ވީއައިއޭގެ ޓާމިނަލް 1 ގައި ފަސިންޖަރުންނަށް އަރާމުކުރާ އަދި ޚިދުމަތް ލިބޭ އާ ޖާގައެއް ހުޅުވައިފި
ލިޔުންތެރިޔާ
ސްޓާފް ރައިޓަރ
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވެލާނާ އިންޓަނޭޝަނަލް އެއާޕޯޓުގެ ޓާމިނަލް 1 ގައި ފަސިންޖަރުންނަށް އަރާމުކޮށްލެވޭ ގޮތަށް ތައްޔާރުކުރި އާ ސަރަހައްދެއް ބޭނުންކުރަން ފަށައިފިއެވެ.
އެމްއޭސީއެލް އިން ބުނީ މި ސަރަހައްދާ އެކު ޓާމިނަލްގެ ފުރަތަމަ ފަންގިފިލާއަށް ގާތްގަނޑަކަށް 750 އަކަމީޓަރުގެ ތަނެއް އިތުރުވެފައިވާ ކަމަށެވެ. ފުރުމުގެ ކުރިން ދަތުރުވެރިންނަށް ހިތްފަސޭހަ މާހައުލެއް ލިބޭ ގޮތަށް ފަރުމާކޮށްފައިވާ މި ތަނުގައި ތަފާތު ވައްތަރުގެ ގޮނޑި ވެސް ބަހައްޓާފައިވެއެވެ.
އެ ކުންފުނިން ބުނި ގޮތުގައި ކުޑަކުދިންނަށް ޚާއްޞަ 136 އަކަމީޓަރުގެ ކުޅޭ ސަރަހައްދެއް ވެސް މި ތަނުގައި ތަރައްޤީކޮށްފައިވެއެވެ. އެ ސަރަހައްދުގައި އެކި ލެވެލްތަކުގެ ޕްލެޓްފޯމްތަކާއި ރައްކާތެރި ހޮޅިތަކާއި ވާ އަދި ރިންގު ބޭނުންކޮށްގެން އަރައި ފޭބޭނެ ވަސީލަތްތަކުގެ އިތުރުން ބޯޅަ ކުޅެވޭނެ ޖާގައެއް ހިމެނޭ ކަމަށް އެމްއޭސީއެލް އިން ބުނެފައިވެއެވެ.
މީގެ އިތުރުން ބޭންކް އޮފް މޯލްޑިވްސް (ބީއެމްއެލް) ގެ ކައުންޓަރެއް ވެސް އެ ސަރަހައްދުގައި ޤާއިމުކޮށްފައިވެއެވެ. އެ ކައުންޓަރުން ބޭރު ފައިސާ މާރުކުރުމުގެ ޚިދުމަތާއި ދިވެހި ރައްޔިތުންނަށް ޑޮލަރު ދޫކުރުމުގެ ޚިދުމަތް ލިބޭނެ ކަމަށް އެމްއޭސީއެލް އިން ބުނެފައިވެއެވެ.
ވެލާނާ އިންޓަނޭޝަނަލް އެއާޕޯޓަކީ ޒަމާނީ ފެންވަރެއްގައި ހުރިހާ ފަރާތްތަކަށް ޚިދުމަތް ދެވޭ ތަނަކަށް ހެދުމުގެ ގޮތުން ޓާމިނަލް 1 ގެ ޚިދުމަތްތައް ތަރައްޤީކުރުމުގެ މަސައްކަތް އެމްއޭސީއެލް އިން ދަނީ ކުރަމުންނެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
