ސަރުކާރާއި އިދިކީލި ކެންޑިޑޭޓަކު ހޮވާގެން މާޒީގައިވެސް ވީކަމެއް ނެތް: މުހައްމަދު އިސްމާއިލް

ސަރުކާރާއި އިދިކީލި ކެންޑިޑޭޓަކު ހޮވާގެން މާޒީގައިވެސް ވީކަމެއް ނެތްކަމަށް ކުރިއަށް އޮތް 20 ވަނަ ރައްޔިތުންގެ މަޖިލިސް އިންތިހާބުގައި ސަރުކާރުގެ ކެންޑިޑޭޓެއްގެ ގޮތުގައި ވިލިމާލެ ދާއިރާއަށް ވާދަކުރައްވާ އަލްފާޟިލް މުހައްމަދު އިސްމާއިލް ވިދާޅުވެއްޖެއެވެ.

މުހައްމަދު އިސްމާއިލް މިފަދައިން ވިދާޅުވެފައި ވަނީ ދައުލަތުގެ މީޑިޔާ ޕީއެސްއމްއިން ކުރިއަށް ގެންދާ މަޖިލިސް އިންތިހާބު 24  ބަހުސްގައި މިއަދު ހަވީރު ވާހަކަ ދައްކަވަމުންނެވެ.

މި ބަހުސްގައި އެބޭފުޅާ ވިދާޅުވީ ރާއްޖެއަށް ގެނެވިފައި މިވާ ޑިމޮކްރަސީގެ ޙަޤީގަތަކީ މަޖިލިސްގައި މެމްބަރުން ތަމްސީލްކުރާ ދާއިރާތަކަށް ބޭނުންވާ ތަރައްޤީ ގެނެސް ދެވޭނީ އެއިރެއްގައި ސަރުކާރެއް ނިސްބަތްވާ ކެންޑިޑޭޓަކު ހިމެނޭ ދާއިރާއަކަށް އެކަނި ކަމަށެވެ.

"ޕާޓީއަށް ނިސްބަތްނުވާ އަމިއްލައަށް އިދިކީލިވާ ޕާޓީ، އަނެއްޕާޓީ މިހެންގޮސް ނިކުމެގެން، ރައްޔިތުންނަށް ރައްޔިތުން ބޭނުންވާ ތަރައްޤީ ގެނެސްދެވިފައި ނެތްކަން ވޭތުވެދިޔަ 10 ވަރަކަށް 15 ވަރަކަށް އަހަރުތެރޭ އަޅުގަނދުމެންނަށް ފެންނާކަށް ނެތް" ކުރިންވެސް މެމްބަރުކަން ކުރައްވާފައިވާ މުހައްމަދު އިސްމާޢިލް ވިދާޅުވިއެވެ.

މި ރޭގެ މި ބަހުސްގައި މުހައްމަދު އިސްމާއިލް އިތުރަށް ވިދާޅުވީ އެބޭފުޅާއަކީ ސަރުކާރަށް ނިސްބަތްވާ ކެންޑިޑޭޓަށް ވުމުން ވިލިމާލޭގެ ރައްޔިތުން ބޭނުންވާ ތަރައްޤީ އާއި ކުރިއެރުން ވިލިމާލެއަށް ގެނެސް ދިނުމުގައި ސަރުކާރުގެ ތެރެއިންނާއި އަދި މަޖިލިސް ތެރެއިން ކުރުމަށް އެބޭފުޅާއަށް ހުރިހާ ގޮތަކުން ވެސް ފަސޭހަވެގެން ދާނެތީވެ މިފަހަރުގެ އިންތިހާބުގައި އެބޭފުޅާއަށް ވޯޓްދެއްވުމަށް އެދި ވަޑައިގަންނަވާ ކަމަށެވެ.

މުހައްމަދު އިސްމާއިލް މިފަދައިން ވިދާޅުވެފައިވާ އިރު ފާހަގަކޮށްލަން ޖެހޭ ކަމަކީ އެބޭފުޅާއަކީ މި ސަރުކާރު ވެރިކަމަށް ގެނައުމަށްޓަކައި އެންމެ ބުރަކޮށް މަސައްކަތް ކުރެއްވި އެއްބޭފުޅާކަމެވެ.