ދޮންއަދަރާދަ މަގުގައި އިލެކްޓްރިކް ވެހިކަލް ޗާޖިންގ ސްޓޭޝަނެއް ޤާއިމްކުރުމަށް ސްޓެލްކޯއިން ނިންމައިފި
ލިޔުންތެރިޔާ
ފާޠިމަތު އިނާ ސަވާދު
ދޮންއަދަރާދަ މަގުގައި އިލެކްޓްރިކް ވެހިކަލް ޗާޖިންގ ސްޓޭޝަނެއް ޤާއިމްކުރުމަށް ސްޓެލްކޯއިން ނިންމާފައިވާކަމަށް ސްޓެލްކޯގެ މެނޭޖިން ޑިރެކްޓާރ ހުސެއިން ފަހުމީ ވިދާލުވެއްޖެއެވެ.
ފަހުމީ މިފަދައިން ވިދާޅުވީ އެކްސްގައި ކުރެއްވި ޕޯސްޓެއްގައެވެ. މި ޕޯސްޓުގައި ފަހުމީ ވިދާޅުވީ އެ ކުންފުނީގެ ހެޑް އޮފީހާއި އިންވެގެން އޮންނަ ދޮންއަދަރާދަ މަގުގައި އިލެކްޓްރިކް ވެހިކަލް ޗާޖިންގ ސްޓޭޝަނެއް ޤާއިމްކުރުމަށް މިހާރު ނިންމާފައިވާ ކަމަށާއި މި ޗާޖިންގ ސްޓޭޝަންގެ މަސައްކަތްތައް މިހާރުވެސް ކުރެވެމުންދާ ކަމަށެވެ.
މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ތިމާވެށީގެ ހަރުދަނާ ސިޔާސަތުތަކުގެ ތެރެއިން ކާބަން ފުޓްޕްރިންޓް ކުޑަކުރުމަށް އަޅުއްވާ ފިޔަވަޅެއްކަމަށްވެސް ވިދާޅުވިއެވެ.
މި މަޝްރޫޢުގެ މަޤްޞަދަކީ ތިމާވެއްޓާ ރައްޓެހި އުޅަނދުފަހަރަށް އޮންނަ ޑިމާންޑް އިތުރުވަމުން އަންނާތީ، އެފަދަ އުޅަނދުތައް ގެންގުޅޭ ފަރާތްތަކަށް ލުއިފަސޭހަ ކަން ހޯދައިދިނުމާއި، އިލެކްޓްރިކް ވެހިކަލް ގެންގުޅުމަށް ހިތްވަރުދިނުންކަމުގައިވެސް ފަހުމީ ވަނީ ވިދާޅުވެފައެވެ.
ސްޓެލްކޯއިން މި މަޝްރޫޢާ ގުޅޭގޮތުން ސިޓީ ކައުންސިލާ މަޝްވަރާކޮށްފައިވާ ކަމަށާއި ކައުންސިލްގެ ފުރިހަމަ އެއްބާރުލުން ލިބޭނެ ކަމުގެ ޔަޤީންކަން ލިބިފައިވާ ކަމަށް ވެސް ފަހުމީ ވިދާޅިވިއެވެ.
މި ޗާޖިންގ ސްޓޭޝަންގެ މަސައްކަތް މިހާރުވެސް ކުުރިއަށްދާއިރު، މިތަނުން ހަތަރު ފުރޮޅުލީ އުޅަނދުގެ އިތުރުން ދެ ފުރޮޅުލީ އުޅަނދުތައްވެސް ޗާޖްކުރެވޭނެ ގޮތަށްހަދާ ސްޓޭޝަނެއްކަމަށާއި ކައިރި މުސްތަގުބަލެއްގައި ރައްޔިތުންނަށް މި ސްޓޭޝަނުން ހިދުމަތް ލިބޭނޭކަމަށް ވެސް ފަހުމީ ވަނީ ވިދާޅުވެފައެވެ.
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
