަ ޖުމްހޫރީ ޕާޓީގެ ލީޑަރު ގާސިމް އިބްރާހިމް ދޮގު ކުރައްވައިފި އެވެ.

މި ބައްދަލްވުމުގައި ގާސިމް ވެސް ބައިވެރިވެވަޑައިގެންނެވި ކަމަށް ބުނެ ވާހަކަ ފަތުރަމުންދެ އެވެ.

ގާސިމް ނެރުއްވި ބަޔާނެއްގައި ވިދާޅުވީ އެފަދަ ވާހަކަތައް ހިމަނާ ލިޔުންތައް ލިޔެ ޝާއިއުކުރާ މީހުންނަކީ މިފަދަ ދޮގު ހަބަރު ފެތުރުމުގައި ހުރި ނުބައިކަމާއި، ފާފަވެރިކަން އިނގިތިބެ، މުޖުތަމައު ފަސާދަ ކުރުމުގެ ބޭނުމުގައި މިފަދަ އަމަލުތަައް ތަކުރާރު ކޮށް ކުރާ މީހުން ކަމަށެވެ.

‏އެ ވާހަކަތަކުގެ ހަގީގަތް ނެތް މިންވަރުގެ އެއް މިސާލަކީ، 2025 ވަނަ އަހަރު ޖަނަވަރީ މަހު، މާލެއިން ރޯޔަލް އައިލެންޑަށް މަޖިލިސް ނައިބު ރައީސް ވަޑައިގެން، އެމަނިކުފާނާއި، އުއްތަމަ ފަނޑިޔާރާއި، މަޖިލީހުގެ ކުރީގެ ރައީސް މުހައްމަދު ޝިހާބު، ރޯޔަލް އައިލަންޑުގައި ބައްދަލު ކުރިކަމަށް ބުނާ ބުނުން ކަމަށް ގާސިމް ވިދާޅުވި އެވެ.

“އަޅުގަނޑުގެ ކުންފުނިން ހިންގާ ރިސޯޓެއް ނަމަވެސް އަޅުގަނޑު ރޯޔަލް އައިލެންޑް އަށް ނުދާތާވެސް މިހާރު ތިން އަހަރު ވެދާނެ. އެންމެ ފަހުން އަޅުގަނޑު ރޯޔަލް އައިލަންޑް އަށް ގޮސްފައިވާނީ 2022 ވަނަ އަހަރުގެ ފެބްރުއަރީ ފަސް ވަނަ ދުވަހު އޮތް ށ އަތޮޅު ކޮމަންޑޫ ދާއިރާގެ ރައްޔިތުންގެ މަޖިލީހުގެ ބައިއިލެކްޝަން ގައި ށ ކޮމަންޑޫ ދާއިރާއަށް ކުރި ދަތުރުގެ ތެރޭގައި،” ގާސިމް ވިދާޅުވު އެވެ.

‏އަދި ވިދާޅުވީ މުހައްމަދު ޝިހާބުވެސް އަދި މިހާރުގެ އުއްތަމަ ފަނޑިޔާރުވެސް ރޯޔަލް އައިލަންޑް ރިސޯޓަށް 2024 އަދި ހިނގަމުން މިދާ 2025 ވަނަ އަހަރުގެ މިހިސާބަށް އެއްވެސް ބޭނުމަކު ވަޑައިގެންފައިނުވާ ކަމަަށެވެ.

‏ގާސިމް ވަނީ ރައްޔިތުންގެ މެދުގައި ފިތުނަ އުފެދޭ ގޮތަށް އެއްވެސް ހަގީގަތެއް ނެތި ސިޔާސީ ބޭނުމުގައި ވަކި ބަޔަކު ފަތުރާ އަދި ފަތުރަމުންދާ މިފަދަ ދޮގު ވާހަކަތައް ހުއްޓުވައި ދިނުމަށް ކަމާބެހޭ ފަރާތްތަކަށް ގޮވާލާފަ އެވެ.

‏