ބީއެމްއެލްއިން ޓީޓީތަކަށް ދޫކުރާ ޑޮލަރު އިތުރުކޮށްފި

މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބޭންކުތަކަށް ފޯރުކޮށްދޭ ބޭރު ފައިސާގެ މިންވަރު ތިން ހަފުތާއަށް އިތުރުކުރުމާ ގުޅިގެން ބޭންކް އޮފް މޯލްޑިވްސް (ބީއެމްއެލް) އިން ޓެލެގްރެފިކް ޓްރާންސްފާ (ޓީޓީ) ތަކަށް ވިއްކާ ޑޮލަރުގެ އަދަދު ތިން ހަފުތާގެ މުއްދަތަކަށް އިތުރުކުރުމަށް ނިންމައިފިއެވެ.

ބީއެމްއެލްއިން ބުނީ މި ނިންމުން ނިންމީ އެ ބޭންކަށް ލިބޭ ޑޮލަރުގެ މިންވަރާއި ކަސްޓަމަރުން ހުށަހަޅާ ޓީޓީތަކުގެ އަދަދަށް ބެލުމަށް ފަހުގައި ކަމަށެވެ. މި އަހަރުގެ ޖެނުއަރީން ޖުލައިގެ ނިޔަލަށް ޓީޓީ ފޮނުވުމަށް ކަސްޓަމަރުންނަށް 186 މިލިއަނަށް ވުރެ ގިނަ ޑޮލަރު ދޫކޮށްފައިވާ ކަމަށް ވެސް ބޭންކުން ބުންޏެވެ. އެއީ ކޮންމެ މަހެއްގައި އެވެރެޖުކޮށް 27 މިލިއަން ޑޮލަރެވެ. މިދިޔަ އަހަރުގެ މަހެއްގެ އެވެރެޖާ އަޅައި ބަލާއިރު އެއީ 12 މިލިއަން ޑޮލަރުގެ އިތުރުވުމެކެވެ.

ފާއިތުވި ހަތް މަސް ދުވަހުގެ ތެރޭގައި ކަސްޓަމަރުންގެ ތަފާތު ބޭނުންތަކަށް ގާތްގަނޑަކަށް 570 މިލިއަން ޑޮލަރު ބީއެމްއެލް މެދުވެރިކޮށް ދައުރުވެފައިވާ ކަމަށް އެ ބޭންކުން ފާހަގަކޮށްފައިވެއެވެ. ދުވާލެއްގެ މައްޗަށް ބަލާ ނަމަ އެ އަދަދު އެވެރެޖުކޮށް 2.7 މިލިއަން ޑޮލަރަށް އަރައެވެ.

ބީއެމްއެލްއިން ވަނީ ޢާންމު ފަރުދުންނާއި ވިޔަފާރިތަކަށް ބޭނުންވާ ބޭރު ފައިސާ ފޯރުކޮށްދިނުމުގައި ދެމިއޮންނާނެ ކަމުގެ ޔަޤީންކަން ދީފައެވެ. އެ ބޭންކުން ބުނި ގޮތުގައި ކަސްޓަމަރުންގެ ބޭނުންތަކާއި ބޭރު ފައިސާގެ ޙާލަތު ދެމެހެއްޓެނިވި ގޮތެއްގައި ބެލެންސް ކުރުމަކީ ބޭންކުގެ އެންމެ މުހިންމު އެއް މަސްއޫލިއްޔަތެވެ. މި ބަދަލު ތިން ހަފުތާގެ މުއްދަތަށް ދެމިގެންދާނޭކަމަށްވެސް ބީއެމްއެލުން ބުންޏެވެ.