ކެނދިކުޅުދޫ ގޮނޑުދޮށަށް ކުނި އަޅައި ކުނި އަންދާތީ ކައުންސިލުން ކަންބޮޑުވުން ފާޅުކޮށްފި

ނ. ކެނދިކުޅުދޫގެ އަތިރިމައްޗަށް ކުނި އަޅާ މައްސަލައާއި، އާންމު ރައްޔިތުންނަށް އުނދަގޫވާ ގޮތަށް ކުނި ރޯކޮށް އަންދާ މައްސަލައިގައި އެ ރަށު ކައުންސިލުން ކަންބޮޑުވުން ފާޅުކޮށްފިއެވެ.

ކެނދިކުޅުދޫ ކައުންސިލުން ރޭ ވަކިވަކިން ކުރި ދެ އިއުލާނެއްގައި ބުނީ، ކެނދިކުޅުދޫގެ އަތިރި މައްޗަށް ކުނި އެޅުމުގެ ސަބަބުންނާއި ފަތްކުނި ގިނަވުމުގެ ސަބަބުން އުފެދިފައިވާ ކުނި ގޮނޑުތައް ނަގާއި، ރަށުގެ ގޮނޑުދޮށާއި ހޭޅިފަށް ފަހުގެ ތާރީޚެއްގައި ވަނީ ސާފުކޮށްފައި ކަމަށެވެ. ނަމަވެސް ބައެއް ފަރާތްތަކުން ކުންޏާއި އަދި އެނޫންވެސް އެހެނިހެން ތަކެތި ހޭޅިފަށަށްނެރެ ބަހައްޓައި، ސާފުކޮށްފައިވާ ސަރަހައްދު ގޮނޑު ކުރަމުންދާކަމުގެ ޝަކުވާ އެ ކައުންސިލަށް ލިބޭ ކަމަށް އިއުލާނުގައި ބުންޏެވެ.

އަދި އެކަމަކީ ރާއްޖޭގެ ތިމާވެށި ރައްކާތެރިކޮށް ދެމެހެއްޓުމާއި ބެހޭ ޤާނޫނާއި އެ ކައުންސިލުގެ ކުނި އުކާލުމާއި ކުނި ނައްތާލުމާބެހޭ ގަވާއިދުގެ ދަށުން މަނާކަމެއް ކަމެއް ކަމަށް ބަޔާންކޮށްފައިވާއިރު، އެ ރަށުގެ ހޭޅިފަށާއި ގޮނޑުދޮށުގައި އަމިއްލަ ފަރާތެއްގެ އެއްވެސް މުދަލެއް އަދި އެއްވެސް އެއްޗެއް ބަހައްޓާފައިވާނަމަ މި އަންނަ ބުރާސްފަތީގެ ކުރިން އެތަކެތި ނެގުމަށް ވެސް ކައުންސިލުން ވަނީ އިލްތިމާސްކޮށްފައެވެ.

މީގެ އިތުރުން، އާންމު ރައްޔިތުންނަށް އުނދަގޫވާ ގޮތަށް ކުނި ރޯކޮށް އަންދާ މައްސަލައިގައި އެ ކައުންސިލުން ނެރުނު އިއުލާނުގައި ބުނީ، އާންމުންގެ ޙިޔާލާ މަޝްވަރާގެ މަތިން، ކެނދިކުޅުދޫގައި ކުނި މެނޭޖްކުރުމަށް ލުޔެއް ދިނުމުގެ ގޮތުން އެ ކައުންސިލުން މިދިޔަ ޖުލައި މަހުގެ 21 ވަނަ ދުވަހު ކުރި އިއުލާނުގައިވާ ވަގުތުތަށް ފިޔަވައި، ވަކި ވަގުތެއް ބެލުމެއްނެތި އެކިތަންތަނުގައި އަލިފާން ރޯކޮށް ކުނިއެންދުމާއި، ދިރިއުޅުމަށް ދޫކުރެވިފައިވާ ބައެއް ގޯތިތައް ސާފުކުރުމަށްފަހު ކުނި ނައްތާލުމުގެ ބޭނުމުގައި، ވަކި ވަގުތަކަށް ބެލުމެއް ނެތި ކުނި އެންދުން ޢާންމު ވެފައިވާ ކަމަށެވެ.

އަދި އަވަށުތެރޭގައި މީހުން ދިރިއުޅޭ ސަރަޙައްދު ތަކުގައިވެސް އަލިފާން ރޯކޮށް ކުނިއަންދަމުންދާތީ އެކަމުގެ ޝަކުވާ ތަކުރާރުކޮށް އެ ކައުންސިލަށް ލިބޭ ކަމަށް ވެސް އެ އިއުލާނުގައި ބުންޏެވެ.

އެހެންކަމުން މިއަދުން ފެށިގެން އެ ކައުންސިލުން ދީފައިވާ ޚާއްސަ ހުއްދައާއި ހިލާފަށް ރޯކުރާ ގެވަޅުތަކުގައި އަދި މީހުން ދިރިއުޅޭ ގެތަކާއި ކައިރީގައި ވާ ގެވަޅުތަކުގައި އަލިފާން ރޯކުރުމަކީ މަނާކަމެއްކަމަށް ކައުންސިލުގެ އިއުލާނުގައި ބުންޏެވެ.

ކައުންސިލުން "ހުކުރު ދުވަހު ހެނދުނު ގެވަޅުތަކުގައި ފަތްކުނި އެންދުމަށް" ދޫކޮށްފައިވާ ހުއްދައަކީ އިމާރާތާއި ގޯތީގެ ރަޖިސްޓްރީ ހަދާފައިވާ އެއްވެސް ތަނަކަށް ދެވިފައިވާ ޙާއްސަ ހުއްދައެއް ނޫންކަމުން، އެފަދަ އެއްވެސް ތަނެއްގައި ރޯކުރުމަކީ މަނާ ކަމެއް ކަމުގައި ދަންނަވަމެވެ. އަދިހަމައެހެންމެ، މިއަދުން ފެށިގެން ކައުންސިލުން ދީފައިވާ ޚާއްސަ ހުއްދައާއި ހިލާފަށް ރޯކުރާ ގެވަޅުތަކުގައި އަދި މީހުން ދިރިއުޅޭ ގެތަކާއި ކައިރީގައި ވާ ގެވަޅުތަކުގައި އަލިފާން ރޯކުރުމަކީ މަނާކަމެއްކަމާއި، އަދި މިއުސޫލުން ބޭރުން އެފަދަ ކަންކަން ތަކުރާރުވަމުން ދާނަމަ ދީފައިވާ ހާއްސަ ހުއްދަ ބާތިލުކޮށް، މިފަދަގެވަޅުތަކުގައި ރޯކުރުން މަނާ ގެވަޅެއްގެ ގޮތުގައި ކަނޑައެޅުމަށް ކައުންސިލުގެ 152 ވަނަ ޖަލްސާއިންވަނީ ނިންމާފައެވެ.

ނ. ކެނދިކުޅުދޫ ކައުންސިލް

އެހެންކަމުން ކައުންސިލުން ވަނީ އެފަދަ ކުށްތައް ކުރާ ފަރާތްތައް ފާހަގަކޮށް،ވއެފަރާތްތަކާއި މެދު ޤާނޫނާއި ގަވާއިދާއި އެއްގޮތްވާ ގޮތުގެ މަތިން ފިޔަވަޅުއަޅާނެ ކަމުގެ އިންޒާރު ދީފައެވެ.