ބީއެމްއެލްގެ ހިންގުމުގެ އޮނިގަނޑަށް ބޮޑެތި ބަދަލުތަކެއް ގެނެސްފި

ބޭންކް އޮފް މޯލްޑިވްސް (ބީއެމްއެލް) އިން، އެ ބޭންކުގެ ހިންގުމުގެ އޮނިގަނޑަށް ބޮޑެތި ބަދަލުތަކެއް ގެނެސް، އިސް މަގާމުތަކަކަށް ބަދަލުތައް ގެނެސްފިއެވެ.

ބީއެމްއެލްއިން ބުނީ މި ބަދަލުތަކަކީ ބޭންކުގެ ޒިންމާދާރުކަން އިތުރުކުރުމަށާއި، ކަސްޓަމަރުންނަށް ފޯރުކޮށްދޭ ޚިދުމަތްތައް ފަސޭހަކޮށް، ދެމެހެއްޓެނިވި ކުރިއެރުމެއް ހޯދުމަށް އެކުލަވާލާފައިވާ ދިގު މުއްދަތުގެ ޕްލޭންގެ ދަށުން ގެނައި ބަދަލުތަކެއް ކަމަށެވެ. މިގޮތުން ގެނައި ބަދަލުތަކާއެކު އެގްޒެކެޓިވް ޓީމުގެ ހަތަރު މެންބަރަކު ވަނީ ކުރިއަށް އޮތް ހަ މަސް ދުވަހުގެ މުއްދަތަށް އާ މަގާމުތަކަކާ ހަވާލުވެފައެވެ.

އަލަށް ގެނައި ބަދަލުތަކުގެ ތެރޭގައި:

1) ޗީފް ކޮމާޝަލް އޮފިސަރުގެ މަގާމަށް އައިޝަތު ޒަމްރާ ޒާހިރު

2015 ވަނަ އަހަރުން ފެށިގެން ބޭންކުގައި މަސައްކަތް ކުރައްވަމުން ގެންދަވާ ޒަމްރާ ވަނީ މީގެ ކުރިން މާކެޓިންގ ޑިރެކްޓަރުގެ މަގާމާއި ޗީފް މާކެޓިންގ އޮފިސަރުގެ މަގާމު ފުރުއްވާފައެވެ.

މާކެޓިންގ އާއި ކަސްޓަމަރުންނާ ގުޅޭ ދާއިރާތަކުގެ ތަޖުރިބާކާރު ޒަމްރާ މި މަގާމަށް އައްޔަންކުރީ ބޭންކުގެ ވިޔަފާރި ކުރިއެރުވުމަށާއި ކަސްޓަމަރުންގެ ބޭނުންތަކަށް އިސްކަންދީގެން ޚިދުމަތް ދިނުމަށެވެ.

2) ޗީފް މާކެޓިންގ އޮފިސަރުގެ މަގާމަށް މޫސާ ނިމާލް

2003 ވަނަ އަހަރުން ފެށިގެން ބޭންކުގައި ޚިދުމަތް ކުރައްވަމުން ގެންދަވާ ނިމާލް އަކީ ބޭންކިންގ ދާއިރާގެ ގިނަ ތަޖުރިބާތަކެއް ލިބިވަޑައިގެންފައިވާ ބޭފުޅެކެވެ. މީގެ ކުރިން ޗީފް ބިޒްނަސް އޮފިސަރުގެ މަގާމުގައި ހުންނެވި ނިމާލްގެ ތަޖުރިބާއާއެކު ބޭންކުގެ ބްރޭންޑް ވަރުގަދަކޮށް، ކަސްޓަމަރުންނާ އޮންނަ ގުޅުން އިތުރަށް ބަދަހިކުރުމަށް ވަނީ އަމާޒު ހިފާފައެވެ.

3) ޗީފް ރިސްކް އޮފިސަރުގެ މަގާމަށް ރަޝްފާ ޖައުފަރު

2004 ވަނަ އަހަރުން ފެށިގެން ބީއެމްއެލްގައި މަސައްކަތް ކުރައްވާ ރަޝްފާ އަކީ ކްރެޑިޓް އަދި ރިސްކް މެނޭޖްމަންޓް ދާއިރާގެ ތަޖުރިބާކާރެކެވެ. މީގެ ކުރިން ޗީފް ކްރެޑިޓް އޮފިސަރުގެ މަގާމު ފުރުއްވި ރަޝްފާ މި މަގާމަށް އައްޔަންކުރީ ބޭންކަށް ކުރިމަތިވެދާނެ ގޮންޖެހުންތަކުން ރައްކާތެރިވެ، ދެމެހެއްޓެނިވި ގޮތެއްގައި ބޭންކު ހިންގުމަށް ބާރުވެރިކުރުވުމަށެވެ.

4) ޗީފް ކްރެޑިޓް އޮފިސަރުގެ މަގާމަށް ގޭރީ ލޯޓަން

2020 ވަނަ އަހަރު ބޭންކާ ގުޅިވަޑައިގަތް ގޭރީ އަކީ ބައިނަލްއަގުވާމީ ދާއިރާގައި ގިނަ ތަޖުރިބާތަކެއް ހޯއްދަވާފައިވާ ބޭފުޅެކެވެ. ލަންޑަނުގެ އިންވެސްޓެކް ބޭންކުގެ ޗީފް ކްރެޑިޓް އޮފިސަރުކަންވެސް ކުރައްވާފައިވާ ގޭރީގެ ބޭނުމަކީ ބޭންކުގެ ކްރެޑިޓް ނިޒާމު އިތުރަށް ހަރުދަނާކޮށް، ރައްކާތެރިކަމާއެކު ބޭންކުގެ ލޯނު ދޫކުރުމުގެ ދާއިރާ ކުރިއެރުވުމެވެ.

ބީއެމްއެލްއިން ބުނި ގޮތުގައި މި އާ އޮނިގަނޑުގެ ސަބަބުން ބޭންކުގެ ހިންގުން ހަރުދަނާވެ، ކަސްޓަމަރުންނަށް ލިބޭ ޚިދުމަތުގެ ފެންވަރު މަތިވެގެންދާނެއެވެ.