އިތުރުފުޅު ހައްދަވަނީ ރައީސް ސާލިހްތަ ނޫނީ ރައީސް މުޢިއްޒުތަ؟

މިދިޔަ އަހަރު ރާއްޖޭގައި ބޭއްވުނު ރިޔާސީ އިންތިޚާބުގެ ތެރޭގައި އެންމެ ބޮޑު ބަހުސަކަށް ވެފައި އޮތް ރާއްޖޭގައި ތިބި ކަމަށް ބުނަމުންދިޔަ އިންޑިއާ ސިފައިންގެ މައްސަލައިގެ ހައްސާސުކަން މިއަދު އެބަ ވަޒަން ކުރެވެއެވެ. އިންޑިއާ ސިފައިން ރާއްޖޭގައި ތިބިކަމަށް ބުނާ ކޮންމެ ފަހަރަކު ރައީސް އިބްރާހީމް މުޙައްމަދު ސާލިހާއި އެމަނިކުފާނުގެ ޚާރިޖީ ވަޒީރު އަބްދުﷲ ޝާހިދާއި ޑިފެންސް މިނިސްޓަރ މާރިޔާ އަހްމަދު ދީދީ އެވާހަކަތައް ދޮގު ކުރެއްވިއެވެ. މިއަދުވެސް މިބޭފުޅުންގެ ވާހަކަތައް ހުރީ އެގޮތަށެވެ.

ރައީސް ޑޮކްޓަރ މުޙައްމަދު މުޢިއްޒަކީ ދޮގުވެރިއެއްކަން ރައްޔިތުންނަށް ސާބިތުކޮށްދެއްވަން އެ ވިދާޅުވަނީ އިންޑިއާ ސިފައިން ކޮބައިހެއްޔެވެ. ހުސްދޮގެވެ. ވެރިކަމަށް ވަޑައިގަތީ އެ ދޮގު ވިއްކައިގެންނެވެ. އެބޭފުޅުންގެ ވާހަކަ ގަބޫލު ކުރާ އެމްޑީޕިއަނުންވެސް ކުރާ ސުވާލަކީ އިންޑިއާ ސިފައިން ކޮބައިހެއްޔެވެ. މުއިއްޒަކީ ދޮގުވެރިއެކެވެ.

ދިވެހިރާއްޖޭގައި އިންޑިއާ ސިފައިން އެބަތިބި ކަމަށް ޚުދު އިންޑިއާ ސަރުކާރުން އެބަ އިއުތިރާފްވެއެވެ. އިންޑިއާގެ ނޫސްތަކުން އެވާހަކަތައް އެބަ ކަށަވަރުކޮށްދެއެވެ. ސިފައިން ބޭލުމުގެ ވާހަކަތައް ދެގައުމުގެ ދެމެދުގައި ރަސްމީކޮށް އެއޮތް ހިނގަމުންދަނީއެވެ. އިންޑިއާގެ ނޫސްތަކުގައި އެގައުމުގެ ނޭވީ ޗީފް އާރް. ހަރީ ކުމާރު ވިދާޅުވިކަމަށް އިއްޔެ ލިޔެފައި އޮތީ ދިވެހިރާއްޖޭގައި ތިބި އިންޑިއާ ސިފައިން ބާލާނީ ޕްރައިމް މިނިސްޓަރ ނަރެންދުރަ މޯދީގެ ސަރުކާރުން އެކަންކުރަން ބުނެފިއްޔާއެވެ. އެހެންނޫނީ ދިވެހިރާއްޖެއިން ސިފައިން ބޭލުމުގެ ވިސްނުމެއް ނެތެވެ.  ދެގައުމުން ގަބޫލުކުރާގޮތުގައި އިންޑިއާގެ 88 ސިފައިން ރާއްޖޭގައި އެބަތިއްބެވެ.

މިހާވަރަށް އިންޑިއާ ސަރުކާރުން އިންޑިއާ ސިފައިން ރާއްޖޭގައި ތިބިކަމަށް ބުނާއިރުވެސް ރައީސް އިބްރާހީމް މުޙައްމަދު ސާލިހްގެ ވާހަކަފުޅަކީ އިންޑިއާ ސިފައިން ކޮބައިހެއްޔެވެ. ހުސް ދޮގެވެ. އެމްޑީޕިއަނުން މަލާމާތުގެ ބަހުރުވައިން މިބުނަނީ އިންޑިއާ ސިފައިން ކޮބައިހެއްޔެވެ. ރައީސް ސާލިހާއި އިންޑިއާ ސިފައިން ރާއްޖޭގައި ނެތްކަމަށް ވިދާޅުވާ ވެރިން ހުއްޖަތަކަށް ދައްކަވަނީ އިންޑިއާގެ އަސްކަރީ ޔުނިފޯމްގައި މިލިޓަރީ ބޫޓުގައި ހަތިޔާރު އަޅައިގެން ހުރި ސިފައިންގެ މީހަކު މާލެ މަގެއްގެ މަތިން ނުދެއްކޭނެ ކަމެވެ. ސިފައިން ތިބިކަމަށް ބަލާނީ އެގޮތަށް އިންޑިއާ ސިފައިން ރާއްޖޭގެ މަގުތަކުން ފެންނަންޏާއެވެ.

