އެހެން މީހުންގެ އެޕާޓްމަންޓުތައް ކުއްޔަށް ދޭން އިޝްތިހާރުކޮށް، ފައިސާ ނަގާ މައްސަލަތަކެއް

ހުޅުމާލެއިން ދުވަހު ކުއްޔަށާއި މަހު ކުއްޔަށް އެޕާޓްމަންޓް ދޭކަމަށް ބުނެ، ސޯޝަލް މީޑިއާގެ އެކި މަންސަތައް މެދުވެރިކޮށް މަކަރާއި ހީލަތުން ފައިސާ ހޯދަމުންދާ މައްސަލަތަކެއް ފާހަގަކުރެވިފައިވާތީ، އެކަމަށް ސަމާލުވުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ.

ފުލުހުން ބުނީ، މިފަދަ ސްކޭމްތައް ހިންގާ ފަރާތްތަކުން ސޯޝަލް މީޑިއާގައި ފޭކް އެކައުންޓްތައް ހަދައިގެން ހަރަކާތްތެރިވަމުންދާ ކަމަށެވެ. އެގޮތުން ޓިކްޓޮކްގައި "Hulhumale Daily Rent Apartment" (@hulhumaleapartment) ފަދަ އެކައުންޓްތަކާއި، 7217905 (960+) ނަންބަރު ބޭނުންކޮށްގެން މިފަދަ އޮޅުވާލުންތައް ހިންގަމުންދާކަން ތަހުގީގަށް ވަނީ ފާހަގަކުރެވިފައެވެ. ނަމަވެސް، މި މައްސަލަތަކުގައި ފައިސާ ޓްރާންސްފަރ ކުރެވޭ އެކައުންޓްތަކުގެ އަސްލު ވެރިފަރާތްތަކުގެ އެއްވެސް ބައިވެރިވުމެއް މި ޖަރީމާތަކުގައި ނޯންނަކަން ވެސް ފުލުހުން ވަނީ ހާމަކޮށްފައެވެ.

މަކަރާއި ހީލަތް ހަދާ ގޮތް

ފުލުހުން ފާހަގަކުރި ގޮތުގައި މި ސްކޭމް ހިންގުމުގައި މައިގަނޑު ގޮތެއްގައި ބޭނުންކުރަނީ އަންނަނިވި އުކުޅުތަކެވެ؛

އޮޅުވާލައިގެން އިޝްތިހާރުކުރުން: މީހުންގެ ޝައުގުވެރިކަން ހޯދުމަށް އެހެން ފަރާތްތަކުގެ އެޕާޓްމަންޓްތަކުގެ ވީޑިއޯއާއި ފޮޓޯ ވަގަށް ނަގައި، އެކަށީގެންނުވާ ހެޔޮ އަގުތަކުގައި ކުއްޔަށްދޭކަމަށް ބުނެ އިޝްތިހާރުކުރުން.

އަވަސްއަރުވާލައިގެން ފައިސާ ހޯދަން އުޅުން: މެސެޖިންގ އެޕްތަކުން ވާހަކަދައްކަން ފެށުމުން، އެޕާޓްމަންޓް ހޯދުމަށް އިތުރު މީހުން އެދެމުންދާ ކަމަށް ބުނެ، ބުކިންގ ކަށަވަރުކުރުމަށް ވަގުތުން އެޑްވާންސް ފައިސާ ދެއްކުމަށް ޑިމާންޑްކުރުން.

އެޑްވާންސް ފައިސާ އަތުލުން: ވަކި ބޭންކް އެކައުންޓްތަކަކަށް 2،550 ރުފިޔާއާއި 10،000 ރުފިޔާއާ ދެމެދުގެ އަދަދަކުން އެޑްވާންސް ފައިސާ ޖަމާކުރުމަށް އެދުން.

ވަގު ލިޔެކިޔުމާއި އައިޑީ ބޭނުންކުރުން: އިތުބާރު ހޯދުމުގެ ބޭނުމުގައި، ވަގަށް ނަގާފައިވާ އައިޑީ ކާޑާއި ސައްހަނޫން ލިޔެކިޔުންތައް ޗެޓް މެދުވެރިކޮށް ފޮނުވުން.

ފައިސާ ލިބުމުން ގުޅުން ކަނޑާލުން: ފައިސާ ޓްރާންސްފަރ ކުރި ސްލިޕް ފޮނުވުމާއެކު، މުއާމަލާތް ކުރުން އެއްކޮށް ހުއްޓާލައި، އެޕާޓްމަންޓް ހަވާލުނުކޮށް އަދި ފައިސާވެސް އަނބުރާ ނުދިނުން.

ރައްކާތެރިކަމުގެ ގޮތުން އަޅަންޖެހޭ ފިޔަވަޅުތައް

މިފަދަ ލަނޑުތަކުން ސަލާމަތްވުމަށްޓަކައި، އެޕާޓްމަންޓަށް އަމަލީގޮތުން ގޮސް ބަލައި، ތަނުގެ ވެރިފަރާތް ނުވަތަ ހުއްދަ އޮތް އެޖެންޓާ ބައްދަލުނުކޮށް އެއްވެސް އެޑްވާންސް ފައިސާއެއް ނުދެއްކުމަށް ފުލުހުން ވަނީ އިލްތިމާސްކޮށްފައެވެ.

އަދި ކުއްޔަށް ހިފުމުގެ ކުރިން ތަނުގެ މިލްކުވެރިކަން ސާބިތުކޮށްދޭ ލިޔުން ޔަގީންކުރުމަށާއި، އަވަސްއަރުވާލައިގެން އޮންލައިންކޮށް ފައިސާ ދައްކަން އެދޭ ހާލަތްތަކުގައި ފައިސާ ޓްރާންސްފަރ ނުކުރުމަށްވެސް ފުލުހުން ނަސޭހަތްތެރިވެއެވެ. މީގެ އިތުރުން، ސައްހަކަން ކަށަވަރުނުވާ ސޯޝަލް މީޑިއާ އެކައުންޓްތަކާއި ޕްރައިވެޓް މެސެޖިންގ އެޕްތައް މެދުވެރިކޮށް މާލީ މުއާމަލާތް ނުހިންގުމަށް ވަނީ އެދިފައެވެ.

ފުލުހުން ބުނީ މިފަދަ މަކަރާއި ހީލަތުގެ ޝިކާރައަކަށްވެފައިވާ ފަރާތްތަކާއި، ފޯނު ނަންބަރު 7217905 އަށް ފައިސާ ޓްރާންސްފަރ ސްލިޕް ފޮނުވާފައިވާ ފަރާތްތަކުން، ނުވަތަ މިފަދަ އެއްވެސް އަމަލެއް ފާހަގަކުރެވިއްޖެނަމަ ލަސްނުކޮށް ދިވެހި ފުލުހުންގެ ޚިދުމަތުގެ ހޮޓްލައިން 3322111 އަށް ގުޅުއްވައި ނުވަތަ ފުލުހުންގެ އެންޓި-ސްކޭމް ސެންޓަރަށް ރިޕޯޓުކުރުމަށް އެދޭ ކަމަށެވެ.