އަޝްކަރީ ހެލިކޮޕްޓަރުގެ އެގްރީމެންޓުގައި އެންމެ ފަހުން ސޮއިކޮށްފައިވަނީ ރައީސް ޔާމީން - ފޮރިން މިނިސްޓްރީ

އިންޑިއާގެ އަޝްކަރީ ހެލިކޮޕްޓަރު ދިވެހި ސަރުކާރާ ހަވާލުކުރުމަށް ލެޓަރސް އޮފް އެކްސްޗޭންޖުގައި އެންމެ ފަހުން ސޮއިކޮށްފައިވަނީ 2015 ވަނަ އަހަރުގެ ޖެނުއަރީ މަހު ރައީސުލްޖުމްހޫރިއްޔާ އަލްފާޟިލް ޢަބްދުﷲ ޔާމީން ޢަބްދުލްޤައްޔޫމުގެ ސަރުކާރުން ކަމަށް ފޮރިން މިނިސްޓްރީން ހާމަކުރައްވައިފިއެވެ.

މިހެން އެ މިނިސްޓްރީން ހާމަކޮށްފައިވަނީ މިއަދު އެ މިނިސްޓްރީން ދިވެހިރާއްޖޭގައި ހުރި އިންޑިއާގެ ނޭވީ އެޑްވާންސް ލައިޓް ހެލިކޮޕްޓަރުތަކާ ގުޅޭ ގޮތުން އެމިނިސްޓްރީން ނެރުނު ބަޔާނުގައެވެ.

"ފުރަތަމަ ހެލިކޮޕްޓަރު ހަވާލުކުރުމުގެ ލެޓަރސް އޮފް އެކްސްޗޭންޖުގައި ސޮއިކޮށްފައިވަނީ 2010 ވަނަ އަހަރުގެ މާޗް މަހު، ރައީސުލްޖުމްހޫރިއްޔާ އަލްފާޟިލް މުޙަންމަދު ނަޝީދުގެ ސަރުކާރުންނެވެެ. އަދި އެ އެއްބަސްވުން ވަނީ 2012 ވަނަ އަހަރު ރައީސުލްޖުމްހޫރިއްޔާ ޑރ މުހަންމަދު ވަހީދު ހަސަންގެ ސަރުކާރުންނާއި 2014 ވަަނަ އަހަރު ރައީސުލްޖުމްހޫރިއްޔާ އަލްފާޟިލް ޢަބްދުﷲ ޔާމީން ޢަބްދުލްޤައްޔޫމުގެ ސަރުކާރުން އާކޮށްފައެވެ. ދެވަނަ ހެލިކޮޕްޓަރު ދިވެހި ސަރުކާރާ ހަވާލުކުރުމަށް ލެޓަރސް އޮފް އެކްސްޗޭންޖުގައި ސޮއިކޮށްފައިވަނީ 2015 ވަނަ އަހަރުގެ ޖެނުއަރީ މަހު ރައީސުލްޖުމްހޫރިއްޔާ އަލްފާޟިލް ޢަބްދުﷲ ޔާމީން ޢަބްދުލްޤައްޔޫމުގެ ސަރުކާރުން" ދިވެހި ސަރުކާރުގެ ބަޔާނުގައި ވެއެވެ.

ދިވެހި ސަރުކާރުން މިފަދަ ބަޔާނެއް ނެެރެފައިމިވަނީ ރާއްޖެ އިންޑިއާގެ ޒަމާންވީ ގުޅުން ބަދަހިވަމުން އަންނަ ދަނޑިވަޅެއްގައި އިދިކޮޅުފަރާތްތަކުން ކުރަމުން ގެންދާ ތުހުމަތުތަކާގުޅިގެންނެވެ. އެގޮތުން ރާއްޖޭގައި އިންޑިއާގެ މިލިޓަރީ ބޭސް އެއް ސަރުކާރުން އަޅަން އުޅޭކަމާއި، ހެލިކަޕްޓަރު ބެލުމައް ތިބޭ އިންޑިއާގެ ސިފައިން އިތުރުކުރަން ސަރުކާރުން އެއްބެސްވެފައިވާކަމަށް އިދިކޮޅު ޕީޕީއެމްއިން ތުހުމަތުކުރެއެވެ.

މީގެ އިތުރުން ރައީސް ޔާމީން ވަނީ ރާއްޖޭގައި އިންޑިއާގެ ސިފައިންނާއި ހެލިކޮޕްޓަރު އޮތުމަކީ ޤައުމުގެ އިސްތިގްލާލަށް ބުރޫ އަރާކަމެއްގޮތުގައި ސިފަކުރައްވާފައެވެ.

މިބަޔާނުގއި ޖޮއިންޓް އެކްސަރސައިސްތަކާއި ތަމްރީނާއި ދިވެހިރާއްޖޭގެ ކަނޑުގެ ސަރަހައްދު މޮނިޓަރ ކުރުން ފަދަ ޖޮއިންޓް އޮޕަރޭޝަންތަކާމެދުވެސް ވަނީ އަލި އަޅުވާލާފައެވެ.

އެގޮތުން ތަފާތު އެއްބަސްވުންތަކުގެ ދަށުން، އެމެރިކާ އަދި ސްރީ ލަންކާ ފަދަ ޤައުމުތަކާއެކުވެސް މިފަދަ ޖޮއިންޓް އޮޕަރޭޝަންތައް ދަނީ ހިންގަމުންކަމަށާއި މީގެ އިތުރުން އެހެން ޤައުމުތަކުން ހިންގާ އޮޕަރޭޝަންތަކުގައިވެސް ދިވެހި ސިފައިން ދަނީ ބައިވެރިވަމުންކަމުގައި އެބަޔާނުގައި ހާމަކުރައްވާފައިވެއެވެ.

އެގޮތުން އިންޑިއާގެ ނޭވީގެ އެޑްވާންސް ލައިޓް ހެލިކޮޕްޓަރުތަކަކީ މި ގުޅުމުގެ ތެރެއިން، ސަރޗް އެންޑް ރެސްކިއު އޮޕަރޭޝަންތަކާއި، ބަލި ހާލަތުގައި މީހުން އެއް ރަށުން އަނެއް ރަށަށް އުފުލުމާއި، ކަނޑުގެ ސަރަހައްދު މޮނިޓަރ ކުރުން ފަދަ ކަންކަން ހިންގުމުގައި ދިވެހިރާއްޖޭގެ ދިފާޢީ ބާރުތަކަށް އެހީވުމުގެ ގޮތުން ދިވެހި ސަރުކާރާ ހަވާލުކޮށްފައިވާ ދެ ހެލިކޮޕްޓަރުކަން ވެސް އެބަޔާނުގައި ފާހަގަކޮށްފައިވެއެވެ.

މިހާތަނަށް، ދެ ހެލިކޮފްޓަރު ވަނީ ކުއްލި ހާލަތުގައި 151 ބަލި މީހުން އުފުލާފައެވެ. އަދި ސާޗް އެންޑް ރެސްކިއުގެ 50 އޮޕަރޭޝަނެއްގައި ބޭނުންކޮށްފައެވެ.