މިއަދު އެކަނިވެސް ރާއްޖެ އަންނަން އޮތް 18 ފްލައިޓް ކެންސަލްކުރި: އަމީން

ގަލްފް ޤައުމުތަކުގެ މެދުގައި މިހާރު ހިނގަމުންދާ ހަމަލާބަދަލުކުރުންތަކާ ގުޅިގެން މިއަދު އެކަނިވެސް ރާއްޖެ އަންނަން އޮތް ފްލައިޓްތަކުގެ ތެރެއިން 18 ފްލައިޓް ކެންސަލް ކޮށްފައިވާކަމަށް ދަތުރުފަތުރާއި މަދަނީ އުދުހުންތަކާއި ބެހޭ ވަޒީރު މުޙައްމަދު އަމީން ވިދާޅުއްޖެއެވެ.

ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރު ވަނީ ގަލްފް ޤައުމުތަކުގައި މިހާރު ކުރިއަށްދާ ހަނގުރާމައާ ގުޅިގެން މެދުއިރުމަތީގެ މަޝްރަހް މިވަގުތު ހުރިގޮތުން ރާއްޖޭގެ ވައިގެ ދަތުރުފަތުރަށް ކުރިމަތިވެފައިވާ ނިތަނަވަސްކަމާ ގުޅޭގޮތުން މައުލޫމާތު ހިއްސާކުރައްވާފައެވެ. މިނިސްޓަރު ވިދާޅުވީ މިއަދު ރާއްޖެ އަންނަން ތާވަލްކޮސްފައި އޮތް 53 ފްލައިޓްގެ ތެރެއިން 18 ފްލައިޓެއް ކެންސަލްކޮށްފައިވާކަމަށެވެ.

ކެންސަލްކުރި ހުރިހާ ފްލައިޓް ތަކަކީވެސް ޝެޑިއުލް ފްލައިޓްކަން މިނިސްޓަރު ވިދާޅުވިއެވެ. މެދުއިރުމަތީގެ ޤައުމުތަކަށް ދަތުރުފަތުރުކުރުން ހުއްޓުމަކަށް އައުމުން އެކަމުގެ ނޭދެވޭ އަސަރު ރާއްޖެއަށް ކުރިކަން ފާހަގަކުރައްވަމުން ބޮޑު 18 ފްލައިޓް ކެންސަލްވުމަކީ އިގްތިސާދަށްވެސް ލިބިގެންދާނޭ ގެއްލުމެއްކަން މިނިސްޓަރުގެ ވާހަކާގައި ވަނީ ފާހަގަކުރައްވާފައެވެ.

18 ފްލައިޓް ކެންސަލްވެގެން ދިޔައީމަ އޭގެ އިމްޕެކްޓް އެބަހުރި. އެކަމަކީ މުޅި އިންޑަސްޓްރިއަށް ގޮންޖެހުންތަކެއް ދިމާވާނެ އަދަދެއް. މިދިޔަ މަހުގެ 28 ހުން ފެށިގެން އެހާލަތެއްގައި މިއޮތީ

ޓްރާންސްޕޯޓް މިނިސްޓަރު އަމީން

މިނިސްތަރު ވިދާޅުވީ މެދުއިރުމަތީގެ ދަތުރުތައް ހުއްޓުމާ ގުޅިގެން ރާއްޖޭގައި ނުފުރި ތާށިވިވެފައި 370 އަށްވުރެ ގިނަ ފަތުރުވެރިން އެބަތިބި ކަމަށެވެ. މީގެ ތެރެއިން ސަރުކާރުން ހުރުމުގެ ކަންކަން ހަމަޖައްސައިދީގެން 110 ވަރަކަށް ފަތުރުވެރިން ވެލާނާ އިންޓަރނޭޝަނަލް އެއާޕޯޓްގައި ތިބިކަމަށްވެސް މިނިސްޓަރު ފާހަގަކުރެއްވިއެވެ.

މިނިސްޓަރު އަމީން ވިދާޅުވީ މިއަދު އެ ހާލަތު އޮތްނަމަވެސް ހާއްސަ ހާލަތެއްގައި ދުބާއީއަށް ނިސްބަތްވާ ބައެއް ފްލައިޓްތައް ދަތުރު ކުރަމުން އަންނަކަމަށެވެ. އެގޮތުން ރެއާ މިއަދު ފްލައިޓެއް ވިއައިއޭއަށް ޖެއްސިކަން މިނިސްޓަރު ވިދާޅުވިއެވެ. ދުބާއީ އެއާޕޯޓުން މަދު އަދަދެއްގެ ފްލައިޓްތައް އޮޕަރޭޓްކުރިނަމަވެސް ރާއްޖެއަށް އެންމެގިނައިން އުދުހުންތައް ބައްވަމުން އަންނަ ޤަތަރުގެ މައި އެއާޕޯޓް އަދިވެސް އޮތީ ބަންދުކޮށްފައެވެ.

މިނިސްޓަރު ވިދާޅުވީ މިރެއާ ހަމަޔަށް ޤަތަރުގެ އެއާޕޯޓްގެ ދަތުރުތައް ހުއްޓާލާފައިވާއިރު، ބަހްރެއިން އެއާޕޯޓްވެސް އޮތީ ހުއްޓުމަކަށް އައިސްފައިކަމަށެވެ. ނަމަވެސް އޮމާންގެ މަސްކަޓް އެއާޕޯޓް އޮޕަރޭޝަނުގައި އޮތުމުން އެ އެއާޕޯޓަށް ދަތުރުތައް ކުރަމުން އަންނަކަން މިނިސްޓަރު އަމީން ވަނީ ފާހަގަކުރައްވާފައެެވެ.