ކޮންމެއަކަސް ދިވެހިރާއްޖޭގައި އިންޑިއާ ސިފައިން ތިބުމާއިމެދު ހިނގަމުންދާ ބަހުސްގައި ދޮގު ހަދަނީ ކާކުކަމެއް އަދިވެސް ނޭނގެއެވެ. ރައްޔިތުންގެ އެއްބަޔަކު ގަބޫލު ކުރެއެވެ. އަނެއް ބަޔަކު ގަބޫލެއް ނުކުރެއެވެ. ރައީސް އިބްރާހީމް މުޙައްމަދު ސާލިހު ރައީސްކަމުގެ ﷲ ގަންދީ ކުރެއްވި ހުވާގެ މަތީގައި ހުންނަވައި ވިދާޅުވެފައިވަނީ އިންޑިއާ ސިފައިން ރާއްޖޭގައި ނެތްކަމަށެވެ. ސޯލިހްގެ ވެރިކަމުގައި ހުންނެވި ޗީފް އޮފް ޑިފެންސް ފޯސް މޭޖަރ ޖެނެރަލް އަބްދުﷲ ޝަމާލުވެސް މިހެން ވިދާޅުވެފައި ވެއެވެ. ނުވިތާކަށް ސިފައިންގެ އިސް ޖެނެރަލުން ލައްވައިވެސް މިވާހަކަ ދައްކުވާފައި ވެއެވެ. އިންޑިއާ ސިފައިން ރާއްޖޭގައި ނެތްކަމަށް ވިދާޅުވެ ރައީސް ސާލިހް ވިދާޅުވީ ތެދުކަމަށް ވަންޏާ އިންޑިއާ ސަރުކާރުން ދޮގުހަދަނީ އެވެ. ކޮންމެ ދުވަހަކު ދިވެހިރާއްޖޭގައި ތިބި އިންޑިއާ ސިފައިން ގެންދަން އުޅޭކަމަށް ވާހަކަ ދައްކާ އިންޑިއާގެ މީޑިއާތަކުން ހަދަނީ ދޮގެވެ. ރައީސް މުއިއްޒު އިތުރުފުޅު ހައްދަވަނީ އެވެ.

އިންޑިއާ ސިފައިންގެ ދެ މީހުން ތިބުމެކޭ 88 ސިފައިން ތިބުމެކޭ 2000 ސިފައިން ތިބުމެކޭ އަދަދުގެ ތަފާތެއްގެ މައްސަލައަކީ ކޮބައިހެއްޔެވެ. ދެމީހުންނަކީވެސް ހަމަ ސިފައިންނެވެ. 88 މީހުން ތިއްބަސް ސިފައިންނެވެ. 2000 ސިފައިން ތިއްބަސް ސިފައިންނެވެ. ރައީސް ސާލިހް ވިދާޅުވަނީ ޔުނިފޯމް އެޅި ސިފައިން ނެތްކަމަށެވެ. ޔުނިފޯމް އެޅިޔަސް ނޭޅިޔަސް ސިފައިން ވެއްޖިއްޔާ ވާނީ ހަމަ ސިފައިންނަށެވެ.

މިހާރުދެން ކޮމިޝަނެއް އުފައްދަވައިގެންނަމަވެސް ރައީސް އިބްރާހީމް މުޙައްމަދު ސާލިހާއި ރައީސް ޑޮކްޓަރ މުއިއްޒު ކުރެ އިތުރުފުޅު ހައްދަވަނީ ކޮން ރައީސެއްތޯ ބަލަން ޖެހިއްޖެއެވެ. ދޮގުހައްދަވާ ރައީސެއް ދިވެހިރައްޔިތުންނަށް އެނގެން އެބަބޭނުންވެއެވެ. މި ޑިބޭޓް އެހެން ނޫނީ ނުހުއްޓޭނެވެ.

އަހަރެމެންނަށް ނޭނގިގެން އުޅޭ ކަމަކީ އިންޑިއާއިން ރާއްޖެއަށް ހަދިޔާކޮށްފައި އޮންނަ ހެލިކޮޕްޓަރާއި ޑޯނިއަރ ދުއްވުން ހުއްޓާލަން ދިވެހި ސަރުކާރުން ބޭނުންވީމާ ހުއްޓާ ނުލައި ދުއްވަދުއްވައި ތިބެން އިންޑިއާ ސަރުކާރުން ބޭނުންވާ ސަބަބެވެ. ޔާމީންގެ ވެރިކަމުގައި ދެވަނަ ހެލިކޮޕްޓަރު ބޭނުން ނޫންކަން ހާމަކުރީމާވެސް ގަދަކަމުން ނަމަވެސް ދިވެހިރާއްޖެއަށް ދޭން އެހާވަރަކުން ގަދައަޅާ ސަބަބެކެވެ.

މައްސަލައިގެ ހައްސާސްކަން ބޮޑީ ރާއްޖޭގައި ތިބި ކަމަށް އިންޑިއާ ސަރުކާރުން އިއުތިރާފްވާ ސިފައިން ބާލަން އިންޑިއާ ސަރުކާރުން ބޭނުން ނުވެ އިންޑިއާގެ މީޑިއާތައް ވައްދައިގެން ދެގައުމުގެ ދެމެދުގައި އުފެދިފައިވާ ނުތަނަވަސްކަމުގެ ބޮޑުކަމުންނެވެ. އަހަރެމެންގެ ގައުމުގައި އަހަރެމެންގެ އާރެއް ބާރެއް ނެތްކަން ދައްކުވައިދޭތީއެވެ.