ޕާޓާ ޓްރެވަލް މާޓް 2024 ގައި ރާއްޖެ އިސްތިހާރުކޮށްފި

ތައިލެންޑުގެ ބެންކޮކުގައި އޮގަސްޓް 27 އިން 29 އަށް ބޭއްވުނު ޕާޓާ ޓްރެވަލް މާޓް 2024 ގައި ދިވެހިރާއްޖޭގެ ފަތުރުވެރިކަމުގެ ސިނާއަތުން ބައިވެރިވެ، ކާމިޔާބުކަމާއެކު ފެއާ ނިންމާލައިފިއެވެ.

ޕެސިފިކް އޭޝިއާ ޓްރެވަލް އެސޯސިއޭޝަން (ޕާޓާ) އިން އިންތިޒާމުކޮށްގެން ބޭއްވުނު މި ފެއާ އޮތީ ކުއީން ސިރިކިޓް ނޭޝަނަލް ކޮންވެންޝަން ސެންޓަރުގައެވެ.

މި ފެއާގައި ދިވެހިރާއްޖެ ތަމްސީލުކޮށްފައިވަނީ މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އާއި މޯލްޑިވްސް މާކެޓިންގ އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ / ވިޒިޓް މޯލްޑިވްސް) ގުޅިގެންނެވެ.

ތިން ދުވަހުގެ މުއްދަތަށް ކުރިއަށްދިޔަ މި ފެއާގައި ދިވެހިރާއްޖޭގެ ގުދުރަތީ ރީތިކަމާއި، ކަނޑުއަޑީގެ ހިތްގައިމު މަންޒަރުތަކާއި ދިރުންތަކުގެ އިތުރުން ދިވެހިރާއްޖޭގައި ޗުއްޓީ ހޭދަކުރަން ހުރި އެކި ފަންތީގެ ޕްރޮޕަޓީތަކާއި ފުރުސަތުތައް ވަނީ އިޝްތިހާރުކޮށްފައެވެ.

މި ފެއާގައި ބައިވެރިވެވަޑައިގެންނެވި ފަރާތްތަކުގެ ތެރޭގައި އެމްއެމްޕީއާރުސީގެ ޗެއާޕާސަން އަބްދުﷲ އިޔާސް ރިޔާޒް، އެމްއެމްޕީއާރުސީގެ ސީއީއޯ އަދި އެމްޑީ އިބްރާހިމް ޝިއުރީ، އަދި މަޓާޓޯގެ ސީއީއޯ އައިމިނަތު ސުޒާން ހިމެނެއެވެ. މި ބޭފުޅުން ވަނީ ރާއްޖޭގެ ފަތުރުވެރިކަމުގެ ސިނާޢަތުގެ އެހެނިހެން ފަރާތްތަކާއެކު މި ފެއާގައި ބައިވެރިވެވަޑައިގެންފައެވެ.
ދިވެހިރާއްޖޭގެ ސްޓޭންޑުގައި ފަތުރުވެރިކަމުގެ ސިނާޢަތުގެ ނަން މަޝްހޫރު ފަރާތްތަކުގެ ތެރެއިން ދިގުފަރު އައިލެންޑް ރިސޯޓް، ފުރަވެރި މޯލްޑިވްސް، އިނަރ މޯލްޑިވްސް، ޕްލަމޭރިއާ، ރިޔޯކޯ މޯލްޑިވްސް، ސްޓޯން ހޮޓެލްސް މޯލްޑިވްސް، ސަން ސިޔާމް ޓްރެވަލްސް އަދި ކާނި ހޮޓެލްސް އެންޑް ރިސޯޓް އިން ވެސް ބައިވެރިވެފައިވެއެވެ.

މި ފެއާގައި ރާއްޖެއިން ލިބެންހުރި ތަފާތު ތަޖުރިބާތައް ދައްކާލާފައިވާއިރު މީގެ ތެރޭގައި މަޖާ މޫދު ކުޅިވަރުގެ ހަރަކާތްތަކާއި އައިލެންޑް ރިޓްރީޓްތައް ހިމެނެއެވެ. އަދި 'ދިވެހިރާއްޖެ-ސަނީ ސައިޑް އޮފް ލައިފް' އަކީ ހުރިހާ ފަރާތްތަކުން ވެސް ބޭނުންވާފަދަ ތަފާތު ތަޖުރިބާތަކެއް ލިބެންހުރި ފަތުރުވެރި މަންޒިލެއްގެ ގޮތުގައި މި ފެއާގައި ވަނީ އިޝްތިހާރުކުރެވިފައެވެ.

"ފަތުރުވެރިކަމަކީ ރާއްޖޭގެ މައި ސިނާއަތަށްވާއިރު މި ސިނާއަތަށް ދެމެހެއްޓެނިވި ކުރިއެރުންތަކެއް ހޯދުމަށް ބައިނަލްއަޤްވާމީ ފަރާތްތަކާ އެކު މަސައްކަތްކުރުމަށް ރާއްޖެއިން ކުރާ މަސައްކަތަށް އިތުރު ބާރެއް މި ފެއާގެ ސަބަބުން ލިބިގެން ހިނގައްޖެ"

އެމްއެމްޕީއާރުސީގެ ސީއީއޯ އަދި އެމްޑީ އިބްރާހިމް ޝިއުރީ

މިފަހަރުގެ ޕާޓާ ޓްރެވަލް މާޓް ކުރިއަށްގެންދިޔައީ ހާއްސަ ހަރަކާތްތަކާއެކުގައެވެ. އެއީ ތައިލެންޑުގައި ޕާޓާ ގާއިމުކުރިތާ 25 އަހަރު ފުރުން ފާހަގަކުރުމާވެސް އެކުގައެވެ.