ބީއެމްއެލުން ހުޅުމާލޭގައި ތަރައްޤީކުރާ 182 ހައުސިން ޔުނިޓްގެ އަމަލީ މަސައްކަތް ފަށައިފި

ސަރުކާރުގެ ބޯހިޔާވަހިކަން އެންމެނަށް ސިޔާސަތުގެ ދަށުން ބޭންކް އޮފް މޯލްޑިވްސް މެދުވެރިކޮށް ހުޅުމާލޭގައި އިމާރާތްކުރުމަށް ނިންމި 182 ހައުސިން ޔުނިޓްގެ އަމަލީ މަސައްކަތް ރަސްމީކޮށް މިރޭ ފަށައިފިއެވެ.

މިކަމަށްޓަކައި ހުޅުމާލެ ފޭސް އެކެއްގައި ބޭއްވި ރަސްމިއްޔާތް ޝަރަފްވެރިކޮށްދެއްވީ ރައީސުލްޖުމްހޫރިއްޔާ ޑރ.މުހައްމަދު މުއިއްޒުއެވެ. މި ރަސްމިއްޔާތުގައި ހައުސިން މިނިސްޓަރު ޑރ.އަބްދުﷲ މުއްތަލިބާއި، ބީއެމްއެލްގެ ޗެއާޕާސަން އަދި މެނޭޖިންގ ޑިރެކްޓަރާއި، މި މަޝްރޫޢުގެ ކޮންޓްރެކްޓަރުގެ އިތުރުން ކަމާބެހޭ ފަރާތްތައް ބައިވެރިވިއެވެ.

މި ރަސްމިއްޔާތުގައި ވާހަކަދައްކަވަމުން ހައުސިން މިނިސްޓަރު ޑރ.އަބްދުﷲ މުއްތަލިބް ވިދާޅުވީ، ބޭންކް އޮފް މޯލްޑިވްސްއިން އިސްނަގައިގެން ސަރުކާރާ ގުޅިގެން ހިންގާ މި މަޝްރޫއަކީ ގައުމީ ބޭންކުގެ ހައިސިއްޔަތުން ދިވެހި ރައްޔިތުންގެ ބޭންކުގެ ހައިސިއްޔަތުން ގައުމަށް ކޮށްދޭ ނުހަނު ބޮޑު ހިދުމަތެއް ކަމަށެވެ.

މިރޭ ބިންގާ އެޅިގެންދާ ސަތޭކަ އައްޑިހަ ދެ ހައުސިންގ ޔުނިޓުގެ ޕްރޮޖެކްޓަކީ ރޭވިފައިވާ ގޮތަށް ނިމިގެންދާނެ މަޝްރޫއެއް ކަމާ މެދު އަޅުގަނޑު އެއްވެސް ޝައްކެއް ނުކުރަން

ހައުސިން މިނިސްޓަރު ޑރ.އަބްދުﷲ މުއްތަލިބް

ބޭންކް އޮފް މޯލްޑިވްސްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފް ވިދާޅުވީ، ބީއެމްއެލްގެ ވިސްނުމަކީ ހަމައެކަނި ވިޔަފާރިކޮށް މާލީ ގޮތުން މަންފާހޯދުން އެކަނި ނޫންކަމަށެވެ. ރައްޔިތުންގެ ލާބައަށްކުރާ މިފަދަ ކަންކަމަކީވެސް އެކުންފުނިން މިހާރު ވަރަށްބޮޑަށް އިސްކަމެއްދޭ ކަމެއްކަމަށް ޝަރީފް ވިދާޅުވިއެވެ.

ހަމައެކަނި މާލީ ފައިދާ ހޯދުމެއް ނޫން. އޭގެ ބަދަލުގައި ޤައުމުގެ އިޖުތިމާޢީ އަދި އިޤްތިޞާދީ ތަރައްޤީއަށް ބޭނުންވާ މުހިއްމު މަޝްރޫޢުތަކަށް އިންވެސްޓްކޮށް ރައްޔިތުންގެ ދިރިއުޅުމުގެ ފެންވަރު މަތިކުރުމަކީ ޤައުމީ ބޭންކެއްގެ އެންމެ މުހިއްމު އެއް ދައުރު

ބީއެމްއެލްގެ ސީއީއޯ ޝަރީފް

މި މަޝްރޫޢުގެ ދަށުން އަޅާ ޓަވަރުގައި ހިމެނެނީ 900 އަކަފޫޓުގެ 3 ކޮޓަރީގެ އެޕާޓްމަންޓްތަކެވެ.

ސަރުކާރުން ބުނީ މި މަޝްރޫޢުގެ މަގްސަދަކީ ރާއްޖޭގެ ހުރިހާ އެންމެނަށް އަތްފޯރާފަށުގައި ފެންވަރު ރަނގަޅު ބޯހިޔާވަހިކަމެއް ފޯރުކޮށްދިނުމެވެ. ބީއެމްއެލްގެ ސަބްސިޑިއަރީ ކުންފުނި، ބީއެމްއެލް އެފޯޑަބަލް ހޯމް ހައުސިން ކުންފުނިން ހިންގާ މި މަޝްރޫޢު ކުރިއަށްގެންދަނީ އެފްޑަބްލިއުއާ ހަވާލުކޮށްގެންނެވެ. އެފްޑަބްލިއު ކުންފުންނަކީ މީގެކުރިން ހުޅުމާލޭގައި ކާމިޔާބުކަމާއެކު ހައުސިން ޔުނިޓްތައް އަޅާ ނިންމާފައިވާ ކުންފުންޏެކެވެ.

ސަރުކާރުން ބުނީ ބޯހިޔާވަހިކަން ފޯރުކޮށްދިނުމަށް ފަށާފައިވާ މި މަޝްރޫޢުގެ ސަބަބުން ދިވެހި ރައްވެހިކަން އާއުސްމިނަކަށް ވާސިލްވެ ދިވެހި މުޖުތަމައުގެ ކޮންމެ ގިންތިއެއް އަދި ފަންތިއެއްގެ ރައްޔިތުން ޝާމިލްވާނެހެން ބާރުވެރި މުޖުތަމައުއެއް ބިނާކުރެވިގެންދާނޭކަމަށެވެ.

ބީއެމްއެލުން ވަނީ ހުޅުމާލެ ފޭސް ތިނެއްގެ އިތުރުން ވިލިމާލޭގައިވެސް ހައުސިން ޔުނިޓްތައް އެޅުމަށް ކޮންޓްރެކްޓަރުންނާ ހަވާލުކޮށްފައެވެ. މި މަޝްރޫޢުތައް 2028 ގެ ކުރިން ނިމޭނޭކަމަށް އެ ބޭންކުން ޔަގީންކަން ދެއެވެ.