ޤައުމީ ޓީމްގެ ކޯޗްކަމާ ހަވާލުވުމަށް އުރުބާނީ ރާއްޖެ އަތުވެއްޖެ

ޤައުމީޓީމްގެ ކޯޗްކަމުގެ މަޤާމާ ހަވާލުވުމަށް ހަންގޭރީއަށް އުފަން އިސްޓަވާން އުރުބާނީ އަނެއްކާވެސް ރާއްޖެ އަތުވެއްޖެއެވެ.

އުރުބާނީ ރާއްޖެ އައުމުން ވެލާނާ އިންޓަރނޭޝަނަލް އެއާޕޯޓުން މަރުހަބާ ދެންނެވީ، ފުޓްބޯޅަ އެސޯސިއޭޝަން އޮފް މޯލްޑިވްސްގެ ނައިބު ރައީސް ހުސައިން ޝާފިއު އާއި، އުރުބާނީ އާއެކު ޤައުމީޓީމްގައި މަސައްކަތްކުރި ލެޖެންޑަރީ ގޯލްކީޕަރު އިމްރާނު މުހައްމަދާއި އެފްއޭއެމްގެ ބައެއް އޮފިޝަލުންނެވެ.

ޤައުމީޓީމްގެ ހެޑް ކޯޗެއްގެ އިތުރުން ޓީމްގެ ޓެކްނިކަލް ޑައިރެކްޓަރުގެ މަޤާމުވެސް އަދާކުރާނީ އުރުބާނީއެވެ. އުރުބާނީ އަދި ރަސްމީކޮށް ޤައުމީތީމްގެ ޒިންމާތަކާ ހަވާލުނުވިނަމަވެސް މި ހަފްތާގެ ތެރޭގައި ލިޔެކިޔުންތައް ނިންމުމަށް މަސައްކަތް ކުރަމުންދާކަމަށް ވޮއިސްއަށް ވަނީ މައުލޫމާތު ލިބިފައެވެ.

އުރުބާނީ ވަނީ މީގެ ކުރިން ދެފަހަރެއްގެ މަތިން ޤައުމީ ޓީމަށް އިރުޝާދު ދީފައެވެ. އެހެންކަމުން މިއީ އޭނާ ޤައުމީޓީމާ ހަވާލުވާ ތިންވަނަ ފަހަރެވެ. އުރުބާނީ އެންމެ ފުރަތަމަ ޓީމާ ހަވާލުވީ، 2009 ވަނަ އަހަރުގެ ތެރޭގައެވެ. އުރުބާނީގެ އިރުޝާދުގެ ދަށުން އެއަހަރު ސާފް ޗެމްޕިއަންޝިޕް ފައިނަލަށް ރާއްޖެ ގެންގޮސްދިންއިރު، 2012 ވަނަ އަހަރު ވަނީ ލަންކާގައި ބޭއްވި އިންވިޓޭޝަނަލް މުބާރާތުގެ ޗެމްޕިއަންކަން ހޯދާފައެވެ.

އުރުބާނީގެ އިރުޝާދުގެ ދަށުން ރާއްޖޭގެ ޤައުމީޓީމްގެ ކުޅުމުގެ ސްޓައިލް ތަފާތުކޮށް ފެނިގެންދިޔައިރު، އޭނާ ވަނީ ހަންގޭރީގެ އިތުރުން އެމެރިކާގެ ބައެއް ޓީމްތަކަށްވެސް ކޯޗްކަންކޮށްދީފައެވެ.