ޖީއެސް އަންހެން ވޮލީބޯޅަ މުބާރާތުގެ މެއިން ސްޕޮންސާ އަކަށް ވިއޭނާ ސްޕޯޓްސް

ކުލަބު ޖީއެސްގެ ފަރާތުން އިންތިޒާމްކޮށްގެން ހއ.ހޯރަފުށީގައި މިއަހަރު ބޭއްވުމަށް ހަމަޖެހިފައިވާ "ޖީއެސް އަންހެން ވޮލީބޯޅަ ޓޯނަމަންޓް 2024" ގެ މެއިން ސްޕޮންސަރ އަކަށް ވިއޭނާ ސްޕޯޓްސް ކުލަބު ހަމަޖައްސައިފިއެވެ.

ޖީއެސް ވިމެންސް ވޮލީބޯޅަ މުބާރާތުގެ މެއިން ސްޕޮންސަރ އަކަށް ވިއޭނާ ސްޕޯޓްސް ހަމަޖެހުމާއި ބެހޭގޮތުން ޖީއެސް ސްޕޯޓްސް ކުލަބުން ބުނީ މެއިން ސްޕޮންސަރެއްގެ ހައިސިއްޔަތުން ވިއޭނާ ސްޕޯޓްސް ކުލަބުން ވެދެއްވި ދީލަތި އެހީތެރިކަމަށް ޝުކުރުވެރިކަމާއެކު ފާހަގަކުރާ ކަމަށެވެ. އަދި ކުޅިވަރު ކުރިއެރުވުމަށާއި އަންހެން އެތުލީޓުން ބާރުވެރިކުރުވުމަށް ވިއޭނާ ސްޕޯޓްސް ކުލަބުން ކުރައްވާ މަސައްކަތަކީ ތައުރީފު ހައްޤު މަސައްކަތްތަކެކެވެ.

މީގެ އިތުރުން އަޅުގަނޑުމެންގެ ޕާޓްނަރަކަށް ވިއެނާ ސްޕޯޓްސް ކްލަބް ހަމަޖެހިގެން ދިއުމަކީ އަޅުގަނޑުމެންނަށް ލިބޭ ޝަރަފެކެވެ. އަދި މި މުބާރާތައް ލިބިގެންދިޔަ އިތުރު ފުރިހަމަކަމެކެވެ.

ފެބުރުއަރީ މަހުގެ 10 ވަނަ ދުވަހު ފެށުމަށް ހަމަޖެހިފައިވާ މިމުބާރާތަކީ ހއ. ހޯރަފުށީގައި ހަރަކާތްތެރިވާ ކުލަބު ޖަމިއްޔާތަކާއި، ސަރުކާރުގެ އޮފީސްތަކާއި ސަރުކާރު ހިއްސާވާ ކުންފުނިތަކާއި، އަމިއްލަ ކުންފުނިތަކުގެ އިތުރުން އަމިއްލަ ވިޔަފާރިތަކަށް ބައިވެރިވުމުގެ ފުރުސަތު ހުޅުވާލައިގެން ބާއްވާ މުބާރާތެކެވެ.

ޗެންޕިްއަން ޓީމަށް 10,000 ރުފިޔާ އަދި ރަނަރަޕް ޓީމަށް 5,000 ގެ ފައިސާގެ އިނާމެއް ހުށަހަޅާފައިވާ މިމުބާރާތުގައި ހަތަރު ޓީމަކުން ބައިވެރިވެފައިވާ މުބާރާތް ކުރިއަށް ގެންދިއުމަށް ހަމަޖެހިފައިވަނީ ލީގު އުސޫލުން ކޮންމެ ޓީމެއް ކޮންމެ ޓީމަކާ އެއް މެޗު ކުޅެ އެންމެ ގިނަ ޕޮއިންޓް ހޯދާ ދެޓީމުގެ މެދުގައި ފައިނަލް ކުޅޭ ގޮތަށެވެ.

މިމުބާރާތުގެ މީޑިއާ ޕާޓްނަރަކަށް ހަމަޖައްސާފައި ވަނީ ވޮއިސް އެވެ.