ފިރިހެން ކުދިންތަކެއް ގްރޫމުކުރި ޓީޗަރު އަލުން ބަންދުކުރަން ހައި ކޯޓުން އަމުރުކޮށްފި

އުމުރާ ނުގުޅޭ ވާހަކަތަކެއް ދައްކައިގެން ދަރިވަރުން ގްރޫމްކުރި ކަމަށް ތުހުމަތުކުރާ ޓީޗަރު އަލުން ބަންދު ކުރަން ހައިކޯޓުން އަމުރު ކޮށްފިއެވެ.

މީގެ ކުރިން ފުލުހުން މައުލޫމާތު ދިން ގޮތުގައި، ރާއްޖޭގެ ދެކުނު މެދުގެ އަތޮޅެއްގެ (މ،ފ،ދ،ތ،ލ) ރަށެއްގައި ހިނގު އެ މައްސަލަ ފުލުހުންނަށް ހުށަހެޅީ މިދިޔަ 17 އޮކްޓޯބަރުގައި ކަމަށެވެ.

އަދި ކޯޓު އަމުރެއްގެ ދަށުން ޓީޗަރު ހައްޔަރުކުރީ 10 ދުވަސް ފަހުން، 27 އޮކްޓޯބަރުގައި ކަމަށާ، އެއީ 29 އަހަރުގެ ދިވެހި ފިރިހިނެއް ކަމަށްވެސް އޭރު ފުލުހުން ބުންޏެވެ.

އޭނާގެ ބަންދަށް އެންމެ ކުރިން ޖެހީ 20 ދުވަހެވެ. އޭގެ ފަހުން 30 ދުވަސް ޖަހާފައިވާއިރު، މިއަދު ފުލުހުން ބުނީ، އޭނާގެ ބަންދުގެ މުއްދަތު އިތުރު ކުރުމަށް އެ ރަށު މެޖިސްޓްރޭޓް ކޯޓަށް ހާޒިރު ކުރުމުން ޝަރުތުތަކަކާ އެކު ދޫކޮށްލާފައިވާ ކަމަށެވެ.

އެ މައްސަލަ ދައުލަތުން ހައިކޯޓުގައި އިސްތިއުނާފް ކުރުމުން، ހައިކޯޓުން އިއްޔެ ކުރި ހުކުމުގައި ބުނީ، ކުޑަކުދިންނަށް ޖިންސީ ގޯނާކުރާ މީހުންނަކީ މުޖުތަމައުގެ ސަލާމަތަށް އޮތް ނުރައްކަލެއް ކަމަށެވެ.

އަދި ކުރިން މިފަދަ ތުހުމަތެއް އެ މީހެއްގެ މައްޗަށް ކުރެވިފައި ނެތުމަކީ މިހާރު ތުހުމަތު ކުރެވިފައިވާ ކުށުގެ ނުރައްކާތެރިކަމުން އެހެން ކުޑަކުދިން ސަލާމަތްކޮށްދޭނެ ކަމެއް ނޫން ކަމަށާ ތުހުމަތުވާ ޓީޗަރުގެ ދިރިއުޅުމުގެ ވައްޓަފާޅި ހުރީ ކުޑަކުދިންނަށް ރައްކާތެރި ގޮތަކަށް ނޫން ކަން ފުލުހުން ހުށަހަޅާފައިވާ ލިޔުންތަކަށް ބަލާއިރު ބުރަވެވޭ ކަމަށް ހުކުމްގައިވެ އެވެ.

އެހެން ކަމުން، ހައި ކޯޓުން މައްސަލަ ބެއްލެވި ތިން ފަނޑިޔާރުންގެ އިއްތިފާގުން ނިންމަވާފައިވަނީ މެޖިސްޓްރޭޓް ކޯޓުން ޓީޗަރު ދޫކޮށްލަން ނިންމީ ރަނގަޅަށް ނޫން ކަމަށާ، އަދި ޓީޗަރުގެ ބަންދާ މެދު އަލުން ގޮތެއް ނިންމަންދެން ހަތް ދުވަހަށް އޭނާ ބަންދުގައި ބަހައްޓަން އަމުރުކޮށްފަ އެވެ.