މާފަރު އެއާޕޯޓަށް އަނެއްކާވެސް އިންޓަރނޭޝަނަލް ދަތުރުތަކަށް ހުޅުވާލައިފި

ރަންވޭ ބޮޑުކުރުމުގެ މަސައްކަތް ނިމި، މާފަރު އެއާޕޯޓް އަނެއްކާވެސް އިންޓަރނޭޝަނަލް ދަތުރުތަކަށް ހުޅުވާލައިފިއެވެ.

އެމްޓީސީސީއާ ހަވާލުކޮށްގެން ރަންވޭގެ މަސައްކަތް ކުރުމަށް މާފަރު އެއާޕޯޓް ރަންވޭ ބޮޑުކުރުމުގެ މަަސައްކަތަށް ދަތުރުތައް މެދުކަނޑާލީ، މިއަހަރުގެ މެއިމަހުއެވެ.

މާފަރު އެއާޕޯޓް ރަންވޭ އިތުރަށް ތަރައްޤީކުރުމަށް ފެށި މަޝްރޫޢުގެ ދަށުން ވަނީ، 650 މީޓަރު އިތުރުކުރެވި، ރަންވޭގެ ދިގުމިން 2800 މީޓަރަށް ބޮޑުކޮށްފައެވެ. އެގޮތުން މިހާރު ރަންވޭއަށް ބައިނަލްއަޤްވާމީ އުދުހުންތަކުގައި ބޭނުންކުރާ ބޮއިންގ 777 މަރުކާގެ މަތިންދާބޯޓު ފަހަރަށް ޖެއްސޭނެކަމަށް މާފަރު އެއާޕޯޓް ހިންގާ އައިލެންޑް އޭވިއޭޝަނުން ވަނީ ކުރިން ބުނެފައެވެ.

މާފަރު އިންޓަރނޭޝަނަލް އެއާޕޯޓަކީ ވެލާނާ އިންޓަރނޭޝަނަލް އެއާޕޯޓް ފިޔަވައި ދެން އެންމެ ގިނަ އަދަދަކަށް ޕްރައިވެޓް ޖެޓް ޖައްސާ އެއާޕޯޓެވެ. މާފަރު އެއާޕޯޓަށް މިދިޔަ އަހަރުވެސް ވަނީ ރެކޯޑް އަދަދަކަށް ޖެޓް ޖައްސާފައެވެ.

އައިލެންޑު އޭވިއޭޝަނުން އާއްމުކޮށްފައިވާ ތަފާސް ހިސާބުތަކުން އެނގޭގޮތުގައި މިދިޔަ އަހަރުތެރޭ އެ އެއަރޕޯޓަށް 353 ޕްރައިވެޓް ޖެޓް ޖައްސާފައިވާއިރު މިއީ 2022 ވަނަ އަހަރަށްވުރެ 125 ޖެޓުގެ އިތުރުވުމެކެވެ.

ރާއްޖޭގައި ހިމެނޭ އެންމެ މަތީފަންތީގެ ގިނަ ރިސޯރޓުތަކެއް އެކުލެވޭ ނ. އަތޮޅުގައި އޮންނަ މާފަރު އިންޓަރނޭޝަނަލް އެއަރޕޯޓު މެދުވެރިކޮށް މިދިޔަ އަހަރު 1934 ފަތުރުވެރިން ރާއްޖެއަށް އެތެރެވެފައިވާ އިރު 2082 ފަތުރުވެރިން ރާއްޖެއިން ބޭރަށް ދަތުރުކޮށްފައި ވާކަމަށް އައިލެންޑު އޭވިއޭޝަނުން އާއްމުކޮށްފައިވާ ތަފާސް ހިސާބުތަކުން ދައްކައެވެ.