ފުއްގިރި މައްސަލައިގައި ސަން ކުންފުނިތަކުގެ ހުކުމް އިސްތިއުނާފް ނުކުރަން ޕީޖީން ނިންމައިފި
ރ. ފުއްގިރީގެ ކުއްޔާ ގުޅޭ މަނީ ލޯންޑްރިންގެ މައްސަލައިގައި ސަން އިންވެސްޓްމަންޓާއި ސަން ކޮންސްޓްރަކްޝަނަށް ކުށް ސާބިތުނުވާ ކަމަށް ކްރިމިނަލް ކޯޓުން ކުރި ހުކުމް ބަދަލުކުރެވޭނެ ޤާނޫނީ ނުކުތާއެއް ނެތުމުން އެ ހުކުމް ހައި ކޯޓުގައި އިސްތިއުނާފް ނުކުރަން ޕްރޮސިކިއުޓާ ޖެނެރަލް (ޕީޖީ) އޮފީހުން މިއަދު ނިންމައިފިއެވެ.
ރައްޔިތުންގެ މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް މުހައްމަދުގެ މަސްލަހަތު އޮންނަ މި ދެ ކުންފުނީގެ މައްޗަށް ދައުލަތުން ދައުވާ އުފުލީ ފުއްގިރި ކުއްޔަށް ދިނުމުގެ މުޢާމަލާތާ ގުޅުން ހުރި ފައިސާތަކެއް ލޯންޑާކޮށްދިން ކަމަށް ބުނެއެވެ. ކްރިމިނަލް ކޯޓުން އެ ކުށް ސާބިތުނުވާ ކަމަށް ކަނޑައެޅީ މިދިޔަ އަހަރުގެ ސެޕްޓެމްބަރު މަހުއެވެ.
އިސްތިއުނާފަށް ލިބުނު މުހުލަތުގައި ޕީޖީ އޮފީހުން ހައި ކޯޓަށް މައްސަލަ ހުށަހެޅި ނަމަވެސް ނަތީޖާ ބަދަލުކުރެވޭނެ ފަދަ ސަބަބެއް ނެތް ކަމަށް އެ އޮފީހުން ބުނެފައިވެއެވެ.
ސަން ކުންފުނިތަކުގެ ބައި ނިމުނު ނަމަވެސް ހަމަ މި މައްސަލައިގައި ކުރީގެ ރައީސް ޢަބްދުﷲ ޔާމީނާ ދެކޮޅަށް ދައުލަތުން ކުރާ ރިޝްވަތާއި މަނީ ލޯންޑްރިންގެ ދައުވާގެ ޝަރީޢަތް ކްރިމިނަލް ކޯޓުގައި އަދިވެސް ދަނީ ކުރިއަށް ގެންދަމުންނެވެ.
ފުއްގިރި ކުއްޔަށް ދޫކުރުމުގެ މުޢާމަލާތުން ރިޝްވަތުގެ ގޮތުގައި އެއް މިލިއަން ޑޮލަރު ބަލައިގަނެ އެ ފައިސާ ލޯންޑާ ކުރެއްވި ކަމަށް ދައުލަތުން ތުހުމަތުކުރާ މި ދައުވާގެ ހެކިބަސް ނެގުމުގެ މަރުހަލާ ނިމި މިހާރު އޮތީ ހެއްކާ ބެހޭ ގޮތުން ވާހަކަ ދެއްކުމުގެ މަރުހަލާގައެވެ. އެ ހިސާބުގައި މައްސަލަ އޮންނަތާ ގިނަ ދުވަސްތަކެއް ވެފައިވެއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
