އެމްޑީޕީގެ ސިޔާސަތުގައި ލިޔެވިފައި އޮތީ ހަމައެކަނި ވެރިކަން ހޯދުން: ނާޒިމް

ވެރިކަން ހޯދުން ފިޔަވައި އެހެންކަމެއް އިދިކޮޅު އެމްޑީޕީގެ ސިޔާސަތުގައި ނެތްކަމަށް މި ސަރުކާރުގެ ހެލްތު މިނިސްޓަރު ޢަބްދުﷲ ނާޒިމް ވިދާޅުވެއްޖެއެވެ.

ކޮންގްރެސް ޕާޓީގެ ހެންވޭރު ދެކުނު ދާއިރާ ކެމްޕެއިން ޖަގަހަ އިފްތިތާޙް ކުރުމުގެ ޙަފްލާގައި ވާހަކަދައްކަވަމުން ނާޒިމް ވިދާޅުވީ އެމްޑީޕީގެ މަސައްކަތަކީ ހަމައެކަނި ވެރިކަން ހޯދުން ކަމަށެވެ. އެވެރިންގެ ސިޔާސަތުގައި އިތުރު އެހެންކަމެއް ނެތްކަން ފާހަގަކުރައްވަމުން ނާޒިމް ވިދާޅުވީ، އިދިކޮޅު ޕާޓީތަކުގައި ތިބެގެންވެސް މީހުން ޤައުމަށް ޚިދުމަތްކުރާ ކަމަށާއި، އެކަމަކު އިދިކޮޅު އެންމެބޮޑު ޕާޓީގެ ފަރާތުން އެކަމެއް ނުފެންނަ ކަމަށެވެ.

މީހުން ވެރިކަން ކުރަނީ ޤައުމަށް ހިދުމަތްކުރުމުގެ ބޭނުމުގައި ކަމަށާއި، އެމްޑީޕީން މި ޤައުމުގެ ވެރިކަމާ ދެ ފަހަރެއްގެ މަތިން ހަވާލުވި ނަމަވެސް އެބޭފުޅުން އުޅުއްވީ ސަކަރާތްޖެހުމުގައި ކަމަށެވެ. އެގޮތުން ދެން އެ ފުރުސަތު އެގޮތަށް ދޫކޮށްލެވެން ނެތްކަމަށް ރޭގެ ހަފްލާގައި ނާޒިމް ވަނީ ވިދާޅުވެފައެވެ.

ތަރައްޤީވަމުން އަންނަ ޤައުމުތަކަށް އެންމެ މުހިންމު ކަމަކީ ތަރައްޤީ ދެމެހެއްޓެނިވި ގޮތުގައި ކުރިއަށް ދާނެ ނިޒާމެއް އޮތުން. ސިޔާސީ ހަލަބޮލިކަމުގެ ތެރެއަކަށް، ސިޔާސީ ސަކަރާތް ޖެހުމުގެ ތެރެއަކަށް އަޅުގަނޑުމެންނަށް ޤައުމު ދޫކޮށްލެވޭކަށް ނެތް. ހަމައެއާއެކު މި ނިޒާމު މިގޮތަށް ކުރިއަށް ގެންދިއުމަށްޓަކާއި ޑރ. މުޙައްމަދު މުޢިއްޒު މިއަދު އެކަށައަޅުއްވާފައިވާ ސިޔާސަތުތަކާ އެކު އެމަނިކުފާނު އެކުލަވާލެއްވި ޓީމާ އެކު ކުރިއަށް ދިއުމުގެ ވިސްނުން އަޅުގަނޑުމެން އެބަ ގެންގުޅެން ޖެހޭ

މިނިސްޓަރު ޢަބްދުﷲ ނާޒިމް

މިނިސްޓަރު ނާޒިމް ވިދާޅުވީ ރައްޔިތުންނަށް ބަސްބުނުމުގެ މިނިވަންކަންދީ ބޮޑެތި ކަންކަމުގައި ގޮތް ނިންމުމުގައި ރައްޔިތުން އިސްކުރުމަކީ ރައީސް ޑރ.މުހައްމަދު މުއިއްޒު އެންމެ އިސްކަންދެއްވާ އެއް ކަންތައްކަމަށެވެ. ދެ އިންތިހާބު އެއް ދުވަހެއްގައި ބާއްވަން ފެނޭތޯ ރައްޔިތުން ގާތަށްގޮސް ފެންނަ ނުފެންނަ ވޯޓެއް ނަގަނީ މި ދެންނެވި ބީދައިންކަމަށް މިނިސްޓަރު ވިދާޅުވިއެވެ.

އިންތިހާބުތައް މަދުވުމަކީ ސިޔާސީ ލީޑަރުން ރައްޔިތުން ގާތަށް ދިއުން މަދުވުމާ ގުޅުންހުރި ކަމެއް ނޫންކަން ފާހަގަކުރައްވަމުން މިނިސްޓަރު ވިދާޅުވީ، ރައްޔިތުން ބޭނުންވާ ކަންކަން ކޮށްދިނުމަށް މި ސަރުކާރުން އަބަދުވެސް އޮންނާނީ ރައްޔިތުންނާއެކުގައިކަމަށެވެ. އެގޮތުން ވޭތުވެދިޔަ ދެ އަހަރެއްހާ ދުވަހު ރައީސުލްޖުމްހޫރިއްޔާ ޑރ.މުހައްމަދު މުއިއްޒު އާއި އެމަނިކުފާނުގެ ވަޒީރުން ރައްޔިތުންގެ ގާތަށް ޒިޔާރަތްކުރީ އިންތިހާބެއް ބޯމަތިވުމުން ނޫންކަން މިނިސްޓަރު ނާޒިމްގެ ވާހަކާގައި ފާހަގަކުރެއްވިއެވެ.