މޫސުން ރަނގަޅެއް ނުވޭ؛ ކަނޑުތައް ވަރަށް ގަދަވާނެ ކަމަށް ލަފާކޮށް ރީނދޫ ސަމާލު ދަންމާލައިފި

ރާއްޖޭގެ ބޮޑު ސަރަޙައްދަކަށް މޫސުން ގޯސްވާނެކަމަށް ލަފާކޮށް މޫސުމާ ބެހޭ ޤައުމީ އިދާރާ، މެޓް އޮފީހުން ނެރުނު ރީނދޫ ސަމާލުގެ ވަގުތު އަނެއްކާވެސް ދަންމާލައިފިއެވެ.

މޫސުމާ ބެހޭ ޤައުމީ އިދާރާއިން އެންމެ ފުރަތަމަ ރީނދޫ ސަމާލު ނެރުނީ ހެނދުނު 7:30 އިން 11:30 އަށެވެ. އެ ސަމާލު 15:30 އަށް ދަންމާލުމަށްފަހު މިހާރު ވަނީ މިރޭ 19:30 އާ ހަމައަށް ރީނދޫ ސަމާލު ނެރެފައެވެ.

އެންމެ މޫސުން ގޯސްވާނެ ކަމަށް ލަފާކޮށް ރީނދޫ ސަމާލު ނެރެފައިވަނީ  ހއ. އަތޮޅުން ފެށިގެން ތ. އަތޮޅާ ހަމައަށެވެ.

މެޓް އޮފީހުން ބުނި ގޮތުގައި، މި ވަގުތުތަކުގައި ގަޑިއަކު 25 މޭލާއި 30 މޭލާ ދެމެދުގެ ބާރުމިނެއްގައި ވައިގަދަވާނެއެވެ. އަދި ވިލާގަނޑުގައި 50 މޭލަށް ވައިގަދަވެ ކަނޑުތައް ވަރަށްގަދަވާނެއެވެ.

ރާއްޖެއަށް ކުރަމުންދާ ވިއްސާރައިގައި މޫސުން ގޯސްވެ، ކަނޑުމަތީގެ ނުރައްކާތެރި ހާދިސާތައް ހިނގުން އިތުރުވަމުންދާތީ، ކަނޑުދަތުރުފަތުރު ކުރުމުގައި ހާއްސަ ސަމާލުކަމެއް ދިނުމަށް ދިވެހި ފުލުހުންގެ ޚިދުމަތުން މިއަދު ވަނީ އިލްތިމާސްކޮށްފައެވެ.

އަދި ކޮންމެހެން ކުރަންޖެހޭ ދަތުރެއް ނޫނީ ނުކުރަންވެސް އެދިފައިވާއިރު، ދަތުރަށް އެރުމުގެ ކުރީން ރައްކާތެރިކަމުގެ ފިޔަޅު އެޅުމަށްވެސް އެދިފައިވެއެވެ.