ހިއްސާގެ ބާޒާރުގައި އަދިވެސް އަގުތައް އެންމެ މަތީގައި އުޅެނީ އެސްޓީއޯ

މޯލްޑިވްސް ސްޓޮކް އެކްސްޗޭންޖުގައި އެސްޓީއޯގެ ހިއްސާގެ މުއާމަލާތްތަކުގެ އަގުތައް އަނެއްކާވެސް މައްޗަށް ހިނގައްޖެއެވެ.

ހިއްސާގެ ބާޒާރުގެ އެންމެފަހުގެ މުއާމަލާތްތަކަށް ބަލާއިރު، އެސްޓީއޯގެ ހިއްސާގެ އަގުވަނީ 2،065 ރުފިޔާއަށް އުފުލިފައެވެ. މިއަހަރު ފާހަގަކުރެވެނީ ހިއްސާގެ ބާޒާރުގައި އެސްޓީއޯގެ ހިއްސާގެ އަގުތައް ވަރަށް މަތީގައި އުޅޭ އަހަރެއްގެ ގޮތުގައެވެ.

މޯލްޑިވްސް ސްޓޮކް އެކްސްޗޭންޖުގައި އެސްޓީއޯގެ ހިއްސާގެ މުއާމަލާތްތައް އެންމެފަހުން ހުރިގޮތަށް ބަލާއިރު، އެ ކުންފުނީގެ ދެ ހިއްސާ އެއް 2،065 ރުފިޔާގެ މަގުން ވިއްކުމަށް ހުށަހަޅާފައިވާއިރު، 12 ހިއްސާ 2،2010 ރުފިޔާގެ މަގުން ވިއްކުމަށް ވަނީ ހުށަހަޅާފައެވެ. މީގެ އިތުރުން 1،700 ރުފިޔާގެ އަގަކަށް އެސްޓީއޯގެ ހިއްސާ ގަތުމަށްވެސް ހުށަހަޅާފައިވާކަން ފާހަގަކޮށްލެވެއެވެ.

ހިއްސާގެ ބާޒާރުގައި މިދިޔަ މަހު އެސްޓީއޯގެ ހިއްސާގެ އަގު ވަނީ، 2،090 ރުފިޔާއަށްވެސް އަރާފައެވެ. ސެކަންޑްރީ މާކެޓްގައި އެސްޓީއޯގެ ހިއްސާގެ އަގު އުފުލެން ފަށާފައިމިވަނީ މާލީގޮތުން އެކުންފުނި ހޯދަމުންދާ ކުރިއެރުންތަކުގެ ސަބަބުންނެވެ. އެސްޓީއޯއިން ވަނީ މިދިޔަ އަހަރުގެ ވިޔަފާރީގެ ފައިދާއިން ހިއްސާއަކަށް 80 ރުފިޔާ ބަހާފައެވެ. މިދިޔަ އަހަރުވެސް އެސްޓީއޯއިން ވަނީ ހިއްސާގެ ފައިދާގެ ގޮތުގައި އެ އަދަދު ބަހާފައެވެ.