ޕޮލްކޯގައި ކޮރަޕްޝަންގެ އެހެނިހެން މައްސަލަތައްވެސް ހުރިކަން ނާޒިމް ފާހަގަކުރައްްވައިފި

ޕޮލްކޯ ފްލެޓް މައްސަލައިގައި ވިސްބްލޯވާއެއްގެ ސިޓީއެއް ރައްޔިތުންގެ މަޖިލީހަށް ލިބިއްޖެ ކަަމަށް މާލިއްޔަތު ކޮމިޓީން ހާމަކޮށްފިއެވެ.

މީގެ ކުރިން އޮޑިޓަރ ޖެނެރަލް ނެރުއްވި ރިޕޯޓްގައި ބްލޫސް ހައުސިން ޕްރޮޖެކްޓްގައި ޝައްކު ކުރެވޭ މުއާމަލާތްތަކެއްގެ މައްސަލަ ފެންމަތިވެފައިވާއިރު، ފަހުން ވަނީ މުހިއްމު ލިޔެކިޔުންތައް ގެއްލިފައިވާކަން ހާމަވެފަ އެވެ. އެންމެ ފަހުން މާލިއްޔަތު ކޮމިޓީ އިން ބޭއްވި ޖަލްސާގައި ޕޮލްކޯ އިން ވަނީީ ބްލޫސް ހައުސިން ޕްރޮޖެކްޓާއި ގުޅުންހުރި ލިޔެކިޔުންތައް ސާވަރއަށް ދިމާވި މައްސަލައެއްގައި ގެއްލިފައިވާ ކަމަށް ހާމަކޮށްފައެވެ.

މާލިއްޔަތު ކޮމިޓީގެ ތެރޭގައި ހިމެނޭ ސަބް ކޮމިޓީއެއްގެ ޗެއާޕާސަން، ދިއްގަރު ދާއިރާގެ މެންބަރު އަޙްމަދު ނާޒިމް ވިދާޅުވީ ކޮމިޓީއަށް ވިސްބްލޯ ކުރި ފަރާތެއްގެ ސިޓީއެއް ލިބިފައިވާ ކަމަށެވެ.

މި މައްސަލައަށް ރިއާޔަތްކުރައްވަމުން ނާޒިމް ވިދާޅުވީ ބްލޫސް ހައުސިން ޕްރޮޖެކްޓް ނޫނަސް އެެހެނިހެން މަސައްކަތްތަކުންވެސް ޕޮލްކޯއިން ކޮރަޕްޝަން ހިންގާ ކަމަށެވެ. ނާޒިމް ވިދާޅުވީ މުދަލާއި ހިދުމަތުގެ ޕްރޮކިއުމެންޓުގެ ސިފައިގައި ޕޮލްކޯއިން ފުޅާ ދާއިރާއެއްގައި ކޮރަޕްޝަންގެ އަމަލުތައް ހިންގާ ކަމަށެވެ.

ނާޒިމް އިތުރަށް ހާމަކުރެއްވި ގޮތުގަައި 2019 ވަނަ އަހަރުގައި ވިސްލްބްލޯވާ މަޖިލީހަށް ފޮނުވި ސިޓީ ކުރީގެ ޕޮލިސް ކޮމިޝަނާ މުޙައްމަދު ހަމީދު އަތަށްވެސް ވިސްލްބްލޯވާ ރައްދުކޮށްފައި ވެއެވެ. ނަމަވެސް ހަމީދު އެކަމަށް އަޅާލާފައި ނުވާ ކަމަށް ބެލެވޭ ކަމުގައި ނާޒިމް  ވިދާޅުވެފައި ވެއެވެ.

ފުލުހުންނަށް ޚާއްސަކޮށްގެން ހައުސިން ޔުނިޓުތަކެއް އަޅަން ޕޮލްކޯއާ ހަވާލުކުރީ 2013 ވަނަ އަހަރެވެ. ފުލުހުންގެ ފްލެޓްތަކުގެ މައްސަލާގައި އޮޑިޓަރ ޖެނެރަލް ނެރުއްވި ރިޕޯޓްގައިވަނީ އެ މަޝްރޫޢުއާ ގުޅޭގޮތުން އެތައް މައްސަލަތަކެއް ފާހަގަކޮށްފައެވެ.

ޕޮލްކޯއާ ހާވަލުކުރުމުން އެ މަޝްރޫއަށް އެއް ބިލިއަނަށް ވުރެ ގިނަ ރުފިޔާ ޚަރަދުވެފައިވާ ކަމަށާއި، އެ މަޝްރޫޢު ހިންގާފައިވާ ގޮތުން ދައުލަތަށް 354.7 މިލިއަން ރުފިޔާ ގެއްލުން ވެފައިވާކަމަށް އޮޑިޓަރ ޖެނެރަލް ވަނީ ފާހަގަކުރައްވާފައެވެ.

އޮޑިޓް ރިޕޯޓުގައި ބުނީ، އެ މަޝްރޫއު ހިންގާފައިވަނީ ކަނޑައެޅިގެން ނޫމަޑީގެ ރެޕްރެޒެންޓޭޓިވަށް ފައިދާވާ ގޮތަށް ކަމަށެވެ. އަދި އެ ފަރާތަކީ ނޫމަޑީގެ ރެޕްރެސެންޓަޓިވް، އައިލެންޑް އެކްސްޕާޓްގެ މެނޭޖިން ޑިރެކްޓަރު އަދި ދެ ކޯމަސްގެ މެނޭޖިން ޑިރެކްޓަރާ އާއިލީ ގުޅުން އޮންނަ މީހެއް ކަމަށް ބެލެވޭ ކަމަށްވެސް ބުނެފައިވެއެވެ. އެ މީހާއަށް ސީދާ ގޮތުންނާއި ނުސީދާ ގޮތުން 682 މިލިއަން ރުފިޔާ ދައްކާފައިވާ ކަމަށް އޮޑިޓް ރިޕޯޓުގައި ބުންޏެވެ.

ޕޮލްކޯގެ ފްލެޓްތަކަކީ އެއް ބިލިއަން ރުފިޔާއަށް ވުރެ ބޮޑު އަގެއް ހަރަދުކޮށްގެން ހަދާފައިވާ ފްލެޓްތަކެއް ކަމަށާއި މާކެޓް އަގުތަކަށް ވުރެ ފްލެޓްތައް އެޅުމުގެ ހަރަދު ބޮޑުވުމުން ކޮންޓްރެކްޓަރުންނަށް ބޮޑު ފައިދާއެއް ލިބުނު ކަމަށް ވެސް އޮޑިޓުގައި ފާހަގަކޮށްފައިވެ އެވެ.

ކޮންޓްރެކްޓަރުން ޕޮލްކޯއަށް ބޮޑެތި އަދަދުތަކުން ފައިސާ ދައްކަން ޖެހޭ ނަމަވެސް އެ ފައިސާ ހޯދުމަށް ޕޮލްކޯއިން މަސައްކަތް ކޮށްފައި ނުވާކަން ރިޕޯޓުން ދައްކަ އެވެ.

ފުލުހުންގެ ފްލެޓްތައް ހަދަމުންދާތާ 11 އަހަރަށްވުރެ ގިނަ ދުވަސްވީނަމަވެސް ފްލެޓްތައް މުޅިން ނިމުމަކަށް އައިސްފައެއް ނުވެއެވެ.